MARKUS 12 - PERJANJIAN BARU NALCA YUBA

Anggur Wa Welemek Nang Yuba

¹ Dara onoʾ Yesus ara, sununaʾ adya sikenek nek einiwosukaʾ ara, ”Nimi ben hnon anggur wa weboka mebgogowok dara, wa gokgobok nidyaʾ lekaʾ dob ganagamok. Dara, gal dok meka londelemnamna aboka, soko lokookanya, we seknaʾ e hnon imik moruwoka sobok. Ban seleb dara, nimi wa wen nang eboka welemnelum aboka, lebgogowok dara, alda yok mok sokok byuk.

² Wera gal dok li yenewok dara, alda alja wa wenya be hnon gal doka wa wen nang ek ab, sikenek ab bo yananelem bar aboka orugok.

³ Bok an orugoknya bera yalamok enyek, wa weboka memelemek nang edya, saboka olomekaʾ ara, or nong baneng binilam aboka ob yakek.

⁴ Dara onoʾ anggur wa damnya bera, onoʾ yoknya bek sikenek bilom aboka orugok. Wera benebabya, wisa golom-golom aboka saboka olomekaʾ ara, derewoka wabek.

⁵ Dara wa damnya bera, yoknya bek onoʾ binilam aboka orugok. Wera benera hyak dibaʾ owek. Dara yoknya yalamna nang era, hnon nang era embengaʾ saboka olosik bok, hnon nang era hyak dibaʾ obek.

⁶ Wera wa damnya bedya alja yokaʾ nong me, wanaʾ ulumok me nek hnonok lobonggok. Anya wera alja dara, nadya me yokaʾ nong ak anasa, mem senewanamak senewoka, sidyaʾ nong ara, me nenyek sikenek binilam, hyok.

⁷ Bok wa meewoka ulumek nang era, sik moumen wenyabdek, me ara alja misaʾ dobnelanya. Anasa nunda alak obibyaʾ adya, benedya misaʾ era nuk dobnemab, wenyaboka lebdek.

⁸ Dara sikda me nen saboka olomekaʾ ara, somogok dara, anggur wa lekaʾ beiyik sam doboka bobogek,” hyok.

⁹ Wenyabgogowok dara, Yesus ara Yahudi nang ek heibnesukaʾ ara, ”Wera wa damnya bera, hekaʾ hubnamla senelum do? Wa damnya bedya unuwanalanya nera ban: Alda yeiniboka men wa weboka memelemek nang era, nidyaʾ obnamlakanya, wa ara yok nang ek ugunja welelulum aboka lebnamla.

¹⁰ Ugunda ban yub en Imik Neyung yuba momnya dobokaʾ ara, hnon eininggululum de? Nim e son nang edya lorob girik era, men beiyiboka sunun girika dangoka ulumla.

¹¹ Ban ununaʾ ara, Imik Neyung ak sam ab unulamla, wera nu hogung ak yok lok soʾ unulamlaʾ nong ara, al an! wenyaboka momnya dobok,” hyok.

¹² Wenyek Yahudi dub nang edya dara, Yesus adya ban sunuwoka lebok yub era, nuk lelesil senewoka ella dekaʾ anasa, Yesus ak salawoka heng goubnobaʾ senewoka ulumek. Bok, nimi nauba ulumekaʾ anyek lok anasa, sikda alak or lobeekanya, yokok sam byik.

Mok Soko Amba Rupiah Dolomek Yuba

¹³ Bok onoʾ dub nang edya, Parisi nang eb, Herodes bedya wa welemek nang eb, Yesus ak sene benewanobaʾ aboka alak bululum aboka orugeisik.

¹⁴ Dara sikda Yesus ak yeiniboka heibekaʾ ara, ”Neyung neklesilimnya o, anda malya nimi nidyaʾ hiboka pe neklesilim, hnon nang edya yub era malya senewoka jakman ganya bonggululamaʾ anasa, wera anda Imik Neyung adya soko nim unuwanok senelamlaʾ damok ara pe neklesilim. Anasa neyung, dubnya Kaisar bek soko amba rupiah eleganesibya dara, perob gom, orok gom? Anasa nunda deklemnesibya gom, orok gom?” wenyaboka heibek.

¹⁵ Wera Yesus ara, sikja sene heibeknya nera seleb ella ubsuukanya, alja sikenek lebnesukaʾ ara, ”Ugunda hekasa nak ara sene sunulunulum do? Wera ugunda rupiah hnon, na kendenemnaʾ anasa, bo yoululum,” hyok.

