YOHANES 13 - KITTA KAREBA MADECENG

Yésus bissaiwi ajéna ana'-ana' gurun-Na

¹ Siesso riwettu dé'napa na Esso Maraja Paskaé, naissenni Yésus makkedaé narapini wettunna Yésus salaiwi linoéwé untu' lisu ri Ambo'-Na. Namaséiwi sining tau iya mancajiyé appunnangen-Na ri linoé, natette'i namaséi mennang lettu paccappureng.

² Yésus sibawa ana'-ana' gurun-Na mattengngang manré wenni. Purani naputtama' Ibillisi'é ri laleng atinna Yudas ana'na Simon Iskariot niya' untu' bali'bellariwi Yésus.

³ Naissenni Yésus makkedaé pura nabbéréyanni Ambo'é sininna akuwasangngé lao ri Aléna. Naisseng towi makkedaé poléi ri Allataala sibawa maéloi lisu ri Allataala.

⁴ Rimakkuwannanaro tettonni ludungngi jumba-Na, nanasiyoi handu babuwa-Na.

⁵ Purairo tiwini uwai ri laleng séddié katowang, nappammula bissaiwi ajéna ana'-ana' gurun-Na enrengngé rakkoiwi sibawa handu iya tassiyoé ri babuwa-Na.

⁶ Narapinana Simon Pétrus, makkedani, “Puwang, masakang idi Puwang bissaiwi ajéku?”

⁷ Nappébali Yésus, “Dé' mupahangngi. Makkekkuwangngé aga iya Upogau'é, iyakiya mupahang muwatu matu.”

⁸ Nakkeda Pétrus lao ri Yésus, “Aja' Puwang. Aja' sises-siseng Puwang tabissaiwi ajéku!” Iyakiya mappébaliwi Yésus, “Rékko dé' Ubissaiko, dé'gaga assisumpungek-Ku sibawa iko.”

⁹ Nakkeda Simon Pétrus, “Rékko makkuwaitu Puwang, aja' na ajéku bawang iyakiya lima sibawa ulukkuto!”

¹⁰ Nakkeda Yésus lao ri Pétrus, “Tau puraé cemmé, mapaccing manenni watakkaléna. Dé'na naparellu ripaccingina; sangadinna ajéna. Mapaccinno iko, iyakiya dé' naiya maneng.” (

¹¹ Naissengngi Yésus niga bali'bellariwi matu. Iyanaro saba'na nakkeda, “Mapaccinno iko, iyakiya dé' naiya maneng.”)

¹² Puranana Yésus nabissai ajéna mennang, napakéni paimeng jumba-Na nanatudassi. Nappa makkeda lao ri mennang, “Mupahagga iya nappaé Upogau' lao ri iko?

¹³ Muwobbi-Ka Guru sibawa Puwang. Na mémeng makkuwaro.

¹⁴ Rékko Iyya selaku Puwang sibawa Gurummu bissaiwi ajému, sitinaja tokko sibissai ajé.

¹⁵ Uwérékko iyaé contoé, kuwammengngi mupogau' towi aga iya puraé Upogau' lao ri iko.

¹⁶ Tongeng senna' adak-Kué: Séddié ata dé' nalebbi battowa polé ri puwanna, sibawa séddié suro dé' nalebbi battowa polé ri iya suroéngngi.

¹⁷ Rékko muwissengngi iya manennaé, masennanno rékko mupogau'i.

¹⁸ Aga iya Upowadaéwé tenniya iko maneng nakenna. Uwisseng niga-niga iya puraé Upilé. Iyakiya aga iya tarokié ri laleng Kitta'é, harusu'i kajajiyang, iyanaritu ‘Tau iya sisamaék-Ka manré, naéwa-Ka matu.’

¹⁹ Iyaro gau'é Upalettukekko makkekkuwangngé, riwettu dé'napa nakajajiyang, kuwammengngi rékko kajajiyangngi matu iyaro gau'é, mateppe'ko matu makkedaé Iyya'naé iya riteppué IYYA ENGKA.

