YOHANES 5 - KITTA KAREBA MADECENG

Appajjappangngé ri kolang Bétésda

¹ Purairo engka ramé-ramé Yahudi, nalaona Yésus ri Yérusalém.

² Ri Yérusalém ri seddéna “Sumpang Bimbala'” engka séuwa kolang iya riyasengngé Bétésda ri laleng basa Ibrani. Kuwaro engka lima légo-légona.

³ Ri légo-légoéro maéga tau malasa léwu; engka buta, engka képpang, na engkato péso'. [Mattajeng manengngi mennang taggoccang iyaro uwaina kolangngé.

⁴ Saba' biyasai malaéka'na Puwangngé nonno ri lalenna kolangngéro nanagoccangngi uwaina. Na tau malasa iya bunge' muttama'é ri laleng kolangngéro ri wettu taggoccanna uwaina majjappai matu polé ri lasa aga iya kennaéngngi.]

⁵ Ri onrongngénnaro engka séddi tau worowané iya telluppuloé aruwa taung ittana malasa.

⁶ Naitai Yésus léwu kuwaro, sibawa naissenna makkedaé maitta senna'ni malasa; nakkutanana Yésus ri tauwéro, “Maélokoga majjappa?”

⁷ Nappébali iyaro tauwé, “Bapa', dé' gaga tau kuwaé puttama'ka ri laleng kolangngé wettunna taggoccang uwaina. Nappaka mattuju lao ri kolangngé, napoddiyoloina tau laingngé muttama'.”

⁸ Nakkeda Yésus lao ri tauwéro, “Oto'no, akkai tappérému namujoppa.”

⁹ Iyatoro wettué najjappa iyaro tauwé. Nakkani tappéréna nanajoppa. Iyaro gau'é kajajiyangngi ri esso Saba'é.

¹⁰ Rimakkuwannanaro sining tau makuwasana Yahudié makkedai lao ri tau iya nappa majjappaéro, “Iyaé essoé, esso Saba'i. Dé' naweddikko makkai tappérému.”

¹¹ Iyakiya mappébaliwi iyaro tauwé, “Tau iya pajjappaékka onna suroka makkai tappéréku sibawa joppa.”

¹² Nakkutana mennang, “Niga suroko makkai tappérému sibawa joppa?”

¹³ Iyakiya tau iya majjappaénnaro dé' naissengngi taunna, saba' lennye'ni Yésus ri yelle'na tau maégaéro.

¹⁴ Nainappa Yésus siruntu iyaro tauwé ri laleng Bolana Puwangngé, nakkeda lao ri tauwéro, “Makkekkuwangngé majjappano. Aja'na mumadosasi, kuwammengngi aja' mupéneddingiwi iya lebbi majaé.”

¹⁵ Nanalaona iyaro tauwé nanapowadangngi sining panguwasana Yahudié makkedaé Yésus ritu pajjappai.

¹⁶ Narimakkuwannanaro makkuragani mennang callai Yésus, saba' purai napajjappa tauwé ri esso Saba'é.

¹⁷ Iyakiya makkedai Yésus lao ri mennang, “Ambo'-Ku majjamai matteru-teru lettu makkekkuwangngé, na Iyya majjamato.”

¹⁸ Iyaro ada-adaé nassabari sining panguwasana Yahudié napédé' makkuraga untu' mpunoi. Napogau'i mennang iyaro, tenniya banna nasaba najjalékkai peraturanna agamaé passalenna esso Saba'é, iyakiya nasaba makkeda towi iyaro Allataala Ambo'-Na; bettuwanna napappadai Aléna Allataala.

Akuwasanna Ana'é

¹⁹ Nabalini Yésus sining tauwéro makkuwaé, “Ateppe'no, dé'gaga naullé pogau' Ana'é sibawa akuwasang aléna. Banna iya napogau' aga iya naitaé napogau' Ambo'-Na. Saba' aga napogau' Ambo'é, iyatoro napogau' Ana'é.

²⁰ Saba' Ambo'é namaséiwi Ana'é sibawa nappaitangngi sininna iya napogau'é Aléna. Mala Ambo'é maéloi mappaitangngi ri aléna sining pangkaukeng iya lebbi battowaéppasi, angkanna hérakko.

²¹ Iyaro Ambo'é napaoto'i tau maté, sibawa nawéréngngi mennang atuwong tongengngé sibawa mannennungengngé; makkuwatoro Ana'é Nabbéréyangngi atuwong mannennungengngé lao ri tau iya maéloé nawéréng atuwong.

²² Aléna Ambo'é dé' nadélékiwi niga-niga. Sininna akuwasangngé untu' madéléki pura nabbéréyanni lao ri Ana'-Na.

