YOHANES 7 - KITTA KAREBA MADECENG

Yésus sibawa silessu-silessuren-Na

¹ Purairo, lao tulilini Yésus ri Galiléa. Dé' namaélo lao ri daéra Yudéa saba' sining panguwasana Yahudié kuwaro maéloi mpunoi.

² Iyaro wettué macawé'ni Esso Maraja Kalampang Daud-daungngé.

³ Nakkeda silessu-silessurenna Yésus lao ri Aléna, “Salaini iyaé onrongngé namulao ri Yudéa, kuwammengngi na ana'-ana' gurum-Mu weddingngi naitato jama-jamam-Mu.

⁴ Dé'gaga tau subbui matu aga iya napogau'é, rékko maéloi tarompo. Rékko Mupogau'i gau'-gau' pada-padaéro, naissengngi sininna linoé!” (

⁵ Saba' silessu-silessuren-Na dé'to namateppe' ri Aléna.)

⁶ Nakkeda Yésus lao ri mennang, “Dé'pa narapii wettuk-Ku, iyakiya untu' iko, tungke' wettu wedding.

⁷ Iyaé linoé dé' namungking nabenciko. Iyakiya Iyya mémeng ribencika ri linoé saba' tuli makkeda-Ka lao ri linoé makkedaé maja pangkaukenna.

⁸ Laono alé-alému ri ramé-raméro. Iyya dé' ulao saba' dé'pa narapii wettunna untu' alé-Ku.”

⁹ Makkuwaniro ada-adanna Yésus lao risining silessuren-Na, nanaonrona ri Galiléa.

Yésus ri Ramé-ramé Kalampang Daud-daungngé

¹⁰ Laonana sining silessurenna Yésus ri ramé-raméro, lao toni Yésus alé-aléna mammekko-mekko dé' naissengngi tauwé.

¹¹ Sillampé ramé-raméro, sining panguwasana Yahudié sappai sibawa makkutana-kutana, “Kégani?”

¹² Maéga tau mammula mabbici'-bici' passalenna Aléna. Engka makkeda, “Tau décéngngi.” Engkato makkeda, “Dé'! Napapusai tau maégaé.”

¹³ Iyakiya dé' séddi tau barani mabbicara terus-terang passalenna Aléna saba' métaui risining tomakuwasana Yahudié.

¹⁴ Mattengngangngi ramé-ramé, nauttama Yésus ri laleng Bolana Puwangngé, nappammula mappagguru.

¹⁵ Hérang senna'ni tomakuwasana Yahudié, nakkeda, “Pékkugi iyaé tauwé weddingngi naisseng maéga makkuwa, padahal dé' naengka nassikola?”

¹⁶ Nappébali Yésus, “Iya Uwappagguruwangngéwé tenniya pappagguruwak-Ku, iyakiya pappagguruwan-Na iya suroék-Ka.

¹⁷ Tau iya maéloé turusiwi élona Allataala, naisseng matu polégi iyaro Uwappagguruwangngé ri Allataala iyaré'ga ri alé-Ku muto.

¹⁸ Tau iya mabbéréyangngéngngi pappagguruwanna sappai alebbireng untu' aléna. Iyakiya tau iya sappaé alebbireng untu' iya suroéngngi, malempu iyaro tauwé, dé' bellé ri aléna.

¹⁹ Dé'ga napura Musa mpérékko parénta-paréntana Allataala? Iyakiya ri yelle'mu dé'gaga turusiwi parénta-paréntaéro. Magi mumaélo mpuno-Ka?”

²⁰ Nappébali tau maégaéro, “Jangek-Ko! Niga maélo mpuno-Ko?”

²¹ Nappébali Yésus, “Séddi bawang jamang Upogau' ri esso Saba'é, namuhérang.

²² Nawérékko Musa peraturang untu' massunna – namuni iyaro sunna'é dé' napolé ri Musa assalenna, iyakiya poléi ri ambo'na toriyolota ri yolona Musa. Rimakkuwannanaro muwi ri esso Saba'é maélo tokko sunna'i tauwé.

²³ Mupogau'i iyaro kuwammengngi aja' muwajjalékkai peraturanna Musa passalenna sunna'é, magi mumacai lao ri Iyya nasaba Upajjappai sininna watakkaléna tauwé ri esso Saba'é?

²⁴ Aja' muadélékiwi tauwé situru iya paitaé, iyakiya situru iya adélé'é.”

Tongegga Yésus Arung Pappassalama'é?

²⁵ Nainappa engka siyagangngaré tau Yérusalém makkeda, “Tenniyaga iyanaé taunna iya mattengngangngé risappa untu' riyuno?

²⁶ Itani mabbicarai siélo-élona ri yolona tau maégaé, nadé'gaga makkeda agaga lao ri Aléna! Napahanniga sining panguwasata makkedaé iyanaé Arung Pappassalama'é?

²⁷ Iyakiya rékko poléi Arung Pappassalama'é, dé' séddi tau missengngi polé kégi assalen-Na! Padahal riisseng idi polé kégi assalen-Na iyaé tauwé.”

