YOSUA 23 - KITTA KAREBA MADECENG

Pidatong assarangenna Yosua

¹ Maitta purana Puwangnge mpéréngngi atennangeng umma Israélié; dé'na mennang nariganggu ri ancamanna balié. Iyaro wettué macowa senna'ni Yosua.

² Nanaobbini sininna umma Israélié, makkuwatoro sining tomariyoloé, sining pamimpingngé, sining hakingngé, sibawa sining parawiraé, nanakkeda, “Makkekkuwangngé macowana.

³ Purani muwita sininna séuwa-séuwaé iya napogau'é Puwang Allataalamu lao ri sininna bangsaé kuwaé untu' iko. Iya mammusurengngékko iyanaritu Puwang Allataalamu muto.

⁴ Tanana bangsa-bangsaé iya monroé mupa, makkuwatoro tanana sininna bangsa iya ucauénna, iyanaritu tana iya mallebbangngé polé ri seddé alauna Salo Yordan matteru liyajang lettu ri Tasi Tengngaé, iya manennaro purani ubagéngeng untu' mancaji appunnangemmu.

⁵ Puwang Allataalamu mébbui matu bangsa-bangsaéro soro, sibawa lari polé ri iko rékko laoko musui mennang. Muwappunnaiwi matu wanuwanna mennang, pada-pada iya pura najjanciyangngé Puwang Allataalamu lao ri iko.

⁶ Rimakkuwannanaro, jagaiwi kuwammengngi muturusiwi sibawa pajoppai sininna iya tarokié ri laleng Kitta Hukkunna Musa. Aja' muwajjalékkaiwi muwi séddi polé ri hukkung-hukkungngéro.

⁷ Nanallalengiwi dé'na matu musicampuru sibawa bangsa-bangsa iya monroé mupa ri yelle'mu. Dé' mumaélo teppui matu asenna déwata-déwatana iyaré'ga mattanro ri laleng asengngéro. Makkuwatoro dé' mumassompa iyaré'ga suju' lao ri déwata-déwataéro.

⁸ Mala harusu'ko tette matinulu lao ri Puwangnge, pada-pada iya puraé mupogau' lettu makkekkuwangngé.

⁹ Bangsa-bangsa iya battowaé sibawa iya mawatangngé purani napaddésukekko Puwangnge; dé' muwi séddi polé ri mennang iya mullééngngi tahang méwako.

¹⁰ Tungke tau ri yelle'mu naulléi caui massebbu tau, nasaba Puwang Allataalamu iya mammusurengngékko, pada-pada iya pura Najjanciyangngé.

¹¹ Rimakkuwannanaro, éngngerangngi untu' mamaséiwi Puwang Allataalamu.

¹² Rékko dé' mumatinulu sibawa sicampuru'ko sibawa bangsa-bangsa iya monroé mupa ri yelle'mu, enrengngé kawikko sibawa mennang,

¹³ éngngerangngi, pasti Puwang Allataalamu dé' namaélo paddésukenno iyaro bangsaé. Sibalé'na, mabbahaya senna'i matu untu' iko, saba' mancajiwi matu mennang pada-pada siyo-siyoé iyaré'ga jebba'é untu' iko. Naébbu tokko matu mennang mapeddi senna; saba' mancajiwi matu mennang pada-pada pabbabbaé ri lekke'mu iyaré'ga pada-pada dorié ri laleng matammu. Mapeddiko matu matteru-teru narapi dé' muwi séddi tau ri yelle'mu iya monroé ri wanuwa iya makessingngéwé iya nawéréngngékko Puwang Allataalamu.

¹⁴ Makkekkuwangngé narapini wettunna matéka. Iko maneng, tungke-tungke missengngi makkedaé Puwang Allataalamu pura mpérékko sininna iya makessingngé iya Najjanciyangngé. Tungke jancin-Na purani Narupai, dé' muwi séddi iya dé'é.

¹⁵ Iyakiya pékkugiwi rupaiwi tungke jancin-Na lao ri iko, makkuwatoro pasti Napogau'i tungke ancaman-Na lao ri iko.

¹⁶ Rékko muwajjalékkaiwi assijancing iya puraé naparéntakko Puwang Allataalamu kuwammengngi nariturusi, na mulao massompa ri déwata-déwata laingngé enrengngé sompai déwata-déwataéro, macayii matu Puwangnge, sibawa hukkukko. Ri laleng wettu iya dé'é namaitta lennye manekko matu polé ri wanuwa iya makessingngéwé, iya nawéréngngékko Puwangnge.”