YOHANES 4 - KITTA KAREBA MADECENG

Yésus sibawa makkunrai Samaria

¹ Naéngkalingani sining tau Farisié makkedaé Yésus lolongengngi sibawa cemméi lebbi maéga ana' guru naiya Yohanés. (

² Sitongenna Yésus dé' naccemmé, sangadinna ana'-ana' gurun-Na bawang.)

³ Wettunna naisseng Yésus makkedaé naéngkalingani sining tau Farisié passalenna gau'éro, lisuni ri Galiléa polé ri Yudéa.

⁴ Ri laleng allalengennaro harusu'i nalaloi Samaria.

⁵ Nalettu'na Yésus riséuwaé kota ri Samaria iya riyasengngé Sikhar, dé' namabéla polé ri tana iya nabbéréyangngé Yakub riyolo lao ri Yusuf, ana'na.

⁶ Kuwaniro monro bujunna Yakub. Matekko senna'i Yésus nasaba allalengengngéro, rimakkuwannanaro tudanni ri wirinna bujungngé. Iyaro wettué kira-kira tetté seppulo duwa tangassoé.

^7-8 Na ana'-ana' gurunna Yésus laoni ri kotaé untu' melli nanré. Napoléna séddi makkunrai Samaria mabbanrong uwai. Nakkeda Yésus ri makkunraiéro, “Bu', tawérék-Ka uwai rinutta!”

⁹ Nappébali iyaro makkunrai Samariaé, “Puwang tau Yahudi, na iyya tau Samaria; magi Puwang taéllau uwai rinung ri iyya?” (Saba' dé' gaga assisumpungenna sining tau Yahudié sibawa tau Samariaé.)

¹⁰ Nappébali Yésus, “Akkalarapanna muwissengngi pabbéréna Allataala sibawa niga iya méllauwé uwai rinung ri iko, tentu méllau tokko uwai rinung ri Aléna, na-Nawérékko matu uwai tuwo.”

¹¹ Nakkeda iyaro makkunraié, “Dé' tappunnai banrong Puwang, na iyaé bujungngé malamung senna'. Polé kégaki Puwang lolongeng uwai tuwo?

¹² Yakub, ambo'na toriyolota, mpérékki iyaé bujungngé. Aléna malato uwai rinung polé kuwaé; makkuwatoro ana'-ana'na enrengngé olokolo'na. Tasengngiga Puwang lebbi battowaki na iya Yakub?”

¹³ Nakkeda Yésus, “Tau iya ménungngéngngi iyaé uwaiéwé madekka mupi paimeng.

¹⁴ Iyakiya tau iya ménungngéngngi uwai maéloé Uwabbéréyang, dé'na namadekkana lettu mannennungeng. Saba' uwai maéloé Uwabbéréyang mancajiwi matu mata uwai ri laleng aléna iya jompié massu sibawa mabbéré atuwong mannennungeng.”

¹⁵ Nakkeda iyaro makkunraié, “Puwang tawérénna iyaro uwaiéro, kuwammengngi dé'na umadekkana; sibawa dé'na naparelluka lisuna kuwaé untu' mala uwai.”

¹⁶ Nakkeda Yésus, “Laono muwobbii lakkaimmu, nainappa lisu kuwaé.”

¹⁷ Nappébali iyaro makkunraié, “Dé' uwappunnai lakkai.” Nakkeda Yésus, “Tongeng adammu.

¹⁸ Saba' wékkalimano kawing, na worowané iya muéwaé siyonrong makkekkuwangngé tenniya lakkaimmu.”

¹⁹ Nakkeda iyaro makkunraié, “Uwissenni makkekkuwangngé, Puwang séddiwi nabi.

²⁰ Néné-nénéta nasompai Allataala ri buluéwé, iyakiya bangsana Puwang makkedai banna ri Yérusalém bawang onronna tauwé sompai Allataala.”

²¹ Nakkeda Yésus lao ri makkunraiéro, “Ateppe'no, séuwa wettu matu nasompai tauwé Ambo'é, tenniyana ri buluéwé, sibawa tenniyato ri Yérusalém.

²² Iko tau Samariako sompai iya dé'é muwissengngi, na idi tau Yahudié sompaki iya riissengngé, saba' asalamakengngé poléi ri tau Yahudié.

²³ Iyakiya poléi matu wettunna, mala poléni, makkedaé nasibawang akuwasanna Rohna Allataala, nasompai matu tauwé Ambo'é selaku Allataala tongengngé pada-pada naéloriyé Ambo'é.

²⁴ Saba' iyaro Allataala Roh-i, na banna iya nasibawangngé akuwasanna Rohna Allataala naulléi tauwé sompai Ambo'é selaku Allataala iya tongengngé.”

²⁵ Nakkeda iyaro makkunraié lao ri Yésus, “Uwisseng Arung Pappassalama'é (iya riyasengngé Kristus) maéloi polé. Rékko poléi, nappaddissengengngi matu sininna séuwa-séuwaé lao ri idi.”

²⁶ Nakkeda Yésus, “Iyya'naé. Iyya, iya makkekkuwangngé mabbicara sibawa iko.”

