1 KORINTUS 5 - PERJANJIAN BARU NALCA YUBA

Yuba Domekjok Malya Ulumek Yuba

¹ Nara hnon, ugun gangganek ara, hnon nang era gela salawoka malya uro balamak anaso aboka lelemakaʾ ak hnon kelemna. Wenyalameknya nera, Imik Neyung yuba donaʾ orok nim eneba ununaʾ oroknya nek, ben hnon aljaʾ neyung bedya eimik gel gek dobdangarek, alamakaʾ ak kemsa.

² Ban unululumjok, wera onoʾ ugunda dengdang aboka, imik nenebdangdo yabalalum. Ban unululumnya nera, dib nong ara, onoʾ angwei salyaʾ ulumla senewoka engelemnesomokanya, malya unulumak nim era, ugun gangganek ab doboka yaknasom.

³ Na nong ak dara, ugunub unggulumab bok, ganya ak dara, nara ugunub neikaʾ ulumab. Anasa wera, neikik ulumnaʾ anaso uboka, ban unumoknya bek ara, ban unuwanamab senewoka seleb seinibgogomsa.

⁴ Ugunda Wenelesilnya si Yesus lomok uboka, yuba longowomun dara, nara ganya adya neikik uboka, ugunja nunja Wenelesilnya Yesus migib adya, ban malya unululanya benyek, Iblis bek elegolulum.

⁵ Al onnya benyek, wera alja nong ara, soldob menegoka denghulul senen bok, alja ganya ak dara, Wenelesilnya yanamla sum enyek bleblulaʾ aboka, eleganalum.

⁶ Ugunja nonggo aldalalumaʾ ara malya nong. Roti gwaneng welenaʾ ara mek bok, nonga nidyaʾ eldaklamlaʾ ara, ugunda elgom ululum de?

⁷ Dib nong ara, ugunda perob eldaknenggulumla roti anaso seleb ululum bok, wenera ugunda ban youmaʾ malya unaʾ anaso roti eldaklamla anyek boboganalumukanya, hyak perob wenyok eldaknenggulumla roti anaso onoʾ perob danalum. Anasa wera, Kristus nong anyek seleb blebsinaʾ domba pama dangamokaʾ adya, wera nera malya unaʾ amba seleb somogokaʾ ulumlaʾ anasa lebna.

⁸ Nenesa leboka nunda wenera, youmaʾ blebsukaʾ bekoka Paskah sum delemak sok, numbabya delemnemab. Youmaʾ malya unaʾ anaso welenaʾ makoka denggulumnemab. Hyak eldaknenggulumla perob unaʾ roti ok delemnemab. Anasa, sununaʾ ara an lebsin.

⁹ Nadya men beiyisisa momnya donaʾ lomok sam ara lesedya, ”Ugunda gela salanaʾ hwam ok ulumak nang eb dara, neikaʾ hiboka unaʾ ara mem,” amsa.

¹⁰ Ban nadya wenyasenya nera, anyagan soko nim era, gela salanaʾ hwam nang hnon, hmabaʾ ganya bolomak nimi hnon, sondaʾ anasa meka lelewoka lelemak nimi hnon, bisaʾ ak molowoka giblemak nimi hnon, nenyek gobdo bokdangoka ulumnalum aboka, lebnenggubsa. Nera orok! Ugunja nim enyek malya ululum nim aboka, gobdo mok nenewanasom dara, wera ugumbabya sokok an unaʾ loboka yibinesom bok,

¹¹ alda nadya lebsenya nera damok ara, ban nenesa lemsa. Alda sondaʾ anasa, nara Imik Neyung yuba donya aldalaladyok, onoʾ gela salanaʾ ganya hnon, hmabaʾ un ganya hnon, bisaʾ ak giboka, yok nanga salyaʾ miniwoka leboka, ganya uu alasil meka deregoka, meka lelewoka hokaʾ donaʾanya ululadyok anasa, ugunublaboka ubmunuk aboka, yuba sekleng sok lemsa. Sikeneb neikaʾ seʾ bukoka denaʾ anaba, hyak mem nong!

^12-13 Imik Neyung yuba donggulumak nimi malya unaʾ enesa dara, nadya yana lelen dara, narinya gomaʾ, unuwanggunusinya. Nenyek Imik Neyung adya sikba eimik enyek, yana lelewanesil. Bok, ugunub neikaʾ yuba dololum nim era, ugunja dara, sikenek yana lelewanggunusom de? Alkitab bukuk sam seleb momnya dobokaʾ ara, Malya unaʾ hwam ok ulumak nim era, ugun gangganek sam ab yaklulum, ara dobokaʾ anasa lebsin.