ZAKHARIA 12 - KITTA KAREBA MADECENG

Ripassalama'i matu Yérusalém

¹ Iyanaé pasenna Puwangnge passalenna Israélié. Puwang iya pallebba'éngngi langié, pancajiwi linoé enrengngé mabbéré atuwong lao ri tolinoé, makkeda,

² “Uwébbui matu Yérusalém pada-pada énungeng mallise'é anggoro; wanuwa-wanuwa sideppéna ménungngi matu natassulus-sulung pada-pada tau mabo'é. Sibawa rékko rikeppungngi Yérusalém, kota-kotaé ri wanuwa Yéhuda iya monroé mupa, rikeppung towi matu.

³ Iyakiya rékko narapini iyaro essoé, Uwébbui matu Yérusalém pada-pada batu iya matane'é; muwi bangsa niga iya cobaéngngi makkai lolongetto matu acilakang. Masséddiwi matu sininna bangsaé untu' gasai Yérusalém.

⁴ Iyaro essoé sininna anyarangngé Uwébbui malippu sibawa sining pakkinnyaranna Upajangengngi, Ujagaiwi matu pabbanuwana Yéhuda, iyakiya sininna anyaranna balinna Upabutai.

⁵ Nainappa makkedai matu ri laleng ati kaluwarga-kaluwarga Yéhudaé, ‘Puwang Iya Pommakuwasaé ritu iya mabbéré awatangeng lao ri umma'-Na iya monroé ri Yérusalém.’

⁶ Iyaro essoé Upancajiwi matu kaluwarga-kaluwarga Yéhudaé pada-pada apié ri laleng goppo aju tunungngé iyaré'ga sulo malluwa'é ri yawana wessé-wessé gandongngé; napabbinasai matu mennang bangsa-bangsaé ri mattulilinna. Iyakiya pabbanuwana Yérusalém tette'i matu monro ri laleng kotaé sibawa amang.

⁷ Iyya, Puwang, bunge'-bunge' mabbéré matu apakalang lao ri tentarana Yéhuda, kuwammengngi alebbireng iya natarimaé wijanna Daud enrengngé pabbanuwana Yérusalém dé' napakacauriwi alebbireng iya natarimaé pabbanuwana Yéhuda laingngé.

⁸ Iyaro essoé Ulinrungiwi matu pabbanuwana Yérusalém; sibawa muwi iya kaminang malemmaé ri yelle'na mennang mancajiwi matu pada watanna Daud. Ripimpingngi matu mennang ri wijanna Daud pada-pada malaéka'-Ku, mala pada-pada-Ka.

⁹ Iyaro essoé Upabbinasai matu tungke' bangsa iya cobaéngngi gasai Yérusalém.

¹⁰ Nainappa wija-wijanna Daud enrengngé pabbanuwana Yérusalém Uwéréngngi matu ati iya pojiyéngngi mamasé sibawa pojiyéngngi massempajang. Naitai matu mennang iya puraé nagajang mennang sibawa mpatingiwi pada-pada tau mpatingiyéngngi amaténna ana' tungke'na. Mpatingngi matu mennang sibawa mamasé, pada-pada tau iya ateddéngengngénna ana' macowa.

¹¹ Iyaro essoé engka matu mpatingeng masero ri Yérusalém, pada-pada mpatingengngé untu' Hadad-Rimon ri Lompo Megido.

^12-14 Nainappa tungke' kaluwargaé ri wanuwaéro mpatingngi matu tasséddi-séddi; kaluwarga wijanna Daud, kaluwarga wijanna Natan, kaluwarga wijanna Léwi, kaluwarga wijanna Siméi, sibawa sininna kaluwarga laingngé. Tungke' kaluwarga mpatingngi matu riyalé-alé, sibawa sining tau worowané polé ri tungke' kaluwargaé mpatingngi matu mallaing polé risining makkunraié.”