YOHANES 18 - KITTA KAREBA MADECENG

Ritikkenna Yésus

¹ Puranana Yésus massempajang makkuwaro, laoni sibawa ana'-ana' gurun-Na ri liwenna Salo Kidron. Engka séuwa tammeng kuwaro, nanauttama'na Yésus sibawa ana'-ana' gurun-Na ri tammengngéro.

² Iyaro Yudas, tau bali'bellaé, naisseng iyaro onrongngé; saba' biyasai Yésus maddeppungeng kuwaro sibawa ana'-ana' gurun-Na.

³ Nalaona Yudas ri onrongngéro sibawa tiwi sipasukang tentara Romawi sibawa siyagangngaré pengawalna Bolana Puwangngé iya risuroé ri kapala-kapala imangngé sibawa sining tau Farisié. Tiwii mennang senjata, pajjennangeng sibawa sulo.

⁴ Naisseng maneng Yésus iya maéloé kajajiyang lao ri Aléna. Jaji naddeppérini sining tauwéro nanakkuta-Na, “Niga musappa?”

⁵ Nappébali mennang, “Yésus, tau Nazarét-é.” Nakkeda Yésus, “Iyya'naé.” Iyaro Yudas tau bali'bellaé tettonni kuwaro silaong mennang.

⁶ Wettunna Yésus makkeda lao ri mennang, “Iyya'naé,” soro manenni mennang namabuwang ri tanaé.

⁷ Siseppi Yésus makkutana lao ri mennang, “Niga musappa?” Nappébali mennang, “Yésus tau Nazarét-é.”

⁸ Nakkeda Yésus, “Purani Upowada, Iyya'naé. Rékko mémeng musappa-Ka, leppessangngi mennangngé laingngé lao.” (

⁹ Ri laleng makkeda makkuwannaro, kajajiyangngi aga pura napowada Yésus riyolona: “Ambo', polé risining tau tawéréngngékka Ambo', muwi séddi tau dé'to gaga teddéng.”)

¹⁰ Simon Pétrus iya tiwié sipeppa peddang, narampuni nanawettai atanna imang lompoé angkanna massarang daucculing ataunna. Asenna iyaro ataé Malkus.

¹¹ Nakkeda Yésus lao ri Pétrus, “Puttama'i paimeng peddammu ri laleng wanuwanna! Muwasengngiga dé' Uwénungngi matu énungeng anrasa-rasang iya nawéréngngék-Ka Ambo'é?”

Ritiwina Yésus mangolo ri Hanas

¹² Nainappa prajuri'-prajuri' Romawi sibawa komandanna enrengngé sining pengawalna Yahudié tikkengngi sibawa siyoi Yésus.

¹³ Bunge'-bunge'na natiwii mennang Yésus mangolo ri Hanas, matuwa worowanéna Kayafas. Kayafas iyanaritu imang lompo ri taungngéro.

¹⁴ Na aléna ritu pura pangajariwi sining panguwasana Yahudié makkedaé lebbi kessing muwi séddié tau maté untu' sininna bangsaé.

Pétrus massakkarengngi Yésus

¹⁵ Simon Pétrus sibawa séddi ana' gurun-Na laingngé maccowériwi Yésus. Ana' gurun-Na iya laingngéwé riissengngi ri imang lompoé; jaji maccowé toni muttama' sibawa Yésus ri seddé bolana imang lompoé,

¹⁶ na Pétrus mattajeng ri saliweng, ri sumpangngé. Nainappa iyaro ana' gurun-Na iya laingngé laoni ri saliweng namabbicara sibawa pattumani makkunraié iya jagaiyéngngi sumpangngé, nappa natiwi Pétrus muttama' ri laleng.

¹⁷ Nakkeda iyaro pattumani makkunraié lao ri Pétrus, “Héi, dé'ga na ikoto sala séddinna ana' gurunna tauwéro?” Nappébali Pétrus, “Tenniya.”

¹⁸ Iyaro wettué makeccé hawaé, jaji sining pattumanié sibawa sining pengawal-é purani palluwa api osing naddellang mennang kuwaro. Laoni Pétrus kuwaro natettong maddellang silaong mennang.

Imang lompoé tutui Yésus

¹⁹ Makkutanani imang lompoé lao ri Yésus passalenna ana'-ana' gurun-Na sibawa passalenna pappagguruwan-Na.

²⁰ Nappébali Yésus, “Tuli mabbicara-Ka terus terang ri yolona tau maégaé. Tuli mappagguru-Ka risining bola assompangngé sibawa ri Bolana Allataala, onronna biyasa maddeppungeng tau Yahudié. Dé' naengka Uwakkedada sibawa usubbu-subbu.

