YOSUA 2 - KITTA KAREBA MADECENG

Surona Yosua mata-mata lao ri Yérikho

¹ Nainappa polé ri akkémangngé ri Sitim, suroni Yosua duwa tau mata-mata lao ri Kanaan. Iya duwa tauwéro riparéntang untu' salidikiwi wanuwa Kanaan sibawa massubbu-subbu, lebbi-lebbipi kota Yérikho. Nalaona mennang ri kotaéro, sibawa mappéruma ri bolana séddié makkunrai cakkuribang, riyaseng Rahab.

² Naéngkalingani arunna kota Yérikho makkedaé iyaro wennié engka tau Israél polé mata-mataiwi daéra Yérikho.

³ Nanasurona arungngé tau lao ri Rahab untu' palettu'i paréntaéwé, “Passui sining tau iya mappérumaé ri bola-bolaéro. Mata-mata mennang iyanaritu iya polé untu' salidikiwi sininna daéra Yérikho!”

^4-6 Nappébali Rahab, “Mémeng engka tau polé ri bolaku, iyakiya dé' uwissengngi polé kégi mennang. Laoni mennang onna wettunna mammula makalemmeng ri wettu dé'napa naritongko pintu gerbanna kotaé. Nadé' uwakkutana kégai mennang lao, iyakiya rékko masitta'ki lellungngi, naullé rirapi mupa.” (Padahal purani nasubbu Rahab iya duwa mata-mataéro ri yawana goppo ramié ri rakkiyang bolana.)

⁷ Nanajoppana sining surona arungngéro salaiwi kotaé. Engkanana mennang ri saliweng, risuluni gerbanna kotaé. Nasappani mennang iya duwa tau mata-mataéro lettu ri onrong alléttongngé ri Salo Yordan.

⁸ Iyaro wennié ri wettu dé'napa namatinro iya duwa tau mata-mata Israéliéro, laoni Rahab ri rakkiyangngé,

⁹ sibawa makkeda lao ri mennang, “Uwisseng Puwangnge pura mabbéréyangngi wanuwaéwé lao ri iko. Sininna tauwé kuwaé métau lao ri iko.

¹⁰ Purani riyéngkalinga karéba passalenna pékkugi Puwangnge pamettiwi Tasi Gelaga ri yolomu, wettummu salaiwi Maséré. Pura toni riyéngkalinga pékkugiko mpunoi Sihon sibawa Og, iya duwa arung bangsa Amoriéro ri seddé alauna Salo Yordan.

¹¹ Riyéngkalingana iyaro curita-curitaé, métau senna'ni. Sininna tautta teddénni abaraningenna nasaba iko. Puwang Allataalamu tongengngi Allataala Iya Pommakuwasaé ri langié sibawa ri tanaé.

^12-13 Mamménasaka maéloko mattanro ri laleng asen-Na makkedaé maéloko gaukengngi kaluwargaku sibawa makessing pada-pada iya puraé upogau' lao ri iko. Ajjancino makkedaé ambo' indo'ku, silessu-silessurekku, sibawa sininna kaluwargana mennang dé' muwunoi matu, sangadinna mulinrungiwi matu. Na untu' iyaro wérénni séuwa tanrang butti makkedaé weddikko uwatepperi!”

¹⁴ Namappébali iya duwa tauwéro, “Majjanciki makkedaé rékko nawérékki Puwangnge iyaé wanuwaé, maéloki gaukekko sibawa makessing, assaleng dé' mucuritai lao ri nigi-nigi passaletta. Leppessanni Puwangnge tanroiki rékko dé' tarupaiwi iyaro jancié.”

¹⁵ Nasaba bolana Rahab ripatettongngi ri témbo'na kotaé, nanapanonnoni Rahab iya duwa tauwéro sibawa tulu lalo ri tellongengngé.

¹⁶ Nakkeda Rahab lao ri mennang, “Laono ri daéra bulué, kuwammengngi sining tau iya nasuroé arungngé dé' naulléi tikkekko. Allekke'no kuwaro tellungngesso ittana narapi mennang lisu, nappako wedding patterui joppamu.”

¹⁷ Nakkeda iya duwa mata-mataéro lao ri Rahab, “Makessinni, maéloki rupaiwi janci iya puraé muwéllau ri idi.

¹⁸ Banna iyaé harusu mupogau'. Rékko rigasai wanuwammu matti, sitinajai tulu cella'éwé muwassiyoreng ri tellongengngéwé onronna mupanonnoki. Ambo' indo'mu, silessu-silessuremmu, sininna kaluwargana ambo'mu sitinajai mupaddeppungeng ri bolamué.

¹⁹ Rékko sala séddinna polé ri mennang massu polé ri bolaéwé namaté riyuno, amaténna iyanaritu asalanna muto; dé'na tamattanggung jawa ri gau'éro. Iyakiya rékko engka iya lolongengngé acilakang ri laleng bolaéwé, idi ritu mattanggung jawa.

²⁰ Sibalé'na, rékko muwappaissengekki lao riséddié tau, dé'na tatassiyo lao ri janci iya puraé muwéllau polé ri idi.”

²¹ Nasitujuini Rahab gau'éro nanaleppessangngi mennang lao. Nainappa nassiyoreng iyaro tulu cella'é ri tellongenna.

²² Nanalaona iya duwa tau mata-mataéro ri daéra bulué sibawa massubbu kuwaro. Tellungngesso ittana sining surona arungngé sappai mennang kégi-kégi risininna daéraéro, iyakiya dé' nalolongengngi mennang. Angkanna lisu iyaro sining suroé ri Yérikho.

²³ Nainappa iya duwa tau mata-mata Israéliéro nonno polé ri bulué nanalléttoiwi saloé, nainappa lisu lao ri Yosua. Sininna pangalamanna mennang, nalaporo'ni mennang lao ri aléna.

²⁴ Nainappa makkeda, “Pasti nabbéréyang Puwangnge sininna tanaéro lao ri idi; sininna tauwé kuwaro métau lao ri idi.”