YOHANES 8 - KITTA KAREBA MADECENG

¹ Iyakiya laowi Yésus ri Bulu-bulu Zaitun.

² Pappa bajanana maélé senna'ni laosi ri Bolana Allataala, namaéga tau lao ri Aléna. Tudanni Yésus, nappammula paggurui mennang.

³ Na iyaro wettué, guru-guru agamaé sibawa sining tau Farisié natiwini ri Yésus séddi makkunrai iya napoléiyé malaweng. Nasuroni mennang iyaro makkunraié tettong ri tengnga-tengnga,

⁴ nainappa makkeda ri Yésus, “Bapa' Guru, iyaé makkunraié ripoléiwi malaweng.

⁵ Ri laleng Hukkunna Musa engka peraturang makkedaé, makkunrai makkuwaéwé harusu'i rigenrung batu gangka maté. Pékkugi pallolongenna Bapa'?”

⁶ Makkutana makkuwairo mennang untu' palaiwi siyo-siyo Yésus, kuwammengngi weddingngi mennang passalai. Iyakiya cuku' bawammi Yésus, nanaroki sibawa liman-Na ri tanaé.

⁷ Wettunna mennang maddessa matteru, congani nakkeda lao ri mennang, “Tau iya dé'é nappunnai dosa ri yelle'mu, iyanaritu bunge' genrungngi batu iyaro makkunraié.”

⁸ Purairo cuku'ni Yésus paimeng marokisi ri tanaé.

⁹ Naéngkalingana Yésus makkeda makkuwaro, laoni mennang tasséddi-séddi nasalaiwi onrongngéro, mammulai ri iya macowaé. Angkanna Yésus mani alé-aléna monro kuwaro sibawa iyaro makkunraié tettong mupi ri onronna.

¹⁰ Nanacongana Yésus sibawa nakkeda lao ri makkunraiéro, “Kéga manenni mennang? Dé'ga gaga hukkukko?”

¹¹ Nappébali, “Dé'gaga Pa'.” Nakkeda Yésus, “Madécénni, Iyya dé'to uhukkukko. Laono makkekkuwangngé, aja' mumadosa paimeng.”]

Yésus tajanna linoé

¹² Nabbicarasi Yésus lao ri tau maégaé, adan-Na, “Iyya'naé tajanna linoé. Tau iya maccowériyék-Ka dé' matu najoppa ri laleng pettangngé, iyakiya nappunnangiwi tajanna atuwongngé.”

¹³ Nakkeda sining tau Farisiéro lao ri Yésus, “Makkekkuwangngé mabbéréko asabbiyang passalenna alému. Iyaro asabbiyam-Mu dé' natongeng.”

¹⁴ Nappébali Yésus, “Namuni mabbéré-Ka asabbiyang passalenna alé-Ku, iyaro asabbiyak-Ku tongengngi; saba' Uwisseng kéga-Ka polé sibawa kéga-Ka maélo lao. Dé' muwissengngi kéga-Ka polé sibawa kéga-Ka lao.

¹⁵ Iko muwadélékiwi tauwé sibawa cara tolino; na Iyya dé' Uwadélékiwi muwi séddi tau.

¹⁶ Iyakiya ébara'na Uwadélékiwi tauwé, apettuk-Ku adélé'i saba' tenniya-Ka alé-alé-Ku; Ambo' iya suroék-Ka engkai sibawak-Ka.

¹⁷ Ri laleng Hukkunna Musa tarokii makkuwaé: Asabbiyang tongengngé iyanaritu asabbiyang iya polé ri duwa tau.

¹⁸ Iya mabbéré asabbiyang passalenna alé-Ku engka duwa – Iyya sibawa Ambo' iya suroék-Ka.”

¹⁹ Nakkeda mennang, “Kégani Ambo'-Muro?” Nappébali Yésus, “Iko dé' muwissek-Ka sibawa Ambo'-Ku. Akkalarapanna muwissek-Ka, pasti muwisseng towi Ambo'-Ku.”

²⁰ Iya manennaro napowadai Yésus wettunna mappagguru ri Bolana Allataala ri seddéna petti-petti dowi pakkasuwiyangengngé. Iyakiya dé' muwi séddi tau tikkengngi, saba' dé'pa narapii wettunna.

