YOHANES 16 - KITTA KAREBA MADECENG

¹ Iya manennaro Upaissengiko kuwammengngi nadé' muwassuriwi atepperemmu.

² Ripassuko matu polé risining bola assompangngé. Napoléi matu wettunna makkedaé tau iya mpunoékko nasekko matu mattumani lao ri Allataala.

³ Napogau'i mennang lao ri iko saba' dé' naissengngi Ambo'é sibawa Iyya.

⁴ Iyakiya makkekkuwangngé Upowadakko iyaro, kuwammengngi rékko kajajiyangngi matu, muwéngngeranni makkedaé purano Upowadang.” “Iyaé gau'é dé' Upaissengiko polé ri pammulanna, saba' Usibawang mupo.

Jama-jamanna Rohna Allataala

⁵ Iyakiya makkekkuwangngé maélo-Ka lao ri iya suroék-Ka; nadé' séddi tau polé ri iko makkutana kéga-Ka lao.

⁶ Makkekkuwangngé mala tassinnau atimmu, saba' Upowadai gau'éro lao ri iko.

⁷ Iyakiya Upowadai iya tongengngé lao ri iko: Lebbi kessing muwi untu' iko, rékko lao-Ka; saba' rékko dé' Ulao, iyaro Pattulungngé dé' matu napolé ri iko. Iyakiya rékko lao-Ka, Usoroi matu Aléna lao ri iko.

⁸ Rékko poléi, napannessai matu lao ri linoé bettuwang tonget-tongenna dosaé, polé ri aga iya tongengngé, sibawa polé ri pahukkungenna Allataala.

⁹ Napannessai matu makkedaé dé' namateppe' ri Iyya iyanaritu dosa;

¹⁰ makkedaé tongek-Ka, nasaba laoka ri Ambo'é nadé'na muwitaka matu paimeng;

¹¹ sibawa makkedaé mappammulani Allataala pahukkung, saba' purani rihukkung panguwasana linoé.

¹² Maéga mupa maélo upowada lao ri iko, iyakiya dé'pa mulléi tarimai makkekkuwangngé.

¹³ Iyakiya rékko poléni iyaro Roh-é, iyanaritu iya pannessaéngngi atongengengngé passalenna Allataala, Napimpikko matu untu' missengngi sininna atongengengngé. Dé'na nabbicara matu polé ri Aléna iyakiya napowadai aga pura naéngkalinga, sibawa napaissengiko matu aga maéloé kajajiyang ri esso ri munri.

¹⁴ Napakaraja-Ka matu, saba' aga Napalettu ri iko, Natarimai polé ri Iyya.

¹⁵ Sininna engkaé ri Ambo'é iyanaritu appunnangekku. Iyanaro saba'na Uwakkeda makkedaé aga napalettu Roh-é lao ri iko, Natarimai polé ri Iyya.”

Asussang sibawa arennung

¹⁶ “Dé'na namaitta nadé'na muwitaka matu, sibawa céddé' mani wettunna muwita-Ka.”

¹⁷ Siyagangngaré ana'-ana' gurunna Yésus mappammula makkutana séddié lao ri laingngé, “Aga akkattana nakkeda makkuwaro lao ri Idi: ‘Céddé' mani wettunna nadé' muwita-Ka matu, sibawa céddé' tommani wettunna muwita-Ka matu?’ Aga topa akkattana: ‘Lao-Ka ri Ambo'é?’ ”

¹⁸ Makkutanai mennang matteru, “Aga bettuwanna, ‘Céddé' mani wettunna’? Dé' naripahang passaleng aga nabicara!”

¹⁹ Naissengngi Yésus maéloi mennang makkutana ri Aléna. Jaji makkedani, “Makkeda-Ka onna, ‘Céddé' mani bawang wettunna, dé' namaitta-Ka matu, sibawa céddé' tommani wettunna muwita-Ka matu.’ Iyagaro mupersoalkang ri yelle'mu?

²⁰ Ateppe'no, teriko matu sibawa mpating, iyakiya marennui matu linoé. Masussai atimmu matu, iyakiya iyaro asussammu tappinrai matu mancaji arennung.

²¹ Rékko séddié makkunrai mawé'ni mémmana', masussai, saba' wettunnana manrasa-rasa. Iyakiya jajinnana ana'na, iyaro makkunraié nallupaiwi anrasa-rasanna matu nasaba marennui makkedaé séddi ana'lolo jaji ri linoé.

²² Makkuwatoro sibawa iko: makkekkuwangngé masussai atimmu, iyakiya maélo-Ka sita paimeng sibawa iko, namarennu atimmu; nadé' séddi tau mulléi malai arennummuro polé ri atimmu.

²³ Iyaro essoé dé' agagana muwakkutanang matu lao ri Iyya. Ateppe'no: Agi-agi muwéllau lao ri Ambo'é ri laleng asek-Ku, nabéréyangngi matu iyaro Ambo'é lao ri iko.

²⁴ Narapi makkekkuwangngé dé'pa agaga muwéllau ri laleng asek-Ku. Ellauni, namutarimai matu, kuwammengngi nasukku arennummu.”

Apakalangngé lao ri linoé

²⁵ “Iya manennaé Upowadakko sibawa rapang-rapang. Iyakiya engka matu napolé wettunna, nadé' Upaké rapang-rapang, iyakiya mabbicara terus terang lao ri iko passalenna Ambo'é.

²⁶ Iyaro wettué muwéllauwi matu ri Ambo'é ri laleng asek-Ku; issenni, dé' Umaélo matu méllaungekko polé ri Ambo'é,

²⁷ nasaba aléna Ambo'é mamaséiko. Namaséiko nasaba mumaséi-Ka, sibawa mateppe' makkedaé polé-Ka ri Allataala.

²⁸ Mémeng assalek-Ku poléi ri Ambo'é, naulao ri linoé. Iyakiya makkekkuwangngé Usalaini linoé untu' lisu ri Ambo'é.”

²⁹ Nanakkeda ana'-ana' gurunna Yésus lao ri Yésus, “Makkekkuwangngé mabbicaraki Puwang terus terang sibawa dé' tapaké rapang-rapang,

³⁰ nariissenni makkedaé taisseng manenni Puwang. Dé' naparellu séddié tau makkutangngi agi-agi lao ri Puwang. Rimakkuwannanaro mateppe'ki poléki Puwang ri Allataala.”

³¹ Nappébalina Yésus lao ri mennang, “Jaji mateppe'ko makkekkuwangngé?

³² Engngerangngi! Poléi matu wettunna, mala engkani, ripassara-sarakko matu. Lisuko matu tungke'-tungke' ri bolamu namusalai-Ka alé-alé-Ku. Iyakiya dé' Uriyalé-alé saba' Ambo'é engkai sibawak-Ka.

³³ Iya manennaé Upowadai kuwammengngi mulolongeng asaléwangeng nasaba masséddiko sibawa Iyya. Ri linoé manrasa-rasako matu. Iyakiya pakkasse'i atimmu! Purani Ucau linoé!”