YOSUA 7 - KITTA KAREBA MADECENG

Madosana Akhan

¹ Puwangnge pura mapparéntangngi lao ri umma Israélié makkedaé polé risininna séuwa-séuwaé ri kota Yérikho harusu'i ripaccappu, muwi séddi dé'to wedding riyala. Iyakiya iyaro paréntaé dé' naturusiwi. Séddi tau worowané riyaseng Akhan majjalékkaiwi iyaro paréntaé, angkanna macai senna Puwangnge lao ri umma Israélié. (Ambo'na Akhan riyasengngi Karmi sibawa nénéna riyasengngi Zabdi polé ri appang Zéra ri laleng suku Yéhuda.)

² Iyaro wettué suroni Yosua siyagangngaré tau polé ri Yérikho lao ri Ai, iyanaritu séddi kota ri seddé alauna Bétel, seddéna Bét-Awen. Iyaro sining tauwé risuroi untu' lao salidikiwi daéraéro. Puranana mennang napogau' iyaro risurowangngéngngi,

³ lisuni sibawa laporo'i ri Yosua. Makkedai mennang, “Dé'é naparelluki lao maneng gasai Ai. Suroni bawang kira-kira duwa iyaré'ga tellussebbu tau. Aja' musuro manengngi tentaraé lao kuwaro untu' mammusu, nasaba iyaro kotaé baiccu'mi.”

⁴ Jaji iya laowé gasai iyaro kotaé banna tellussebbu tau, iyakiya ripasoroi mennang.

⁵ Sining tau Aié lellungngi mennang polé ri pintu gerbanna kota Ai lettu ri daéra attambangengngé, nainappa nauno kira-kira telluppulo enneng tau polé ri yelle'na mennang ri émpenna bulu-bulué. Nabata-batana sibawa métauni sining tau Israélié.

⁶ Messé senna'ni Yosua sibawa sining pamimpinna bangsa Israélié angkanna nasapé-sapé mennang pakéyanna, sibawa puppu esso narapi wenni suju'i mennang ri yolona Petti Assijancinna Puwangnge sibawa taroiwi awu ulunna mennang selaku tanrang messé babuwa.

⁷ Makkedani Yosua lao ri Puwangnge, “Oh Allataala, Puwak-ku! Untu' aga Mutiwiki lettu ri liwenna Salo Yordan? Aga untu' mabbéréyakki lao risining tau Amorié? Kuwammengngi tamaté? Lebbi kessing muwi monroki bawang kuwaro, ri liwenna Yordan!

⁸ Oh Puwang! Ripasoroni sining tau Israélié ri balié. Aga harusu upowada makkekkuwangngé?

⁹ Naéngkalingai matu tau Kanaangngé sibawa sininna tau laingngé ri daéraéwé passalenna gau'éro. Nakeppukki matu mennang sibawa nauno manekki! Na agana harusu Upogau' matu untu' mattahangengngi alebbirem-Mu?”

¹⁰ Nabalini Puwangnge Yosua, “Oto'no! Dé'gaga gunana suju'ko pada-padaéro ri tanaé!

¹¹ Purai pogau' dosa tau Israélié. Purai Uwapparéntang kuwammengngi naturusiwi mennang assijancinna sibawa Iyya, iyakiya najjalékkaiwi mennang! Barab-barang iya harusu'é riyancuru naalai mennang. Ménnauwi mennang sibawa nasubbui ri yelle'na barab-baranna mennang kuwammengngi dé' nakaissengeng.

¹² Iyanaro saba'na dé' naulléi mennang mattahang moloiwi balié. Ripasoroi mennang ri balié nasaba aléna mennang pura ripateppai pahukkungeng untu' ripaccappu. Dé'na umaélo ranrekko, rékko barab-barang iya dé'é nawedding riyalaro dé'pa nariyancuru.

¹³ Oto'no makkekkuwangngé, Yosua! Paccingiwi umma Israélié sibawa suroi mennang sadiya untu' mangolo ri Iyya. Paréntangngi mennang untu' sadiya-sadiya baja, saba' Iyya Puwang Allataalana Israélié maélo powadai iyaé lao ri mennang: ‘Eh sining tau Israélié! Barab-barang iya puraé Uparéntakko untu' riyancuru, engkai sibagiyang ri iko. Ri wettu dé'napa muwabbéyangngi iyaro barab-barangngé, dé' mulléi matu mattahang méwai balié!’