Ri onrong Ulaoiyé dé' mulléi lao

²¹ Makkedasi Yésus lao ri mennang, “Maélo-Ka lao, namusappa-Ka matu, iyakiya matéko matu ri laleng dosa-dosamu. Ri onrong Ulaoiyé, dé' mulléi lao.”

²² Nakkeda sining panguwasana Yahudié, “Naullé kapang maéloi mpunoi Aléna, saba' makkedai, ‘Ri onrong Ulaoiyé dé' mulléi lao.’ ”

²³ Nakkeda Yésus lao ri mennang, “Iko polé ri yawako; iyakiya Iyya polé ri yasé'ka. Iko polé ri linoé; Iyya dé' upolé ri linoé.

²⁴ Iyanaro saba'na Uwakkeda lao ri iko, makkedaé matéko matu ri laleng dosa-dosamu. Namémeng matéko matu ri laleng dosa-dosamu, rékko dé' mumateppe makkedaé ‘Iyya'na iya riteppué IYYA ENGKA.’ ”

²⁵ Nakkutana mennang, “Niga sitonget-tongenna iko?” Nappébali Yésus, “Untu' aga mabbicarasi sibawa iko!

²⁶ Maéga mupa passaleng iya maéloé Upowada sibawa madéléki. Iyakiya iya suroék-Ka wedding riyatepperi. Na Iyya paissengiwi linoé aga Uwéngkalinga polé ri Aléna.”

²⁷ Dé' napahangngi mennang makkedaé mabbicarai lao ri mennang passalenna Ambo'é.

²⁸ Rimakkuwannanaro makkedai Yésus lao ri mennang, “Matu rékko purani mupakalebbi Ana'na Tolinoé, muwissenni matu makkedaé ‘Iyya'naé iya riteppué IYYA ENGKA’, sibawa muwisseng toni matu makkedaé dé' séddi iya Upogau'é polé ri alé-Ku. Iya bawang Upowada iya napagguruwangngékka Ambo'é.

²⁹ Naiya suroék-Ka engkai sibawak-Ka. Dé' naengka naleppessakka alé-aléku, saba' tuli upogau'i iya pésennangiyéngngi atinna.”

³⁰ Purana napowada Yésus iya manennaro, maégani tau mateppe' ri aléna.

Atongengengngé paleppe'ko

³¹ Nainappa Yésus mabbicara lao risining tau Yahudié iya mateppe'énna ri Aléna, “Rékko tuwoko situru pappagguruwakku, tonget-tongennotu maccowé ri Iyya,

³² namuwissennitu Allataala iya tongengngé, narimakkuwannanaro ripamaradékako matu.”

³³ Nakkeda mennang, “Idi'é wijannaki Abraham. Dé'pa taengka tancaji atanna niga-niga! Aga akkatta-Mu namuwakkeda, ‘Ripamaradékako matu’?”

³⁴ Nakkeda Yésus lao ri mennang, “Tongeng senna' adak-Kué. Tau pogau'é dosa iyanaritu atannai dosaé.

³⁵ Na séddié ata dé' nappunnai onrong iya mattette'é ri laleng kaluwargaé, na ana'é mappunnaiwi onrong lettu mannennungeng ri laleng kaluwargaé.

³⁶ Rimakkuwannanaro, rékko Ana'é pamaradékako, maradéka' tongennotu.

³⁷ Mémeng Uwissekko wija-wijanna Abraham. Iyakiya maéloko mpuno-Ka, nasaba dé' mumaélo tarimai pappagguruwak-Ku.

³⁸ Aga iya Uwitaé ri Ambo'-Ku, iyanaritu Upowada. Na iko mupogau'i aga iya nappagguruwangngé ambo'mu ri iko.”

³⁹ Nappébali mennang, “Ambo'ta iyanaritu Abraham.” Nakkeda Yésus, “Ebara'na tonget-tongekko ana'na Abraham, pastini mupogau'i iya napogau'é Abraham.

⁴⁰ Upalettukekko atongengeng iya Uwéngkalingaé polé ri Allataala, iyakiya iko maéloko mpuno-Ka. Abraham dé' napogau'i makkuwaéro!

