YOHANES 15 - KITTA KAREBA MADECENG

Yésus pong anggoro iya tongengngé

¹ Makkedasi Yésus, “Iyya'na pong anggoro tongengngé, na Ambo'-Ku iyanaritu paddare'na.

² Tungke' takké-Ku iya dé'é nakkébuwa, narette'i, sibawa tungke' takké mabbuwaé, nakurangiwi daunna sibawa Napaccingiwi kuwammengngi nalebbi maégapasi buwana.

³ Mapaccinno iko nasaba pappagguruwang iya Uwéréngngékko.

⁴ Tette'no masséddi sibawa Iyya, na Iyya tette tokka matu masséddi sibawa iko. Iyaro takké dé' naulléi makkébuwa, sangadinna rékko tette'i ri ponna. Makkuwatoniro iko, iya bawang mulléi mabbuwa rékko tette'ko masséddi sibawa Iyya.

⁵ Iyya'na pong anggoro, na iko takké-takkéna. Tau iya tette'é masséddi sibawa Iyya, na Iyya sibawa aléna, mabbuwai matu maéga; saba' rékko dé' nasibawa Iyya, dé' agaga mullé pogau'.

⁶ Tau iya dé'é natette' masséddi sibawa Iyya, riyabbéyangngi matu pada-pada takké, namancaji marakko. Takké-takké iya pada-padaéro ripaddeppungengngi matu, nariyabbéyang ri apié, nainappa ritunu.

⁷ Rékko tette'ko masséddi sibawa Iyya enrengngé pappagguruwak-Ku monroi ri laleng atimmu, éllauni ri Ambo'é; agi-agi muwacinnai; iyaro paréllaummu ripaddupai matu.

⁸ Rékko mabbuwako maéga, Ambo'-Ku ripakaraja; narimakkuwannanaro tonget-tongekko mancaji ana' guruk-Ku.

⁹ Pada-pada Ambo'é mamaséiko, makkuwatoniro Iyya mamaséiko. Sitinajako tette tuwo selaku tau iya Uwamaséiyé.

¹⁰ Rékko mupajoppai parénta-parénta-Ku, tette'ko matinulu ri pammasé-Ku, pada-pada Iyya tette matinulu ri pammaséna Ambo'é nasaba pajoppai parénta-parénta-Na.

¹¹ Iya manennaé Upaissengiko, kuwammengngi arennuk-Ku engkai ri laleng atimmu, sibawa mancaji sukku arennummu.

¹² Iyanaé paréntaku: Amaséiwi séddié lao ri laingngé, pada-pada Iyya mamaséiko.

¹³ Tau iya kaminang mamaséiyéngngi sellao-sellaona iyanaritu tau iya mabbéréyangngi atuwonna untu' mennang.

¹⁴ Iko iyanaritu sellao-sellao-Ku, rékko mupogau'i aga iya Uparéntangengngékko.

¹⁵ Dé'na Uwobbiko ata, saba' ataé dé' naissengngi aga napogau' puwanna. Uwobbiko sellao, saba' sininna Uwéngkalingaé poléi ri Ambo'é, pura manenni Upaissengiko.

¹⁶ Tenniya iko pilé-Ka. Iyya ritu piléko, sibawa suroko lao untu' mabbuwa maéga – buwa-buwa iya dé'é nawedding binasa. Nawérékko Ambo'é agi-agi muwéllau ri Aléna ri laleng asek-Ku.

¹⁷ Iyanaé parénta-Ku lao ri iko: Amaséiwi séddié lao ri laingngé.”

Linoé nabenciko

¹⁸ “Rékko nabenciko linoé, éngngerangngi makkedaé Iyya, lebbi riyolo mémenna nabenci linoé.

¹⁹ Akkalarapanna nappunnangiko linoé, namaséiko matu linoé selaku appunnangenna. Iyakiya purano Upilé polé ri linoéwé, jaji tenniyano appunnangenna linoé. Iyanaro saba'na nabenciko linoé.

²⁰ Engngerangngi aga pura Upowadakko, ‘Ataé dé' nalebbi battowa naiya puwanna.’ Rékko purai mennang napanrasa-rasa-Ka, napanrasa-rasa tokko matu. Rékko naturusiwi pappagguruwak-Ku, naturusi towi matu pappagguruwammu.

²¹ Iya manennaro napogau'i matu mennang lao ri iko, nasaba ana' guruk-Kuko, saba' dé' naissengngi iya suroék-Ka.

²² Akkalarapanna dé' Upolé sibawa dé'na Upowadai iya manennaro lao ri mennang, dé' mennang namadosa. Iyakiya makkekkuwangngé dé'na mennang nappunnai alasang untu' dosana mennang.

²³ Tau iya benciyék-Ka, nabencito Ambo'-Ku.

²⁴ Akkalarapanna ri tengnga-tengngana mennang dé' Upogau'i gau'-gau' iya dé'éppa naengka napogau'i tau laingngé, dé'na namadosa mennang. Iyakiya makkekkuwangngé purani naita aga iya Upogau'é, nanabenci-Ka mennang sibawa Ambo'-Ku.

²⁵ Iyakiya mémeng harusu'i makkuwaro, kuwammengngi kajajiyangngi aga taroki ri laleng Kitta Hukkunna mennang, iyanaritu: ‘Nabenci-Ka mennang temmakkéalasang.’

²⁶ Usuroi matu lao ri iko Pattulung iya polé ri Ambo'é. Iyanaritu Roh iya pannessaéngngi matu atongengeng passalenna Allataala. Rékko poléi, mabbéréi matu asabbiyang passalek-Ku.

²⁷ Na iko harusu' tokko mabbéré asabbiyang passalek-Ku, saba' sibawa Iyya mémenni mappammulai ri pammulanna.