YOHANES 19 - KITTA KAREBA MADECENG

¹ Nainappa muttama' Pilatus nanasuroi tauwé barasa'i Yésus.

² Mébbuni sining prajuri'é séuwa passigera' polé ri takké-takké maddorié, nainappa napasang ri ulunna Yésus. Purairo napappakéini mennang jumba lango-lango,

³ nainappa makkolik-koling lao ri Aléna sibawa makkeda, “Tuwoni arunna tau Yahudié!” Nainappa naleppa.

⁴ Purairo massusi Pilatus siseppa nanakkeda lao ri tau maégaéro, “Itai! Utiwii massu lao ri iko, kuwammengngi muwissengngi makkedaé dé' ulolongeng muwi séddi asalang ri Aléna.”

⁵ Nassuna Yésus sibawa paké passigera' dori enrengngé jumba lango-lango. Nakkeda Pilatus lao ri mennang, “Itani tauwéro.”

⁶ Wettunna kapala-kapala imangngé sibawa sining pengawal-é mitai Yésus, gorani mennang, “Sallii! Sallii!” Nakkeda Pilatus lao ri mennang, “Alani na alému sallii, dé' ulolongeng muwi séddi asalang ri Aléna.”

⁷ Nappébali sining tau Yahudiéro, “Manuru' hukkutta, harusu'i rihukkung maté nasaba nangakui Aléna Ana'na Allataala.”

⁸ Wettunna Pilatus naéngkalinga mennang makkeda makkuwaro, pédé' métauni.

⁹ Nauttama'na paimeng ri laleng saorajaé, ritiwinana Yésus muttama', makkutanani Pilatus ri Aléna, “Polé kégai assalemmu?” Iyakiya dé' nappébali Yésus.

¹⁰ Jaji makkedasi Pilatus, “Dé'ga Mumaélo mabbicara sibawa iyya? Issenni, mappunnaika akuwasang paleppe'-Ko, sibawa akuwasang salli-Ko!”

¹¹ Nappébali Yésus, “Rékko Allataala dé' nabbéréyangngi iyaro akuwasangngé lao ri puwang, dé' sises-siseng puwang tappunnai akuwasang lao ri Iyya. Rimakkuwannanaro tau iya mabbéréyangngék-Ka lao ri puwang, lebbi battowai dosana naiya puwang.”

¹² Wettunna naéngkalinga Pilatus iyaro, makkuragani untu' leppessangngi Yésus. Iyakiya gora-gorai sining tau Yahudié, “Rékko tapaleppe'i Puwang, tenniyana Puwang sellaona Kaisar! Tau iya mangakué aléna arung, iyanaritu balinna Kaisar!”

¹³ Wettunna naéngkalinga Pilatus ada-adaéro, natiwini Yésus massu nainappa tudang ri kadéra pengadilangngé ri onrong riyasengngé Témbo' Batu. (Ri laleng basa Ibrani asenna Gabata.)

¹⁴ Iyaro wettué mawé'ni tetté seppulo duwa essoé, esso riyolona Esso Maraja Paskaé. Nakkeda Pilatus lao risining tauwéro, “Iyanaé arummu!”

¹⁵ Gora-gorani mennang, “Unoi! Unoi! Sallii!” Nakkutana Pilatus, “Harusu'ka'ga sallii arummu?” Nappébali kapala-kapala imangngé, “Banna Kaisar alé-aléna arutta!”

¹⁶ Nanabbéréyanni Pilatus Yésus lao ri mennang untu' risalli. Nalani mennang Yésus, nanatiwii lao.

Risallina Yésus

¹⁷ Massuni Yésus méssangngi salli-Na lao ri onrong riyasengngé “Onrong Tengkora”. (Ri laleng basa Ibrani riyasengngi Golgota.)

¹⁸ Kuwaniro risalli. Nasibawang Aléna, engkato duwa tau laing risalli; séddi ri seddé abéyo, séddi ri seddé atau, na Yésus ri tengnga-tengnga.

¹⁹ Ri aju sallina Yésus, nassurowangngi Pilatus pasangngi okiéwé: “Yésus polé ri Nazarét, Arunna Tau Yahudié”.

²⁰ Maéga tau Yahudi bacai iyaro okié, saba' iyaro onronna Yésus risalli dé' namabéla polé ri kotaé. Iyaro okié ri laleng basa Ibrani, Latin sibawa Yunani.

²¹ Nakkeda kapala-kapala imangngé lao ri Pilatus, “Aja' taokii ‘Arunna tau Yahudié'’, sangadinna okii, ‘Makkedai iyaé tauwé, Iyya Arunna tau Yahudié.’ ”

²² Iyakiya mappébaliwi Pilatus, “Iya puraé uwoki, tette'i taroki.”

