2 TESALONIKA 2 - PERJANJIAN BARU NALCA YUBA

Nimi Men Malya Unuwanamak Yuba

¹ Nunjaʾ Wenelesilnya Yesus Kristus yanggan yuba nong eb, nun nong anyek neikaʾ ak bobmamaganasilikanya ulumnemab an yub enesa leboka, nadya okoka moloweisinaʾ nong ara ban:

² Yesus ara wera seleb saawoka yeilimok an yub emba leboka, ugunda berra lok ganya boboka ganya daldom-daldom anaʾ ara mem. Nera or yuba lesijaʾ ak anyeb gom, ununumnaʾ len nang edya gom, nunjaʾ anaba ugunuk beillilesab momnya donaʾ ak anaba hnon wenyamek aboka ugunuk wenyheijek aboka lebna.

³ Anasa Yesus yanamla sum oka dalya dara, ban unurub damok enyek men laga danamlaʾ ara, nimi nauba yuba domeijedyok ganya dangawoka malya danamak, hnonda Kristus ak sondaʾ amba bobnenewoka nara elgom aboka lebnamla, hnonda nimi malya unaʾ dubnya bisaʾ heikek weklulaʾ aboka, orowek gegeboknya bera laga goboka seknamla dara, ugunda yokaʾ-yokaʾ igin yakaʾ yanamlyaʾ anaba ugunuk ara sondaʾ amba bobnenewoka lebsijek.

⁴ Wera, alda hyak dengdang ganya boboka, nimi malya nenewoka al nong nim adya giblemakaʾ anaso imik nenebdangoka, hnonda nim adya dara, Imik Neyung ak giblemakaʾ ara an senelemakaʾ nenebdanamla. Orokaʾ anaba al nong ara, Imik Neyung yokaʾ ek sam bukoka, nara Imik Neyung ara an aboka sondaʾ amba laga lebdanamla.

⁵ Wera nara ugunub neikaʾ ulumouba salek, ban men ugunuk lesisaʾ anyek, ugunda pe seiniwoka beknelum.

⁶ Ban nidyaʾ lebnanya nera wenyek mandewoka laga danganggulumlaʾ ara, hekaʾ adya gasa salawoka bo ulumlaʾ ara, ugunda seleb ella ululum. Anasa Imik Neyung adya nimi malya nenesinaʾ dubnya bera, wera or laga dolul senemnamla sum yenewalya dara, wera sum enyek, laga danamla.

⁷ Wenyek dara, nimi malya nenesinaʾ nimi gangganek sam wa ara gelelenga wero yabalamla bok, gunuwoka welemla. Bok al ulumlaʾ ara, soruka salalamlaʾ anyek, gokgobok sam nenewalya dara,

⁸ wera nimi malya nenesinaʾ dubnya bera alda laga danamla. Dara Yesus ara alja senenggom ganya nong senedyaʾ uboka yanamla sum era, bisaʾ dubnya bera alja malya nenesin bolgamalaʾ ablaboka si leboka obnamla.

⁹ Nimi malya nenesinaʾ dubnya bera alda bisaʾ dubnya Satan bedya nimi malya nenesin migib eb lanawanamla. Dara ban nimi malya nenesinaʾ adya dara, sondaʾ anasa leboka, yok-yok lok so migib ununaʾ ab, beknaʾ ab senenggom lok soʾ nauba uro yabalemnamla.

¹⁰ Bisaʾ migib anadya ok, yok nimi gong dara, nauba malya nenewanasil. Dara, nauba Imik Neyung adyaʾ perob unaʾ ak wanaʾ uboka donaʾ ara lek aboka, blekoka perob senenggulumakaʾ anasa, somoganamak.

¹¹ Lek aboka ulumakaʾ anasa, ban unu malya nenewanasil nim ek, Imik Neyung adya sik nonga somoganameija senen malya unaʾ ganya ok dorongganesil dara, wera anadya nimi nauba ara alda senenggom sondaʾ yub anyek aldib senewanamak.

¹² Wera ban unulumeija damok enedya, nimi nauba malya unaʾ ak perob senewoka, dib yub ak dib senenggulumeija nim era igina boyiwanesil.

Ugunuk Dara Blebsununaʾ Aboka Weboka Dobsuk Yuba

¹³ Nunjaʾ hemyab Imik Neyung adya wanaʾ ulusil nim o! Anasa, Imik Neyung ugunuk blebnesin senewoka weboka dosuknya nenesa leboka, nunda sobaʾ Imik Neyung ak perob aboka giblemab. Ban unusukaʾ ara, Imik Neyung Geisinya adya, Imik Neyung adyaʾ geisa mabo nenewoka, ugun nong adya Imik Neyung ak ab perob nong yuba hnon dib senelumaʾ adya ubsuk.

¹⁴ Ban nenesa leboka, nunja ugunuk perob lero yanggan yuba bo yeilisubaʾ pik uboka, Imik Neyung adya ugunuk youbsuk. Imik Neyung adya ugunuk youbsuknya nera, damok ara Yesus Kristus imik nenewanamak sum enyek, ugumbabya ugunja si imik nenewosunuk senewoka youbsuk.

¹⁵ Hemyabo nim o, wera anasa nunja ugunuk momnya donaʾ pik uboka gom, yuba sibamaʾ adya laga nekesuba yub enyek, pe sekoka salabmoubuka ulululum.

^16-17 Ugunda perobnya weboka, onoʾ perobnya nenyek unulululumaʾ aboka, nunjaʾ Wenelesilnya Yesus Kristus adya, hnonda nunjaʾ neyung Imik Neyung adya, sobaʾ amba ganya sangab elegoka, nunja ganya migiba gebnesil. Imik Neyung adya nuk wanaʾ ulusilekanya, aljaʾ perob ganya edya, siklerob ganya boboka, perobnya nek ganya nebom aboka diri ulumab.