YOSUA 6 - KITTA KAREBA MADECENG

Sempé'na Yérikho

¹ Ri kota Yérikho rijagai senna'ni pintu-pintu gerbanna sibawa ritongko rape-rape kuwammengngi dé' naulléi muttama tau Israélié. Dé' muwi séddi ripalalo muttama iyaré'ga massu ri kotaéro.

² Makkedai Puwangnge lao ri Yosua, “Makkekkuwangngé Uwérékko Yérikho sibawa arunna nenniya sininna tentarana iya barani-baraniéro.

³ Iko sibawa tentaramu harusu'ko mabbarisi mattulilingiwi kotaéro siseng siesso ri laleng enneng esso ittana.

⁴ Pitu tau imang, tungke-tungke tiwi tarompé, harusu joppa ri yolona Petti Assijancingngé. Ri esso mapitué, iko sibawa tentaramu harusu mattulilingiwi kotaéro wékkapitu nasining imangngé seppungngi tarompé'na.

⁵ Nainappa iyaro imang-ngimangngé harusu'i seppungngi tarompé'na sibawa oni iya malampéé. Muwéngkalingana oni iya malampééro, sininna tentaraé harusu'i marukka sibawa gora, namaruttung matu iyaro témbo'na kotaé. Nainappa iko maneng harusu matteru muttamakiwi kotaéro.”

⁶ Nanaobbini Yosua sining imangngé, sibawa makkeda, “Akkani iyaro Petti Assijancingngé; pitu tau polé ri yelle'mu harusu joppa ri yolona natiwito tarompé.”

⁷ Nainappa nasuro Yosua tentarana mabbarisi mattulilingiwi kotaéro, ripoddiyoloi ri barisi pengawal ri yoloé iya joppaé poddiyoloi Petti Assijancinna Puwangnge.

^8-9 Situru sibawa paréntana Yosua, joppani barisi pengawal riyoloé poddiyoloi imang-ngimang passeppung tarompé'é, riyaccowéri ri imang-ngimang mpulééngngi Petti Assijancingngé, nainappa ri paccappurenna barisi pengawal ri monrié. Ri wettunna mennang joppa napaoni towi matteru-teru tarompé'é.

¹⁰ Sininna tentaraé pura riparéntanni dé' nagora sibawa dé' namakkeda-ada muwi silappa rékko dé'pa nabbéré Yosua tanra-tanrang.

¹¹ Makkuwaniro Yosua suroi tentarana tiwii Petti Assijancingngé mattulilingiwi kotaéro wékkasiseng, nainappa lisu ri akkémangngé, sibawa mabbenni kuwaro.

^12-13 Bajana, maélé senna'ni moto Yosua nainappa untu' mabbékkaduwana sining imangngé sibawa tentaraé mabbarisi mattulilingiwi kotaéro ri laleng atturu-turuseng barisi pada-pada esso ri yolona: bunge-bunge'na barisi pengawal ri yoloé, nainappa iya pitu imang iya seppungngéngngi tarompé'é, riyaccinrolai ri imang-ngimang iya mpulééngngi Petti Assijancingngé, na paccappurenna barisi pengawal ri monrié. Na tarompé'é matteru-terui ripaoni.

¹⁴ Ri esso maduwaéro nattulilingini mennang kotaé wékkasiseng nainappa lisu ri akkémangngé. Makkuwaniro mennang napogau' esso-esso ittana enneng essona.

¹⁵ Ri esso mapitué maélé senna'ni mennang moto ri wettu nappa mompona essoé, nainappa mabbarisi wékkapitu mattulilingiwi iyaro kota Yérikho sibawa cara iya padaé. Banna ri esso iya mapituéro bawang, nattulilingiwi mennang iyaro kotaé wékkapitu.

¹⁶ Mabbékkapitunnana, naseppunna muwa sining imangngé tarompé'na, mabbéréni Yosua tanra-tanrang lao ri sininna pasukangngé untu' gora. Makkedai Yosua, “Puwangnge pura mabbéréyangngi iyaé lao ri iko!

¹⁷ Sininna kotaé sibawa sininna lise'na harusu'i ripaccappu siseng selaku pakkasuwiyang untu' Puwangnge. Banna Rahab, makkunrai cakkuribangngéro sibawa kaluwargana wedding rileppessang tuwo, nasaba purai natulung mata-matata.

¹⁸ Dé' nawedding mala muwi aga polé ri sininna iya harusu'é ripaccappu. Rékko muwalai, nakennai matu abala akkémanna Israélié.

¹⁹ Sininna barang péra'é, ulawengngé, tembagaé sibawa bessié harusu'i ripallaing untu' Puwangnge, sibawa ritaroi ri laleng onrong attarong waramparang appunnangenna Puwangnge.”

²⁰ Nainappa naseppung tarompé'na sining imangngé. Na naéngkalingana muwa sining tau Israélié oni tarompé'éro, gorani mennang siullé-ulléna, namaruttung témbo'na kota Yérikho. Matteruni ménré sininna tentaraé, nauttamakiwi kotaéro nanasittaiwi.

²¹ Sininna ri laleng kotaéro, macuwa malolo, worowané makkunrai, riyunoi sibawa peddang. Sininna olokolo sapingngé, bimbala'é sibawa kaleddé'é riyunoto.

²² Lao ri iya duwa tau iya puraé mancaji mata-mata, makkedani Yosua, “Laono ri bolana makkunrai cakkuribangngéro, namutiwii massu silaong kaluwargana pada-pada iya puraé mujancingngi.”

²³ Nanalaona iya duwa mata-mataéro, nanatiwii massu Rahab silaong ambo' indo'na, silessu-silessurenna, sibawa kaluwargana iya laingngé. Sininna kaluwargana Rahab sibawa ata-atanna ritiwini massu ri onrong iya amangngé ri seddéna akkémanna Israélié.

²⁴ Nainappa natunu gangka cappu tentara Israélié sininna kotaéro sibawa sininna iya engkaé ri lalenna, sangadinna barab-barang ulawengngé, péra'é, tembagaé sibawa bessié. Iyaro barab-barangngé nalai mennang nanatiwii ri onrong attaronna waramparang appunnangenna Puwangnge.

²⁵ Iyakiya Rahab makkunrai cakkuribangngéro sibawa sininna kaluwargana rileppessangngi tuwo ri Yosua, nasaba purai natulung iya duwa mata-mata iya nasuroé Yosua lao ri Yérikho. (Lettu essoéwé wija-wijanna Rahab engka mupa ri Israélié.)

²⁶ Iyaro wettué napassui Yosua iyaé pappésangkaé, “Nigi-nigi makkuraga patettongngi paimeng iyaé kota Yérikho, nakennai matu tanrona Puwangnge. Nigi-nigi pasangngi pandamenna teddéngngi matu ana' macowana; sibawa nigi-nigi pasangngi pintu-pintu gerbanna ateddéngengngi matu ana' malolona.”

²⁷ Puwangnge sibawangngi Yosua, natarompona asenna Yosua ri sininna wanuwaéro.