²³ Puranana iyaro sining prajuri'é nasalli Yésus, nalani pakéyan-Na. Iyaro pakéyangngé nabagé eppai: tungke'-tungke' lolongeng sibagiyang. Nala towi mennang jumba-Na. Iyaro jumbaé dé'gaga pajjaina – ritennungngi polé ri yasé lettu ri yawa.

²⁴ Makkedani iyaro sining prajuri'é séddié lao ri laingngé, “Aja' tarette'-rette'i iyaé jumbaé. Laono mai taundiwi untu' pattentui niga wedding lolongengngi.” Iyaro gau'é kajajiyangngi kuwammengngi nakajajiyang aga taroki ri laleng Kitta'é, iyanaritu: “Nabagé-bagéni mennang pakéyak-Ku, sibawa naundiwi jumba-Ku.” Na mémeng iyaro sining prajuri'é pura napogau'ni makkuwaéro.

²⁵ Ri seddéna sallina Yésus tettonni indo'na Yésus, padakkunrainna indo'-Na, Maria bainéna Klopas, sibawa Maria Magdaléna.

²⁶ Wettunna Yésus naita indo'-Na sibawa ana' gurun-Na namaséiyé tettong kuwaro, makkedani ri indo'-Na, “Indo', iyaro ana'na Indo'.”

²⁷ Nainappa makkeda Yésus lao ri ana' gurun-Naro, “Iyaro indo'mu.” Mappammulai wettuéro iyaro ana' gurué natarimai indo'na Yésus untu' monro ri bolana.

Amaténna Yésus

²⁸ Naissenni Yésus makkedaé tépu manenni makkekkuwangngé, nakuwammengngi aga iya tarokié ri laleng Kitta'é weddingngi kajajiyang, makkedani, “Madekka-Ka.”

²⁹ Engka kuwaro séuwa mangko penno uwai anggoro iya makeccié. Nappajajjekenni séuwa bunga karang ri lalenna uwai anggoro'éro, nainappa nattoddokeng ri sitakké hisop, nanassoppakengngi ri témunna Yésus.

³⁰ Napérasaini Yésus uwai anggoro'éro nainappa makkeda, “Tépuni!” Nainappa napacannunnu ulun-Na namaté.

Rigajanna Yésus

³¹ Sining panguwasana Yahudié dé' naéloriwi rékko iyaro ujuna sining tau risallié tette'i taggattung ri aju sallié ri esso Saba'é, apalagi iyaé sisengngé iyaro Saba'é Esso Maraja iya ripallaingngé. Nasaba esso risallina Yésus kajajiyangngi ri yolona iyaro esso Saba'é, sining tau Yahudié méllau paramisini ri Pilatus untu' poloi ajéna sining tau iya puraé risalli sibawa panonnoi sining ujuéro polé ri aju sallié.

³² Nanalaona iyaro sining prajuri'é nanapoloi lebbi riyolo ajéna iya duwa tau risallié silaong Yésus.

³³ Wettunna mennang lettu ri Yésus, naitani mennang maténi. Jaji dé'na napoloi ajé-Na.

³⁴ Iyakiya sala séddinna polé risining prajuri'éro gajangngi benrénna Yésus sibawa bessi; nassuna daraé sibawa uwai.

³⁵ Tau iya mitaéngngi kajajiyangngéro, aléna ritu curitai gau'éro, kuwammengngi namumateppe'to. Na tongengngi asabbiyannaro, sibawa naissengngi makkedaé tongeng iyaro.

³⁶ Kajajiyangngi iyaro kuwammengngi nakajajiyang aga iya tarokié ri laleng Kitta'é, iyanaritu “Dé' séddi bukun-Na ripolo”.

³⁷ Ri laleng Kitta'é taroki towi, “Naitai matu mennang iya puraé mennang nagajang.”

Rikuburu'na Yésus

³⁸ Purairo méllau paramisini Yusuf polé ri Arimatéa ri Pilatus untu' malai ujuna Yésus. (Yusuf iyanaritu ana' gurunnai Yésus iyakiya secara subbu-subbui, saba' métaui risining panguwasana Yahudié.) Naripalalona ri Pilatus, jaji laoni malai ujuna Yésus.

³⁹ Nikodémus iya laowé riyolo ri Yésus ri wennié, lao towi silaong Yusuf. Nikodémus tiwi rampa-rampa mur sibawa gaharu – iya manenna kira-kira telluppulo kilo égana.

⁴⁰ Iya duwa tauwéro nalani ujuna Yésus nainappa nadoko sibawa kaing pawwalu silaong iyaro rampa-rampa wangié situru ade' mattampunna tau Yahudié.

⁴¹ Ri onronna Yésus risalli engka séddi tammeng. Ri lalenna tammengngéro engka séddi kuburu' baru, iya dé'éppa naengka naripaké untu' kuburu'i tauwé.

⁴² Nasaba iyaro kuburu'é macawé'i, namawé' toni mappammula esso Saba'é, nakuburu'ni mennang Yésus kuwaro.