ZAKHARIA 5 - KITTA KAREBA MADECENG

Pakkitang passalenna karettasa rilulung iya luttué

¹ Upénessaisi paimeng, na iya sisengngé uwitai séddi kitta rilulung luttu ri yelle'é.

² Iyaro malaéka'é nakkutangngi aga uwita. Pappébalikku, “Séddi kitta rilulung luttu ri yelle'é. Lampéna aséra météré sibawa sakkana eppa sitengnga météré.”

³ Nainappa makkutana lao ri iyya, “Ri kitta lulungngéro tarokii tanroé lao ri sininna wanuwaéwé. Ri leppang yolona tarokii makkedaé tungke' pangaé ripassui matu polé ri wanuwaéwé. Na ri leppang lainna tarokii makkedaé tungke' tau iya mattanro bellé-bellé ripassu towi matu.

⁴ Makkedai Puwang Iya Pommakuwasaé makkedaé iyaro tanroé napatakkennai matu ri yasé'na bolana tungke' pangaé sibawa bolana tungke' tau iya mattanro bellé-bellé. Iyaro sining bolaé nakennai matu matteru-teru iyaro tanroé narapi mancaji ruttungeng.”

Pakkitang passalenna makkunraié ri laleng bakaé

⁵ Momposi iyaro malaéka'é sibawa makkeda, “Itai! Engkasi polé!”

⁶ Pakkutanaku, “Aga iyaro?” Pappébalinna, “Séddi baka. Iyanaro lambanna dosaé polé ri sininna wanuwaé.”

⁷ Iyaro bakaé mappunnaiwi pattongko polé ri tumeraé. Ri wettu upénessainna, tarakkani iyaro pattongkoé na annessana ri laleng bakaéro tudangngi séddi makkunrai.

⁸ Makkedai iyaro malaéka'é, “Iyaé makkunraié napulambangngi jaé.” Nainappa natenre paimeng iyaro makkunraié ri laleng bakaé nanatongkoi iyaro bakaé.

⁹ Makkitaka ri yasé nauwitai duwa makkunrai luttu lao ri iyya. Mappunnaiwi mennang panni iya masse'é pada-pada panni coko'é. Nalai mennang bakaé onna nanatiwii mennang luttu.

¹⁰ Makkutanaka lao ri malaéka'éro, “Kégai mennang natiwi iyaro bakaé?”

¹¹ Pappébalinna, “Ri Babél, kuwaniro mennang maélo patettong bola déwata untu' aléna. Rékko tépuni iyaro bola déwataé, nataroni iyaro bakaé kuwaro untu' nasompa.”