²³ Napogau'i Ambo'é iyaro kuwammengngi nasininna tauwé pakalebbii Ana'é pada-pada mennang pakalebbii Ambo'é. Tau iya dé'é napakalebbii Ana'é dé'to napakalebbii Ambo'é iya suroéngngi Ana'é.

²⁴ Tongeng senna' ada-adak-Kué: Tau iya pénessaiyéngngi ada-adak-Kué, sibawa mateppe' lao ri iya suroék-Ka, mappunnangiwi atuwong mannennungengngé. Dé' matu narihukkung: leppe'ni polé ri amaténgngé nalolongengngi atuwongngé.

²⁵ Ateppe'no: Poléi matu wettunna – mala narapini wettunna – naéngkalingai matu tau maté saddanna Ana'na Allataala. Na tau iya méngkalingaéngngi tuwoi matu.

²⁶ Pada-pada aléna Ambo'é assalennai atuwongngé, napancaji towi Ana'-Na assalenna atuwongngé.

²⁷ Purani nawéréng Ana'-Na ha' untu' madéléki, saba' Ana'na Tolinoé.

²⁸ Aja' muhérang méngkalingai iyaé gau'é, saba' poléi matu wettunna makkedaé sininna tau iya matéénna naéngkalingai saddan-Na,

²⁹ nappa massu polé ri tampungngé. Tau iya pogau'éngngi madécéngngé moto'i matu untu' tuwo. Iyakiya tau iya pogau'é ja moto'i matu untu' rihukkung.”

Butti-butti passalenna Yésus

³⁰ “Dé'gaga uwullé pogau' polé ri élo alé-Ku. Banna uwadélékiwi situru napparéntangngé Allataala. Na apettuk-Ku adélé'i, saba' dé' Uwaccowériwi élo alé-Ku, sangadinna élona Ambo' iya suroék-Ka.

³¹ Akkalarapanna mabbéré-Ka asabbiyang passalenna alé-Ku, iyaro asabbiyangngé dé' nawedding riyatepperi.

³² Iyakiya engka tau laing iya mabbéré asabbiyang passalek-Ku, na-Uwisseng makkedaé iyaro asabbiyanna tongengngi.

³³ Kirikko suro lao ri Yohanés, namabbéréni asabbiyang iya tongengngé passalek-Ku.

³⁴ Upowadai gau'éwé, tenniya nasaba Uwapparelluwangngi asabbiyang polé ri tolinoé, iyakiya kuwammengngi naripassalama'ko.

³⁵ Iyaro Yohanés pada-padai lampu malluwa'é sibawa iya mattaparengngé cahaya. Untu' wettu iya dé'é namaitta masenna'ko tarimai cahayanaro.

³⁶ Iyakiya asabbiyak-Ku lebbi battowai naiya asabbiyanna Yohanés. Aga iya makkekkuwangngéwé Upogau', iyanaritu jama-jamang iya nassurowangngé Ambo'é lao ri Iyya, pabuttiwi makkedaé Ambo'é pura suro-Ka.

³⁷ Na Ambo'é iya suroék-Ka mabbéré towi asabbiyang passalek-Ku. Iko dé'pa naengka muwéngkalingai saddan-Na iyaré'ga muwitai tappa-Na.

³⁸ Ada-adan-Na dé' naonro ri laleng atimmu saba' dé' mumateppe lao ri Iyya iya Nasuroé.

³⁹ Muwagguruiwi Kitta'é saba' muwasengngi makkedaé nasibawang caraéro mappunnaiko atuwong mannennungengngé. Na aléna iyaro Kitta'é mabbéré asabbiyang passalek-Ku.

⁴⁰ Iyakiya dé' mumaélo lao ri Iyya untu' lolongengngi atuwong mannennungengngé.

⁴¹ Dé' usappa pappoji polé ri tolinoé.

⁴² Uwissekko. Uwissekko dé' muwamaséiwi Allataala ri laleng atimmu.

⁴³ Poléka ri laleng akuwasanna Ambo'-Ku, iyakiya dé' mutarima-Ka. Iyakiya rékko tau laingngé poléi ri laleng akuwasang ri aléna, maéloko tarimai.

⁴⁴ Pékkugiko wedding mateppe', rékko sappako pappojiyang polé ri pada-padammu, nadé' muwakkuraga sappa pappojiyang Allataala iya Séuwaé?

⁴⁵ Aja' muwasengngi Upassalako matu ri yolona Ambo'é. Mala iya passalaékko matu iyanaritu Musa, tau iya muwaddennuwangiyé.

⁴⁶ Akkalarapanna mateppe'ko lao ri Musa, mateppe' tokko matu lao ri Iyya, saba' naokii ritu passalek-Ku.

⁴⁷ Iyakiya rékko dé' mumateppe lao ri aga iya naokié Musa, pékkugiko wedding mateppe' lao ri aga iya Upowadaé?”