1 TIMOTIUS 3 - PERJANJIAN BARU NALCA YUBA

Nimi Bo Usin Dara Unu Ulumneseng Yuba

¹ Nimi ben hnon bo usin wa webnun senewalenya bera, alda perob wa webnun ganya seinilamlaʾ adya pelelaba, hnon wenyalamak dara, dib lelemak.

² Dara, nimi bo usin wa welelanya bera, alda si gegena ponaʾ oroknya benyek, alda gela hnonoknya bek, ganya siklewoka pe diri uldalalanya benyek, pe seinililanya benyek, perob ok uboka memeldalalanya benyek, alja ek yanggan nimi perobaʾ leboka doro diyiwoka, albabya nimi pe nekoka ulusilnya bek ululul.

³ Nimi bo usinnya bera, yu meka delelenya bek gom, oldanaʾ hwamnya bek gom, alda saawoka, namen ganya boboka, yok nim ek heknaʾ ganya ok uboka ululenya benyek ululul. Alda rupiah hogung ok bololenya bera beilinaʾ ara, mem.

⁴ Bera onoʾ alja mabo silibaʾ ak pe bo uboka, alja mab era alak nunja neyung senewoka lok ganya boboka, alja yuba keboka, ulumnesengnya benyek, ulumnamso dara, wera nimi bo usinnya ulumnamso.

⁵ Nimi ben hnon, alja meneng mabo silibaʾ enyek pe bo unaʾ elgom dara, Imik Neyung yuba donaʾ nim ek dara, alda hekaʾ huboka bo ubnamso do?

⁶ Nimi bo usinnya bera, alda dengdang ganya boblyekanya, alda Iblis ak heng goubnaʾ dobok sok, beneba unuwalyek anasa, wenyok anam yuba dolenya bera sekillinaʾ ara, mem.

⁷ Ban benera, alja si nenera perob deng ok ululul anaʾ orok dara, nim adya alak meilinya seneweijikanya, alda bisaʾ dubnya bedya heng wel loblamlyaʾ ak obenggalyek anasa, alda pe ululenya benyek beibnok.

Imik Neyung Wa Wen Uruma Geknelemla Nang Yuba

⁸ Neikso, Imik Neyung ek arasinaʾ nang eneba, eirigal ganya bonggulumak nang, sibamaʾ penya-penya lenggulumak nang, yu mek denggulumak nang, rupiah nauba dobsibya ganya bonggulumak nang enyek, yok nim edya sikenek perob senewanemeija nang ek, ulunok.

⁹ Bok, sikda mek ganya geisa uboka, alda Imik Neyung adya laga nenemok dib senenaʾ ak ganya kweboka, dib salabmoubuka, ulunok.

¹⁰ Arasin nang danara, sikenek sunubyamadijebok, wera meknenaʾ orok nang enyek, or arasin nang aboka dibaʾ sekiyiwaneseng.

¹¹ Anasonya neikek, gelewa anaba, yok nim ek malya yuba lenaʾ ab, gelewa danara ganya siklewoka diri ubdangoka, yok nim edya anaba pe ulumak aboka dib senewanemeija gelewa enyek ulunok.

¹² Arasinya bera alda gela hnonoknya bek ululul. Dara onoʾ bera alja mab eb, alja ek ulumak nimi nidyaʾ ara pe bo ulusulul.

¹³ Arasin nang era, yuba dolomak nim ek, pe arawoka welemnemak dara, yok nim edya pelemak aboka, sikja si imik nenewoka, sikja Yesus Kristus ak dib senelemakaʾ ara nauba gokoka laga lero balamnamak.

Nunja Yuba Dolomabaʾ Damok Yuba

¹⁴ Nara anak seʾ kemel yanenggen senenadyok, or malye aboka onoʾ ban momnya doboka beibgen.

¹⁵ Wen unumnyaʾ adya mandewanyaʾ anaba, Imik Neyung mabo dangoka pe ulumakaʾ damok anyek unulumakaʾ ara men ella danalum aboka ubna. Dara nera, yuba dolomak nimi nong ara sikda egomnaʾ dibaʾ embengaʾ ulmoublamla Imik Neyung adya perob dib yuba dukduka dangalamakaʾ anasa lebna.

¹⁶ Nimi hekaʾ huboka pe ulumakaʾ damoka laga dangamok yub era, senenggomaʾ ulumlaʾ ara hyak dib nong. Wera nenesa ban yub en ulumlaʾ ara, ”Alda sokok nim nonga doboka laga dangamok. Alda Imik Neyung Geisinya adya perobaʾ nong neneiyimok. Dara onoʾ, lero nang edya anaba alak seleb eiyimek. Alak ab yub era mok soko me nidyaʾ yuba elgom ulumak nim ek leb elegesik. Dara onoʾ, soko nim edya alak dib senemek. Dara, alak imik heikek bo weleiyimok,” aro lebok.