²¹ Jaji magi Puwang tatanai-Ka? Tanaiwi mennang iya puraé méngkalinga-Ka mappagguru. Tentu naisseng mennang aga Upowada.”

²² Wettunna Yésus makkeda makkuwaro, sala séddinna pengawal-é kuwaro leppa'i sibawa makkeda, “Barani senna'-Ko mabbicara makkuwaro lao ri imang lompoé!”

²³ Nappébali Yésus, “Rékko engka séuwa Upowada sala, powadani kuwaé aga salana! Iyakiya rékko iyaro Upowadaé mémeng tongengngi, magi muleppa'-Ka?”

²⁴ Nainappa Hanas suroi tauwé tiwii Yésus sibawa ribalenggu lao ri Imang Lompoé Kayafas.

Pétrus massakkarengngi Yésus

²⁵ Tettong mupi Simon Pétrus maddellang kuwaro. Nakkeda sining tauwé lao ri aléna, “Tenniyaga ikoto ana' gurunna tauwéro?” Iyakiya massakkai Pétrus, adanna, “Tenniya!”

²⁶ Engka séddi atanna imang lompoé, iyanaritu kaluwargana polé ri tau iya narette'é Pétrus daucculinna, makkeda, “Dé'ga nauwita tokko ri tammengngéro silaong Yésus?”

²⁷ Nassakkasi Pétrus, “Dé',” – na iyatoro wettué naoni manu'é.

Mangolona Yésus ri Pilatus

²⁸ Maélé senna'ni mennang tiwii Yésus polé ri bolana Kayafas lao ri saorajana gubernur-é. Sining tau Yahudié dé' nauttama ri laleng saorajaé, kuwammengngi dé' nanajisi' secara agama, nasaba maéloi maccowé manré nanré Paska.

²⁹ Rimakkuwannanaro laoni Pilatus ri saliweng ri mennang nanakkutana, “Aga pappotane'mu lao ri tauwéwé?”

³⁰ Nappébali mennang, “Akkalarapanna dé' napasala, dé' tatiwii lao ri Bapa' Gubernur.”

³¹ Nakkeda Pilatus lao ri mennang, “Alani namuwadélékiwi situru hukkummu!” Iyakiya mappébaliwi iyaro sining tau Yahudié, “Dé' naweddikki hukkung matéi tauwé.” (

³² Kajajiyangngi iyaé kuwammengngi nakajajiyang aga napowada Yésus passalen-Na pékkugi cara-Na maté matti.)

³³ Muttama'ni paimeng Pilatus ri saorajaé, nanaobbii Yésus, nainappa makkutana, “Ikoga arunna tau Yahudié?”

³⁴ Nappébali Yésus, “Polé ri alénaga puwang iyaé pakkutanaé iyaré'ga engka tau laing pura paissengiwi puwang passalenna alé-Ku?”

³⁵ Nappébali Pilatus, “Tau Yahudika'ga iyya'é? Iya mabbéréyangngék-Ko lao ri iyya iyanaritu bangsa-Mu muto sibawa kapala-kapala imangngé. Aga pura Mupogau'?”

³⁶ Nakkeda Yésus, “Akkarungek-Ku dé' napolé ri linoéwé. Ebara'na akkarungek-Ku poléi ri linoéwé, sining tauk-Ku méwai matu kuwammengngi na aja' nariyabbéréyak-Ka lao risining panguwasana Yahudié. Iyakiya mémeng akkarungek-Ku dé' napolé ri linoéwé!”

³⁷ Nakkutana Pilatus ri Aléna, “Rékko makkuwaitu, aruk-Kotu?” Nappébali Yésus, “Tapowadai puwang makkedaé Iyya'é arung. Jaji-Ka sibawa lao-Ka ri linoé untu' séddi akkatta, iyanaritu mabbéré asabbiyang passalenna atongengengngé. Tau iya polé ri atongengengngéro naéngkalinga-Ka.”

³⁸ Nakkutana Pilatus ri Aléna, “Aga bettuwanna atongengengngé?” Nanassusi Pilatus polé ri saorajaé nanakkeda risining tau Yahudié, “Dé'gaga muwi séddi asalang ulolongeng ri Aléna.

Rihukkung maténa Yésus

³⁹ Iyakiya manuru' abiyasammu, tuli malleppessakka séddi tau tarungku ri Esso Maraja Paskaé. Maélokoga kuwammengngi uleppessangekko arunna tau Yahudié?”

⁴⁰ Nappébalina mennang sibawa gora-gora, “Dé' na iyaro, iyakiya Barabas!” (Barabas iyanaritu séddiwi parampo.)