¹⁶ Dara sikda bo yek. Dara, Yesus ara, ”Anyeganara heknedya sununaʾ eb, momnya donaʾ eb ulumla do?” aboka heibsuk. Dara, ”Kaisar dubnya wenesinya benyaʾ,” hyek.

¹⁷ Anasa, Yesus ara sikenek lebsukaʾ ara, ”Wera anasa, Kaisar dubnya wenesinya bedyinya nera, dubnya Kaisar bek elegolulum. Anya, Imik Neyung adyinya nera, Imik Neyung ak elegolulum,” hyok. Dara sikda alja wenyaboka neksukaʾ anyek, sikda hyak loka dabsuk.

Embengaʾ Suboka Buknemak Yuba

¹⁸ Wera onoʾ Saduki nanga hnon Yesus ak heil yeilimek. Ban nang enedya dara, seleb somogamna nim era eimik onoʾ suboka buknenggunumak alamek nang.

¹⁹ Dara sikja Yesus ak, ”Neyung neklesilimnya o, Musa bedya nuk an momnya doboka elegosukaʾ ara. Nimi be hnon gela doledyok me beilinaʾ loboka somoganamla dara, alja weis edya lo somogalya gel gen doboka, somogelenya benesa me beib lunuwanamlaʾ, wenhyok,” hyek.

²⁰ ”Wera, al kabo nang era nimi sekbadya nang ulumek. Yandonya bera gela doboka, me beilinaʾ orok bok, somogok.

²¹ Dara onoʾ, ana beremnya bedya gel genyek dobok bok, beneba me beilinaʾ orok bok, somogok. Dara onoʾ ana winilinya bedya dobok. Wera onoʾ beneba me beibla henggonggom somogok.

²² Dara al sik nang yilaʾ nidyaʾ unubdibigemekaʾ ara, sekbadya nanga nidyaʾ ara me beibnenggonggom somogeekanya, gel geneba sidyaʾ dakoka somogok.

²³ Anasa wera, nimi sekbadya nang dara, seleb nidyaʾ nang neik gel genyek domek bok anasa, nimi suboka buknemak sum era, gel genyek dara, heknedya gel yokaʾ danamla do?” wenyaboka heibek.

²⁴ Wenyek Yesus adya sikenek, ”Ugunda Imik Neyung migib ab, Imik Neyung yuba momnya doboknya nera elgom ululumaʾ adya, wera ugunda ganya ongo ibsuk nang ek ululum.

²⁵ Anasa wera, embengaʾ suboka buknemak sum era, nim ara gela nenya doldanggulumnemak bok, imik heikek lero nang enesoʾ anyek, ulumnemak.

²⁶ Alda nimi somogamna nim embengaʾ suboka bunaʾ ak sam amba dara, ugunda Musa bedya gel ek uk bokaʾ ok singilimokaʾ amba leboka, momnya dobokaʾ ara hnon eininggululum de? Dara ban momnya dobokaʾ ara, Nara Abraham bedya Imik Neyung, Ishak bedya Imik Neyung, Yakub bedya Imik Neyung ulumna, aboka lebok.

²⁷ Anasa Imik Neyung ara seleb somokdob nim edyaʾ Imik Neyung unggulumla. Alda nim embengaʾ ulumak nim edyaʾ Imik Neyung ulumla. Ugunuk danyek hyak ganya ongo ibdobaʾ nong ak ululum!” wenyhesuk.

Dib Nong Yub Yuba

²⁸ Dara nimi be hnon Yahudi yuba neksinya bek yeindeboka, sik Yesus ab, Saduki nang eb, yuba saldalamekaʾ ak kebok enyek, Yesus ara Yahudi nang edya alak heibeknya nera pe lebokaʾ ak eibuk. Dara alda Yesus ak, ”Neyung o, wenenaʾ yub ara nidyaʾ perob bok, har yub erek hyak dib nongnya nek ulumla do?” wenyaboka heibuk.

²⁹ Anasa Yesus adya benyek an lebokaʾ ara, ”Hyak men nonogoka dib nongnya ulumla yub era, Wei, ugunda Israeli nim o, keblulum e! Nunjaʾ wenelesilnya Imik Neyung ara, hnonok ok ulumla.

³⁰ Anjaʾ neyung Imik Neyung ak ganya gebman wanaʾ ululom, anja nong unaʾ gebman wanaʾ ululom, anja ganya seininaʾ gebman wanaʾ ululom, anja migib gebman wanaʾ ululom, hyok.

