ZAKHARIA 14 - KITTA KAREBA MADECENG

Yérusalém sibawa bangsa-bangsaé

¹ Esso angadélékenna Puwangnge macawé'ni. Narirampo'i matu Yérusalém, sibawa ritawa-tawai matu wassélé'na ri yolona matammu.

² Napaddeppungengngi matu Puwangnge sininna bangsaé untu' gasai Yérusalém. Risittaiwi matu iyaro kotaé, rirampo'i sining bolana, sibawa rikédo salaiwi sining makkunrainna. Sitengnga polé ri pabbanuwana ritiwii matu ri appalirengngé, iyakiya lebbinna monroi matu ri kotaéro.

³ Nainappa malluru matu Puwangnge sibawa mammusu méwai bangsa-bangsaéro, pada-pada iya Napogau'é ri wettu riyolo.

⁴ Iyaro essoé tettongngi matu ri Bulu-bulu Zaitun, ri seddé alauna Yérusalém. Naripuwé matu Bulu-bulu Zaitun ri lompo iya malowangngé, mappammulai ri alau lettu ri yajang. Sitengngana polé ri bulu-buluéro kédoi matu lao ri manorang, na sitengnganasi liyattangngi.

⁵ Lariko matu molai lompo iya bagééngngi iyaro bulu-bulué mancaji duwa. Lariko matu pada-pada néné-nénému wettunna kajajiyang tatténréng tanaé ri wettu apparéntanna Uzia, arunna Yéhuda. Nanapoléna Puwang Allataalaku, ritinrosi ri sininna malaéka'é.

⁶ Rékko narapini iyaro essoé, dé'na gaga matu hawa keccé iyaré'ga ése.

⁷ Iyaro essoé dé'na gaga apettangeng. Tette'i matu matajang essoé, makkuwatoro ri wennié. Iyakiya banna Puwangnge missengngi uppanna narapi iyaro essoé.

⁸ Iyaro essoé, massolo'i matu uwai matakkaé polé ri Yérusalém; sitengngana polé ri uwaiéro mattujui matu lao ri Tasi Maté sibawa sitengnganasi lao ri Tasi Tengngaé. Iyaro uwaié massolo'i sillampé taungngé, muwi ri wettu bosié iyaré'ga ri wettu tikkaé.

⁹ Namapparénta matu Puwangnge selaku arung ri sininna linoé; tungke' tauwé nasompai matu Aléna selaku Allataala nenniya missengngi sibawa aseng iya padaé.

¹⁰ Sininna wanuwaé polé ri Géba ri manorang lettu ri Rimon ri yattang, mancajiwi matu tanété. Iyakiya Yérusalém maccaloli'i matu matanré, lebbi matanréi naiya tanaé ri seddéna; iyaro kotaé mallowangngi matu polé ri Pintu Gerbang Bényamin lettu ri Pintu Gerbang Sunna, iyanaritu onronna Pintu Gerbang Mammulangngé sibawa polé ri Manara Hananél lettu ri onrong apparakeng anggoro appunnangenna arungngé.

¹¹ Monroi matu sining tauwé sibawa amang ri kotaéro, tenriyancang abinasanna.

¹² Papoléi matu Puwangnge lasa iya mappakatau-taué ri yasé'na sininna bangsa iya puraé mammusu méwai Yérusalém. Mata sibawa lilana mennang, mala sininna tubunna mennang makebbongngi matu ri wettu tuwona mupa.

¹³ Iyaro essoé naébbui matu Puwangnge iyaro bangsa-bangsaé malippu senna sibawa métau angkanna tungke' tauwé natikkengngi matu silaonna iya engkaé ri seddéna nanagasai.

¹⁴ Mammusui matu sining tau worowané ri Yéhuda untu' méwaiwi Yérusalém. Selaku barang rirappa nalai matu mennang sininna waramparanna bangsa-bangsaé ri seddéna maddupa ulaweng, péra' sibawa pakéyang massusus-susung.

¹⁵ Séuwato lasa iya maseroé kennai matu anyarangngé, bagal-é, untaé sibawa kaleddé'é, enrengngé sininna olokolo'é ri akkémanna balié.

¹⁶ Nainappa sininna tau iya tuwoé mupa ri yelle'na bangsa-bangsa iya gasaéngngi Yérusalém, laowi matu ri kotaéro untu' sompai Arungngé, Puwang Iya Pommakuwasaé, sibawa untu' pakarajai Pésta Kalampang Daud-daungngé.

¹⁷ Narékko engka bangsa iya dé'é namaélo lao ri Yérusalém untu' sompai Arungngé, Puwang Iya Pommakuwasaé, dé' nateppa bosié ri wanuwanna.

¹⁸ Sibawa rékko dé' namaélo tau Maséré'é pakarajai Pésta Kalampang Daud-daungngé, nakenna towi matu mennang lasa iya napapolé Puwangnge ri yasé'na tungke' bangsa iya dé'é namaélo lao massompa.

¹⁹ Iyanaro pahukkungeng untu' Maséré sibawa untu' sininna bangsa iya dé'é namaélo pakarajai Pésta Kalampang Daud-daungngé.

²⁰ Iyaro essoé garéncang-garéncangngé ri pakéyanna anyarangngé risobbi'i matu sibawa ada-ada “Ripallaingngi untu' Puwangnge”. Panci-pancié ri Bolana Puwangnge riyangke'i matu pada-pada mangko-mangko pakkasuwiyangngé ri yolona mézbaé.

²¹ Sininna pancié ri Yérusalém sibawa risininna Yéhuda ripallaingngi matu mancaji appunnangenna Puwang Iya Pommakuwasaé. Pabbanuwa iya makkasuwiyangengngé akkarobangeng napakéi matu untu' masséwong juku pakkasuwiyang. Narékko narapini iyaro wettué, dé'na gaga matu padangkang ri Bolana Puwang Iya Pommakuwasaé.