ZAKHARIA 13 - KITTA KAREBA MADECENG

¹ Makkedai Puwang Iya Pommakuwasaé, “Iyaro essoé jompii matu séddi mata uwai untu' paccingiwi wijanna Daud sibawa pabbanuwana Yérusalém polé ri dosana nenniya assompang barahala iya puraé napogau' mennang.

² Iyaro essoé Uleddai matu asenna barahala-barahala polé ri tanaéwé, angkanna dé' muwi séddi tau méngngerangngi. Sininna tau iya mangakué aléna nabi Urukkai matu silaong mennang iya tama-tamangngé roh iya macéko-cékoé.

³ Narékko engka mupa tau makkeda makkedaé palettu'i paseng, ambo' indo'na muto powadangngi matu makkedaé harusu'i rihukkung maté, saba' iya napowadaé iyanaritu bellé. Rékko tette'i nangakui aléna selaku nabito, rigajangngi matu gangka maté ri ambo'na sibawa indo'na muto.

⁴ Iyaro essoé, masirii matu sining nabié untu' tinda pada-pada nabié. Dé' matu mennang napakéi pakéyang nabié untu' mabbellé sibawa mattempowangngi sining pakkitanna.

⁵ Sibalé'na, makkedai matu mennang, ‘Tenniyaka nabi. Banna séddika patani iya mappallaungngé ri dare'é gangka tuwoku.’

⁶ Sibawa rékko makkutanai tauwé ri aléna, ‘Lo aga iya engkaé ri aromuro?’, mappébaliwi matu, ‘Nakennaka iyaro loé ri bolana sellaoku.’ ”

Parénta untu' mpunoi pakkampi iya nasuroé Allataala

⁷ Makkedai Puwang Iya Pommakuwasaé, “Tokkonno, éh peddang, sibawa gasani pakkampi iya mappallaungengngék-Ka! Unoi, natassiya-siya matu sining bimbala'é. Maélo-Ka gasai umma'-Ku,

⁸ sibawa ri sininna wanuwa duwapattellunna polé ri pabbanuwana maté matu.

⁹ Banna tawa tellunna salama matu. Na-Upaccingiwi matu mennanro pada-pada péra'é ripépaccingi ri apié. Uwojiwi matu mennang pada-pada tauwé moji ulaweng. Nainappa mennang massempajangngi matu lao ri Iyya, na-Ubaliwi matu mennang. Upowadai matu lao ri mennang makkedaé mennang iyanaritu umma'-Ku, sibawa mangaku towi matu mennang makkedaé Iyya ritu Puwang Allataalana.”