³¹ Penenya nera, Andam nang an nong ak wanaʾ uldalalam sok, anjaʾ yok nim ek unu wanaʾ ululom. Ban penya yuba damok danyek, hyak dib nongokanya, yoknya nera or sobaʾ so ak ulumla,” hyok.

³² Dara onoʾ yuba neksinya bedya Yesus ak, ”Neyung neklesilimnya o, anda aldib beknaʾ nong leblam! Imik Neyung ak alak hnonok ok ulumlakanya, yoknya nera orok, al alak ok.

³³ Wera, Imik Neyung ak ganya gebman wanaʾ uboka, ella unaʾ gebman adya hnon wanaʾ uboka, onoʾ migib gebman adya hnon wanaʾ uboka, onoʾ anja yok nim ek an damnya wanaʾ uldalalam sok, unu wanaʾ ulumnelam dara, perob nongnya nera an; alda Imik Neyung amba pam oboka beiyiboka, yokaʾ-yokaʾ nidyaʾ giboka eleknanya nenegom,” hyok.

³⁴ Dara onoʾ, Yahudi yuba neksinya bera pe lebokaʾ ak eibuk dara, Yesus adya benyek an, ”Anda Imik Neyung me dang meknewalam,” hyok. Ban nen seleb dara, eimik era yok nim era ganya igin anasa, Yesus ak yokaʾ-yokaʾ hnon heibnenggubek.

Nimi Blebsinaʾ Dubnya Bemba Yuba

³⁵ Wera onoʾ Yesus ara anam Imik Neyung e erem pik yuba lelesuukanya, lero heibnesukaʾ ara, ”Yahudi yuba neksin nang edya, Kristus ara Daud bedya me alamaknya nera, harsonya nek lelemak do?

³⁶ Nenesa dara, Daud bera Imik Neyung Geisinya gologomokaʾ adya lebokja, Wenelesilnya bedya, nadyaʾ wenelenelnya bek lebokaʾ ara, Anda nadyaʾ sirik soruk sam bulumenaʾ moruwoka, anja isaʾ nang era, nadya anjaʾ yan damumduk sam bo yanenggen, wenhyok,” hyok.

³⁷ ”Dara, Daud beneba alak wenenanya hyok bok anasa, Daud bedya me heneseng dara, harso danamso do?” hyok. Dara nimi nauba longomekaʾ ara, Yesus adya neklesukaʾ anyek, ganya goluwoka kelemek.

Yuba Neksin Nang Ek Keeboka Ulululum Hyok Yuba

³⁸ Wera Yesus ara yuba neklesuukanya lebokaʾ ara, ”Nimi Yahudi yuba neksin nang enyek, waren akleng ongowoka, deknaʾ gasaʾ pik sekdo yabalameibya enyek giblisinok senelemak nang ek ara, pe keebdaboka ulululum.

³⁹ Anya hnonda, Yahudi nim edya yub donaʾ ek ara, sikda men nonogoka bukoka, masa senenggomaʾ delemnaʾ ak ara, men laga eibsinok senenaʾ ak bulumak.

⁴⁰ Sikda you gelewa edya e nenyek si hnoum aboka, Imik Neyung ak yuba warenaʾ leboka heng uboka mololomak. Dara ban nenesa leboka, Imik Neyung adya igina kwenaʾ ara, sikenek hyak naubaʾ dobnemak,” hyok.

Yougel Gel Ge Rupiah Doronggok Yuba

⁴¹ Dara yok sum enyek, Yesus ara nim Imik Neyung amba rupiah doronglomekaʾ ak mokso bukoka, huru doronglomak do aboka, kemelemok. Dara, nimi bonaʾ dub nimi gong era rupiah nauba doronglemek.

⁴² Bok neikek anara, gela hnon yougel gek yeiniboka, hyak mek rupiah enyek penya makoka doronggok.

⁴³ Anyek eiyiboka, Yesus adya alja yuba doro diriga ban nang ek anyagan yoululum aboka, sikenek, ”Nara ugunuk dib lebsin, yok nimi gong dara, or mek so doronggak bok, ban yougel genyek, hyak nauba ak doronggamla.

⁴⁴ Nimi gong dara, nauba ulumlaʾ ak ab bok loboka doronggak bok, ban gel genyek dara, alba denaʾ amba bokaʾ anyek, alak an ululanya nera nidyaʾ gobdo doronggamla,” wenyaboka lebok.