²⁷ Iyaro wettué lisuni ana'-ana' gurunna Yésus. Héranni mennang mitai Yésus mabbicara sibawa séddi makkunrai. Iyakiya dé'gaga séddi polé ri mennang makkutana ri makkunraiéro, “Aga parellutta Bu?” Iyaré'ga makkutana lao ri Yésus, “Magi Bapa' nabbicara sibawa makkunraiéro?”

²⁸ Na iyaro makkunraié nasalaini busunna kuwaro nalari lao ri kotaé nanakkeda lao risining tauwé kuwaro,

²⁹ “Laono mai muwitai tau iya powadangngékka sininna puraé upogau'. Naulléga iyanaro Arung Pappassalama'é?”

³⁰ Nasalaini iyaro sining tauwé kotaé nalao ri Yésus.

³¹ Iyaro wettué ana'-ana' gurunna Yésus naérani Yésus manré. Nakkeda mennang, “Bapa' Guru, anréni.”

³² Iyakiya mappébaliwi Yésus, “Engka nanré ri alé-Ku, iya dé'é muwissengngi.”

³³ Nammulana ana'-ana' gurunna Yésus sisullé-sullé makkutana, “Engkaga tau tiwirengngi nanré?”

³⁴ Nakkeda Yésus, “Nanré-Ku iyanaritu maccowériwi élo-Na iya suroék-Ka, sibawa pappurai jamang iya nawéréngngék-Ka.

³⁵ Makkedako, ‘Patampuleppi na wettu éngngalang.’ Iyakiya makkeda-Ka lao ri iko: Itani sining dare iya maridiénna, sadiyani untu' riyéngngala!

³⁶ Tau iya méngngalaé mammulani nanatarima sarona sibawa paddeppungeng wassélé' untu' atuwong mannennungengngé. Na tau iya mampoé sibawa tau iya méngngalaé weddingngi massennas-sennang massibawa.

³⁷ Iyaé warékkadaé tongeng towi, ‘Iya séddié mattaneng laingngé méngngalai.’

³⁸ Usuroko lao méngngala ri dare iya dé'é mujamai, tau laingngé pura majjama kuwaro, na iko tarimako saro polé ri jama-jamanna mennang.”

³⁹ Maéga tau Samaria pabbanuwana kotaéro mateppe' lao ri Yésus, nasaba makkedai iyaro makkunraié, “Napowadai lao ri iyya sininna puraé upogau'.”

⁴⁰ Na wettunna iyaro sining tau Samariaé siruntu Yésus, naéllauni mennang sibawa masero kuwammengngi naonro silaong mennang. Jaji monroni Yésus kuwaro duwangngesso ittana.

⁴¹ Napédé' maégana tau mateppe' ri Yésus nasaba aga pura nappagguruwang lao ri mennang.

⁴² Nakkeda mennang lao ri makkunraiéro, “Mateppe'ni makkekkuwangngé, tenniya nasaba aga pura mupowadaé lao ri idi, iyakiya nasaba alétana pura méngkalingai, sibawa missengngi makkedaé mémengngi Pappassalama'nai linoé.”

Yésus pajjappai ana'na pegawainna saorajaé

⁴³ Labe'nana duwangngesso monro ri Sikar, laoni Yésus ri Galiléa.

⁴⁴ Yésus muto pura makkeda, “Séddié nabi dé' naripakalebbi ri wanuwanna.”

⁴⁵ Iyakiya wettun-Na lettu ri Galiléa, sining tauwé kuwaro duppaiwi sibawa masennang atinna, saba' engkai mennang ri Yérusalém wettunna Esso Maraja Paskaé, napurani naita maneng iya napogau'é Yésus.

⁴⁶ Nainappa Yésus lisu ri Kana ri Galiléa, iya naonroiyé pinrai uwai mancaji anggoro. Ri kotaéro engka séddi pegawé saoraja iya malasaé ana'na ri Kapernaum.

⁴⁷ Wettunna naéngkalinga makkedaé engkani Yésus ri Galiléa polé ri Yudéa, laoni ri Yésus nanaéllauwi Yésus lao ri Kapernaum untu' pajjappai ana'na iya mawé'énna maté.

⁴⁸ Nakkeda Yésus lao ri pegawé saorajaéro, “Rékko dé' muwitai anu makalallaingngé, dé' mumateppe.”

⁴⁹ Nappébali pegawé saorajaéro, “Puwang, apperi-perini lao riwettu dé'napa namaté ana'ku.”

⁵⁰ Nakkeda Yésus lao ri pegawéro, “Laono, majjappani ana'mu.” Mateppe'ni iyaro tauwé ri ada-adanna Yésus, nainappa lao.

⁵¹ Ri tengnga laleng, poléni sining pattumaninna nanabbirittangngi, “Majjappani ana'ta Puwang.”

⁵² Nakkutana lao ri mennang, tetté siyaga iyaro ana'é najjappa. Nappébali mennang, “Kira-kira tetté séddi iwenni' tangassoé nasoro semmenna.”

⁵³ Naéngngeranni ambo'na iyaro ana'é makkedaé iyaro wettué nakkeda Yésus lao ri aléna, “Majjappani ana'mu.” Namateppe'na ri Yésus sibawa sininna kaluwargana.

⁵⁴ Iyanaro anu makalallaing maduwaé iya napogau'é Yésus ri Galiléa polénana ri Yudéa.