⁴¹ Iko mupogau'i aga iya napogau'é ambo'mu.” Nappébali mennang, “Tenniyaki ana'-ana' harang. Séddimi bawang Ambo'ta, iyanaritu Allataala.”

⁴² Nakkeda Yésus lao ri mennang, “Akkalarapanna iyaro Allataala Ambo'mu, muwamaséi-Ka matu, saba' polé-Ka ri Allataala. Dé' Upolé sibawa élo ri aléku, iyakiya Aléna ritu iya suroék-Ka.

⁴³ Aga saba'na dé' mupahangngi aga iya Upowadaé? Saba' dé' mutahang méngkalingai pappagguruwak-Ku.

⁴⁴ Ibillisi' ritu ambo'mu. Pammulanna mupa na iyaro Ibillisi' pabbuno. Dé' naengka naccowé ri atongengengngé, saba' dé' atongengeng ri aléna. Rékko mabbelléi, mémeng sitinaja, saba' makkuwa mémenro sipa'na. Pabbelléngngi sibawa assalenna sininna bellé.

⁴⁵ Iyakiya Upowadai atongengengngé, narimakkuwannanaro dé' mumateppe ri Iyya.

⁴⁶ Niga ri yelle'mu mulléi pabuttiwi makkedaé engka dosa-Ku? Rékko Upowadai atongengengngé, magi nadé' mumateppe ri Iyya?

⁴⁷ Tau iya assalennaé poléi ri Allataala, naéngkalingai ada-adanna Allataala. Iyakiya iko dé' mupolé ri Allataala, iyanaro saba'na dé' mumaélo maréngkalinga.”

Yésus sibawa Abraham

⁴⁸ Iyaro sining tau Yahudié nabalini Yésus, “Dé'ga natongeng adatta makkedaé tau Samaria-Ko iya nauttamakiyé sétang?”

⁴⁹ Nappébali Yésus, “Dé'nauttamai-Ka sétang. Upakalebbii Ambo'-Ku, iyakiya iko mupakatuna-Ka.

⁵⁰ Dé' Usappa alebbireng untu' alé-Ku. Engka séddi makkuragangek-Ka alebbireng, na Aléna ritu madélékiki.

⁵¹ Tongeng senna' adak-Kué, tau iya turusiyéngngi adak-Ku, lettu mannennungeng dé' namaté matu.”

⁵² Nanakkeda sining tau Yahudiéro lao ri Yésus, “Riissenni makkekkuwangngé nauttamaki tongek-Ko sétang! Maténi Abraham, makkuwatoro sininna nabi-nabié. Iyakiya makkeda-Ko, ‘Tau iya turusiyéngngi adak-Ku, lettu mannennungeng dé' namaté matu.’

⁵³ Rékko aléna Abraham maténi, sibawa maté toni sininna nabi-nabié, nigako Iko? Masa Iko lebbi battowa naiya ambo'ta Abraham!”

⁵⁴ Nappébali Yésus, “Akkalarapanna sappa-Ka alebbireng untu' alé-Ku, iyaro alebbirengngé dé'gaga bettuwanna. Iya pakalebbiék-Ka iyanaritu Ambo'-Ku iya muwangga'é Allataalamu,

⁵⁵ padahal dé' muwissengngi. Iyakiya Iyya uwissengngi. Akkalarapanna makkeda-Ka makkedaé dé' Uwissengngi, tentu séddika tau pabbelléng pada-pada iko. Uwissengngi sibawa mapatoiwi adan-Na.

⁵⁶ Ambo'mu Abraham masennang senna' makkedaé naitai matu esso-Ku. Purani naita sibawa masennanna!”

⁵⁷ Nanakkeda sining tau Yahudié lao ri Yésus, “Dé'pa gaga limappulo taung umuru'-Mu, na purani Muwita Abraham?”

⁵⁸ Nappébali Yésus, “Makkeda tongek-Ka lao ri iko: riwettu dé'napa najaji Abraham, eng-Ka mémenna.”

⁵⁹ Napada malana batu sining tau Yahudiéro untu' genrungngi Yésus; iyakiya mallekke'i Yésus, nappa lao nasalaiwi Bolana Allataala.