²⁸ Wettu mappaggurunna Yésus ri laleng Bolana Allataala, gorani sibawa sadda battowa, “Jaji muwissenniga niga Iyya'é, sibawa polé kégi assalek-Ku? Dé' Upolé nasaba élo alé-Ku. Risuroka ri iya engkaé ha'na suro-Ka, sibawa weddingngi riyatepperi. Iyakiya iko dé' muwissengngi Aléna.

²⁹ Uwisseng Aléna, nasaba assalek-Ku poléi ri Aléna, na Aléna ritu suro-Ka.”

³⁰ Iyatoro wettué namacinna tikkengngi Yésus, iyakiya dé'gaga barani makkatenningngi, nasaba dé'pa narapii wettunna.

³¹ Maéga ri yelle'na sining tauwéro mammulani mateppe' ri Aléna, sibawa makkeda, “Rékko poléi Arung Pappassalama'é, naulléga pogau'i lebbi maéga anu makalallaing naiya iyaé tauwé?”

Usahana tikkengngi Yésus

³² Naéngkalingani sining tau Farisié pékkugi tau maégaéro mabbici'-bici' passalenna Yésus. Rimakkuwannanaro, sibawani kapala-kapala imangngé nasuroi siyagangngaré pengawalna Bolana Puwangngé lao tikkengngi Yésus.

³³ Nakkeda Yésus lao ri tau maégaé ri laleng Bolana Puwangngé, “Cinampe' bawang Usibawakko. Purairo lisu-Ka matu lao ri iya suroék-Ka.

³⁴ Musappa-Ka matu, iyakiya dé' mulléi lolongek-Ka; saba' dé' mulléi lao ri onrong Uwonroiyé.”

³⁵ Nakkeda sining tomakuwasana Yahudié séddié lao ri laingngé, “Kégai maélo lao iyaé tauwé nadé' nirullé runtu'i? Maéloiga lao risining tau Yahudié iya monroé ri saliwempanuwa ri yelle'na tau Yunanié, sibawa paggurui tau Yunanié?

³⁶ Aga akkatta-Na nakkeda makkedaé maéloki sappai, iyakiya dé' nirullé runtu'i sibawa dé' nirullé lao ri onrong Naonroiyé?”

Uwai iya mabbéré atuwong

³⁷ Ri esso paccappurenna ramé-raméro, iyanaritu esso kaminang pentingngé. Tettonni Yésus ri laleng Bolana Allataala nainappa gora, “Tau iya madekkaé sitinajai lao ri Iyya untu' ménung.

³⁸ Passalenna tau iya mateppe'é ri Iyya, tarokii ri laleng Kitta'é: ‘Polé ri atinna massolo'i solo'-solo' uwai iya mabbéré atuwong.’ ” (

³⁹ Mabbicarai Yésus passalenna Rohna Allataala, iya natarimaé matu sining tau iya mateppe'é ri Aléna. Saba' iyaro wettué dé'pa nariyabbéréyang Rohna Allataala; saba' dé'pa naripakalebbi Yésus sibawa amatén-Na.)

⁴⁰ Maéga tau méngkalingai aga napowada Yésus, na ri yelle'na mennang engka makkeda, “Iyaé tauwé pasti iyanaro Nabié!”

⁴¹ Iya laingngé makkedai, “Iyanaé Arung Pappassalama'é!” Iyakiya engkato makkeda, “Ah? masa' Arung Pappassalama'é polé ri Galiléa?

⁴² Ri laleng Kitta'é tarokii makkedaé Arung Pappassalama'é iyanaritu wija-wijanna Daud sibawa poléi matu ri Bétléhém, iyanaritu kampong assalenna Daud.”

⁴³ Angkanna mappammulani mappangéwang sining tauwé passalenna Yésus.

⁴⁴ Engka maélo tikkengngi, iyakiya dé' séddi tau makkatenningngi.

Sining panguwasana Yahudié dé' namateppe'

⁴⁵ Wettunnana lisu sining pengawalna Bolana Allataala iya risuroé tikkengngi Yésus, makkutanani kapala-kapala imangngé sibawa sining tau Farisié lao ri mennang, “Magi nadé' mutiwii Aléna lao kumaiyé?”

⁴⁶ Nappébali sining pengawal-éro, “Wah, dé'pa naengka tau mabbicara pada-padan-Na!”

⁴⁷ Nakkeda sining tau Farisiéro, “Napapusatonoga?”

⁴⁸ “Engkaga sining panguwasata iyaré'ga tau Farisié mateppe' ri aléna?

⁴⁹ Iyakiya tau maégaéwé dé' naissengngi hukkunna Musa, sibawa muwi maga ritanroi toni mennang.”

⁵⁰ Sala séddinna ri yelle'na sining tau Farisiéro iyanaritu Nikodémus iya puraé lao ri Yésus. Nakkeda Nikodémus lao risining tau Farisi laingngé,

⁵¹ “Manuru Hukkungngé, séddié tau dé' nawedding rihukkung riwettu dé'napa nariyéngkalinga parakarana sibawa riparéssa pangkaukenna.”

⁵² Nappébali mennang, “Polé ri Galiléa tokkoga? Paréssa bawanni Kitta'é! Muwitai matu makkedaé dé'gaga nabi iya assalenna polé ri Galiléa!” [

Séddi makkunrai ripoléi malaweng

⁵³ Purairo, lisu manenni tauwé ri bolaé.