²⁰ Tongeng senna' adak-Kué: Niga tarimai tau iya Usuroé, natarima-Ka. Na niga tarima-Ka, natarimai iya suroék-Ka.”

Nabotona Yésus passalenna tau maéloé bali'bellariwi

²¹ Puranana Yésus makkeda makkuwaro, masé' senna'ni. Nappa makkeda, “Tongeng senna' adak-Kué: Sala séddinna polé ri yelle'mu bali'bellari-Ka matu.”

²² Hérang senna'ni ana'-ana' gurun-Na sisullé sitangnga nasaba dé' naissengngi niga naseng.

²³ Ana' guru iya mamaséiyéngngi Yésus tudangngi ri seddéna Yésus.

²⁴ Nabbéréna tanrang Simon Pétrus lao ri aléna, kuwammengngi nakkutana ri Yésus niga nakkattai.

²⁵ Naddeppéna iyaro ana' gurué ri Yésus, nanakkutana, “Niga Puwang?”

²⁶ Nappébali Yésus, “Tau iya Uwéréngngé roti iya Upajajje'é ri laleng mangko'é, iyanaritu taunna.” Nalana Yésus sipolo roti, napajajje'i ri laleng mangko'é; nappa nawéréng Yudas ana'na Simon Iskariot.

²⁷ Natarimana Yudas iyaro rotié, muttama'ni Ibillisi' ri laleng atinna. Nainappa makkeda Yésus lao ri aléna, “Pogau'ni masitta aga maélo mupogau'.”

²⁸ Dé' séddi polé ri mennang iya tudangngé manré kuwaro pahangngi magi Yésus nakkeda makkuwaro lao ri Yudas.

²⁹ Engka masengngi Yésus suroi Yudas melli anu iya riyapparelluwangngé untu' ramé-raméro, iyaré'ga mpéréngngi céddé dowi tau kasiyasié – saba' Yudas iyanaritu pakkatenning dowina mennang.

³⁰ Natarimana Yudas iyaro rotié, matteruni massu. Mawenni toni.

Parénta iya barué

³¹ Labe'nana Yudas, makkedani Yésus, “Ripakarajani Ana'na Tolinoé makkekkuwangngé, naripakarajato Allataala naolai Aléna.

³² Rékko ripakarajai Allataala naolai Aléna, ripakaraja towi matu ri Allataala naolai Aléna muto. Na Allataala pakarajai matu sibawa masitta.

³³ Ana'-ana'-Ku, dé'na namaitta Uwonro sibawakko. Musapak-Ka matu, iyakiya pada-pada iya puraé Upowada lao risining panguwasana Yahudié, makkuwatoro Upowadakko matu; ri onrong Ulaoiyé, dé' mulléi lao.

³⁴ Parénta baru Uwérékko: Amaséi séddié lao ri laingngé. Pada-pada Iyya mamaséiko, makkuwatoniro iko harusu' siyamaséi.

³⁵ Rékko siyamaséiko, naissengngi matu sininna tauwé makkedaé iko ana'-ana' guruk-Ku.”

Ribotona makkedaé Pétrus massakkarengngi matu Yésus

³⁶ Nakkutana Simon Pétrus lao ri Yésus, “Puwang, kégaki maélo lao Puwang?” Nappébali Yésus, “Kéga-Ka lao, dé' mulléi maccowé makkekkuwangngé. Muwaccowéri-Ka matu, ri munripi.”

³⁷ Nakkutanasi Pétrus, “Magi nadé' nawedding maccowéki Puwang makkekkuwangngé? Macenning atikku maté untu' Puwang!”

³⁸ Nappébali Yésus, “Tongegga macenning atimmu maté untu' Iyya? Issenni, riwettu dé'napa naoni matu manu'é, wékkatelluno makkeda makkedaé dé' muwissek-Ka!”