YOHANES 14 - KITTA KAREBA MADECENG

Yésus iyanaritu laleng lao ri Ambo'é

¹ Nakkeda Yésus lao ri mennang, “Aja' namasara atim-Mu. Ateppe'no ri Allataala sibawa ateppe' tono lao ri Iyya.

² Ri Bolana Ambo'-Ku engka maéga onrong maddibola. Lao-ka kuwaro untu' passadiyangekko onrong. Dé' Uwakkeda makkuwaro matu lao ri iko, akkalarapanna dé' nakkuwaro.

³ Purakuna passadiyangekko onrong, lisu-Ka matu duppaiko, kuwammengngi kéga-Ka engka, engka tokko matu kuwaro.

⁴ Ri onrong Ulaoiyé muwissenni lalenna.”

⁵ Nakkeda Tomas lao ri Yésus, “Puwang, dé' nariisseng kégaki Puwang lao, pékkugiki missengngi lalenna?”

⁶ Nappébali Yésus, “Iyya'na laleng untu' missengngi Allataala sibawa lolongengngi atuwongngé. Dé' séddi tau mulléi lao ri Ambo'é, rékko dé' naola-Ka.

⁷ Akkalarapanna muwissek-Ka, tentu muwisseng towi matu Ambo'-Ku. Makkekkuwangngé muwissenni sibawa purana-Na muwita.”

⁸ Nakkeda Filipus lao ri Yésus, “Puwang, paitaki Ambo'é; kuwammengngi tamasennang.”

⁹ Iyakiya mappébaliwi Yésus, “Makkuwamani ittana Usibawakko, nadé'paha muwissek-Ka, Filipus? Tau iya puraé mita-Ka, purani naita Ambo'é. Pékkugiko wedding makkeda, ‘Jellokekki Ambo'é?’

¹⁰ Filipus! Dé'ga mumateppe, makkedaé masséddi-Ka sibawa Ambo'é, na Ambo'é masséddiwi sibawa Iyya? Aga Upowadakko, dé' Upowadai polé ri alé-Ku. Ambo' iya tette'é masséddi sibawa Iyya, Aléna ritu jama manengngi.

¹¹ Ateppe'ko ri Iyya, makkedaé masséddi-Ka sibawa Ambo'é na Ambo'é masséddiwi sibawa Iyya. Iyaré'ga kaminang dé'na, ateppe'no nasaba aga puraé Upogau'?

¹² Tongeng senna' adak-Kué: Tau iya mateppe'é ri Iyya, napogau'i matu aga iya puraé Upogau' – mala napogau'i matu iya lebbi battowaéppasi – saba' lao-Ka ri Ambo'é.

¹³ Na agi-agi muwéllau ri laleng asek-Ku, Upogau'i iyaro untu' alému, kuwammengngi naripakaraja Ambo'é naolai Ana'é.

¹⁴ Agi-agi muwéllau ri laleng asek-Ku, Upogau'i matu.”

Najjanciyanna Yésus Rohna Allataala

¹⁵ “Rékko muwamaséi-Ka, mupajoppai parénta-parénta-Ku.

¹⁶ Uwéllauwi matu ri Ambo'é, nanawérékko matu Pattulung laing, iya monroé matu sibawakko lettu mannennungeng.

¹⁷ Aléna Rohna Allataala iya pannessaéngngi matu atongengengngé passalenna Allataala. Dé' naulléi linoé tarimai, saba' dé' naitai iyaré'ga naissengngi. Iyakiya iko muwissengngi, nasaba monroi sibawakko enrengngé maélona masséddi sibawa iko.

¹⁸ Dé' Usalaiko alé-alému pada-pada ana' biué. Maélo-Ka lisu ri iko.

¹⁹ Dé'na namaitta nadé' naita-Ka matu linoé. Iyakiya iko muwita-Ka. Sibawa nasaba tuwo-Ka, tuwo tokko matu.

²⁰ Rékko narapini essoéro, muwissengngi matu makkedaé masséddi-Ka sibawa Ambo'é, masséddiko sibawa Iyya, na Iyya masséddi sibawa iko.

²¹ Tau iya tarimaéngngi parénta-parénta-Ku sibawa napogau'na, iyanaritu mamaséiyék-Ka. Namaséiwi matu Ambo'-Ku tau iya mamaséiyékko. Uwamaséi towi iyaro tauwé sibawa Uwappaitanna alé-Ku lao ri aléna.”

²² Yudas (tenniya Yudas Iskariot) makkutana ri Yésus, “Puwang, magi Puwang tamaélo mappaitangngi aléta lao ri idi tenniya lao ri linoé?”

²³ Nappébali Yésus, “Tau iya mamaséiyékka, naturusiwi pappagguruwak-Ku. Ambo'-Ku mamaséiwi. Ambo'é sibawa Iyya laowi matu ri aléna sibawa monroi sibawangngi.

²⁴ Tau iya dé'é namaséi-Ka, dé' naturusiwi pappagguruwak-Ku. Pappagguruwang iya Uwéngkalingaéro, dé' napolé ri Iyya, sangadinna poléi ri Ambo iya suroék-Ka.

²⁵ Iya manennaro Upowadakko ri wettu Usibawammu mupa.

²⁶ Iyakiya Rohna Allataala, Pattulung iya nasuroé matu Ambo'é ri laleng asek-Ku, Aléna matu pagguruko sini-sininnaé sibawa paréngngerangiko lao ri sininna iya puraé Upaissengiko.

²⁷ Asaléwangeng Utarongekko. Asaléwangek-Ku Uwérékko. Iya Uwabbéréyangngéro dé' napada-pada nabbéréyangngé linoé lao ri iko. Aja' mumausé, aja' mumétau.

²⁸ Pura-Ka muwéngkalinga makkeda, ‘Maélo-Ka lao, iyakiya maélo-Ka lisu paimeng ri iko.’ Rékko muwamaséi-Ka, masenna'ko matu rékko lao-Ka ri Ambo'é, saba' lebbi battowai Ambo'é naiya Iyya.

²⁹ Upaissengiko iyaro makkekkuwangngé, riwettu dé'napa nakajajiyang maneng, kuwammengngi rékko kajajiyangngi matu, mateppe'ko matu.

³⁰ Dé' namaéga Upowada matu lao ri iko, saba' narapini wettunna panguwasana linoéwé polé. Iyakiya dé' nakuwasaiwi alé-Ku.

³¹ Iyakiya harusu' manengngi kajajiyang kuwammengngi namainge' linoé makkedaé Uwamaséiwi Ambo'é sibawa Upogau'na sininna iya napparéntangngé Ambo'é lao ri Iyya. Nah, laono mai talao polé kuwaé.”