¹⁴ Rimakkuwannanaro, Yosua, paissengiwi mennang makkedaé baja éléé maéloi riparéssa sininna sukué. Rékko Ujello'i séddié suku, sininna appangngé ri laleng sukuéro harusu'i malluru tassiappang-tassiappang. Sibawa rékko Ujello'i séddié appang, sininna kaluwargaé ri laleng appangngéro harusu'i malluru tassikaluwarga-tassikaluwarga. Nainappa rékko Ujello'i séddi kaluwarga, tungke tau ri laleng kaluwargaéro harusu'i malluru tasséddi-séddi.

¹⁵ Nainappa tau iya rijello'é sibawa taroéngngi barab-barang iya riyattéyangngéro harusu'i ritunu gangka cappu silaong sibawa kaluwargana enrengngé sininna séuwa-séuwa iya nappunnangiyé; nasaba aléna majjalékkaiwi assijancingngé sibawa pogau'i ja battowaé ri tengnga-tengngana umma Israélié.”

¹⁶ Bajanana, maélé senna'ni Yosua suroi umma Israélié malluru liyolo, tassisuku-tassisuku, na sukunna Yéhuda nakenna.

¹⁷ Nainappana nasuro Yosua suku Yéhuda malluru liyolo, tassiappang-tassiappang, na appanna Zéra nakenna. Nainappa appanna Zéra risuro malluru liyolo, tassikaluwarga-tassikaluwarga, na kaluwargana Zabdi nakenna.

¹⁸ Purairo nasuroni Yosua kaluwargana Zabdi malluru liyolo, tasséddi-séddi; na Akhan, ana' Karmi, eppona Zabdi nakenna.

¹⁹ Nakkeda Yosua lao ri Akhan, “Ana'ku, akuini sibawa powadani terus terang kuwaé ri yolona Puwangnge, Allataalana Israélié, aga pura mupogau'. Paissengika, aja' musubbui.”

²⁰ Nakkeda Akhan, “Tongeng, puraka pogau' dosa lao ri Puwangnge, Allataalana Israélié. Iyanaé iya upogau'é:

²¹ Ri yelle'na barab-barang iya tasittaiyé, uwitai silampa jumba iya makessing senna'é, ébbu Babilonia, makkuwatoro péra' kira-kira duwa kilo, sibawa sibatang ulaweng sitengnga kilo lebbi. Uwacinnai senna'i iyaro barab-barangngé, nauwalani sibawa usubbui ri laleng tanaé ri kémaku; péra'na engkai mariyawa senna.”

²² Nainappa Yosua kiring tau mapperi-peri lao ri kémana Akhan. Nalolongenni iyaro barab-barang riyattéyangngé engka manengngi kuwaro, nasubbu ri laleng tanaé, sibawa péra'na nataroi mariyawa senna.

²³ Nalani mennang iyaro barab-barangngé nanatiwii lao ri Yosua sibawa sininna tau Israélié. Nainappa iyaro barab-barangngé napalénne ri yolona Puwangnge.

²⁴ Nainappa Yosua sibawa sininna umma Israélié tikkengngi Akhan, nanatiwii ri Lompo Asussangngé silaong iya maneng ana'na, olokolo sapinna, kaleddé'na, bimbala'na, kémana, sibawa sininna séuwa-séuwaé iya nappunnangiyé nenniya péra', jumba sibawa ulaweng iya naénnauwéro.

²⁵ Nainappa makkeda Yosua lao ri Akhan, “Magi mupapoléngekki asussang? Makkekkuwangngé Puwangnge maélo papoléngekko asussang!” Narigenrunna batu Akhan silaong kaluwargana gangka maté ri sininna tau Israélié. Sininna waramparang appunnangenna sibawa topa barab-barang naénnauwé ritunui gangka cappu.

²⁶ Purairo natémpunni mennang iyaro onrongngé sibawa maéga senna batu iya lettu'é essoéwé engka mupi kuwaro. Iyanaro saba'na nariyaseng mupi iyaro onrongngé Lompo Asussang. Nasorona caina Puwangnge.