YOHANES 12 - KITTA KAREBA MADECENG

Ritirikinna minnya' wangi Yésus ri Bétania

¹ Enneng esso riwettu dé'napa na Esso Maraja Paskaé, laoni Yésus ri Bétania. Ri onrongngénnaro Lazarus monro iya puraé ripaoto' ri Yésus polé ri amaténna.

² Kuwaniro ritumaningi ri mennang, sibawa rilayani ri Marta. Lazarus sibawa sining topolé tudanni manré silaong Yésus.

³ Napoléna Maria sibawa tiwi kira-kira sitengnga liter minnya' wangi narwastu iya masuli senna'é. Iyaro minnya'é natirii ri ajéna Yésus, nainappa nalullu'i sibawa gemme'na. Namabauna sininna bolaéro nasaba minnya' wangiéro.

⁴ Iyakiya Yudas Iskariot, sala séddinna ana' gurunna Yésus – iya accappurennaé bali'bellariwi Yésus – makkeda,

⁵ “Magi nadé' naribalu minnya' wangiéro tellu ratu dowi péra' ellinna, nainappa ellinna riwéréngngi tau kasiyasié?”

⁶ Makkeda makkuwairo Yudas tenniya nasaba najampangiwi tau kasiyasié, iyakiya nasaba pangai. Biyasai mala dowi polé ri kas-é iya ritaroé ri aléna.

⁷ Iyakiya makkedai Yésus, “Leppessangngi iyaro makkunraié! Napogau'i iyaé untu' esso attampungek-Ku.

⁸ Tau kasiyasié tuli engkai ri yelle'mu, iyakiya Iyya dé'.”

Assikongkolokengngé untu' méwai Lazarus

⁹ Maéga tau Yahudi méngkalingai makkedaé engkai Yésus ri Bétania. Jaji laoni mennang kuwaro. Laowi mennang tenniya bawang nasaba Yésus, iyakiya nasaba maélo towi mitai Lazarus, iya puraé ripaoto' polé ri amaténgngé ri Yésus.

¹⁰ Iyanaro saba'na na kapala-kapala imangngé maélo towi mpunoi Lazarus;

¹¹ nasaba aléna nassabari namaéga tau Yahudi salaiwi mennang sibawa mateppe' lao ri Yésus.

Muttama'na Yésus ri Yérusalém sibawa marowa

¹² Pappa bajanana, naéngkalingani tau maégaé iya polé untu' ramé-raméiwi Paskaé makkedaé mattengnganni Yésus ri laleng allalengengngé mattuju ri Yérusalém.

¹³ Nanalana mennang daud-daung pattuku nalao duppaiwi, nagora-gorato, “Pojiwi Allataala! Ribarakkakiwi iya polé ri laleng asenna Puwangngé. Ribarakkakiwi Arunna Israélié!”

¹⁴ Lolongenni Yésus séddi kaleddé malolo mupa, nanatonangiwi. Nakajajiyanna iya tarokié ri laleng Kitta'é:

¹⁵ “Aja' mumétau, ana' makkunrainna Sion! Itai Arummu polé, tonangi si kaju ana' kaleddé!”

¹⁶ Iyaro wettué dé'pa napahangngi ana'-ana' gurunna Yésus iya manennaro. Iyakiya puranana Yésus ripakaraja sibawa amatén-Na, nappai naéngngerang mennang makkedaé iya rigaukengngéngngi risining tauwé pura tarokii ri laleng Kitta'é passalenna Aléna.

¹⁷ Sining tau iya engkaé wettunna Yésus mobbii Lazarus massu polé ri kuburu'é sibawa paoto'i polé ri amaténgngé, matteru mabbéré asabbiyang passalenna gau'éro.

¹⁸ Iyanaro saba'na nalao iyaro tau maégaé ri Yésus saba' naéngkalingai mennang makkedaé Aléna ritu pura pogau'i anu makalallaingngéro.

¹⁹ Makkedani sining tau Farisié séddié lao ri laingngé, “Dé'gaga riyullé pogau'! Ita bawanni, sininna linoé lari maccowériwi!”

Siyagangngaré tau Yunani sappai Yésus

²⁰ Ri yelle'na sining tau iya laowé ri Yérusalém untu' massompa ri ramé-raméro engkato siyagangngaré tau Yunani.

²¹ Laowi mennang ri Filipus sibawa makkeda, “Saudara, rékko weddingngi, macinnaki sita Yésus.” (Assalenna Filipus poléi ri Bétsaida ri Galiléa.)

²² Nalaona Filipus powadangngi Andréas gau'éro, nainappa sipadduwani mennang palettu'i ri Yésus.

²³ Nakkeda Yésus lao ri mennang, “Narapini wettunna Ana'na Tolinoé ripakaraja.

²⁴ Tongeng senna' adak-Kué: Rékko sibatué gandong dé' naritaneng ri laleng tanaé sibawa maté, tette'i matu sibatu. Iyakiya rékko iyaro gandong sibatué matéi, nappai mappapolé matu maéga gandong.

²⁵ Tau iya mamaséiyéngngi atuwonna, ateddéngengngi matu atuwonna. Iyakiya tau iya benciyéngngi atuwonna ri linoéwé, napiyarai matu untu' atuwong mannennungengngé.

²⁶ Tau iya maéloé tumaningi-Ka harusu'i maccowéri-Ka; kuwammengngi nasibawa-Ka matu pattumanik-Ku kégi-kégi-Ka engka. Tau iya tumaningiyék-Ka ripakalebbii matu ri Ambo'-Ku.”

Mabbicarana Yésus passalenna amatén-Na

²⁷ “Takkini-kini atik-Ku; aga harusu' Upowada makkekkuwangngé? Harusu'-Ka'ga makkeda, ‘Ambo', paleppe'-Ka polé ri wettuéwé'’? Iyakiya mala untu' péneddingiwi iyaé anrasa-rasangngé na Upoléna.

²⁸ Ambo', pakarajai asem-Mu!” Na paéngkalingana sadda polé ri langié makkeda, “Purani Upakaraja, namaélosi-Ka pakarajai.”

²⁹ Tau maégaé iya engkaé kuwaro, naéngkalingani iyaro saddaé. Makkedani mennang, “Letté iyaro!” Iyakiya engkato makkeda, “Tenniya! Malaéka' mabbicara ri Aléna!”

³⁰ Nakkeda Yésus lao ri mennang, “Iyaro saddaé paéngkalingai, tenniya untu' apentingek-Ku, iyakiya untu' apentingemmu.

³¹ Narapini wettunna makkekkuwangngé riyadéléki linoé; risulléini panguwasana linoé makkekkuwangngé.

³² Iyakiya Iyya'é, rékko purana ripakatanré ri yasé'na linoé, maélo-Ka getteng manengngi tauwé lao ri Iyya.”

³³ Makkeda makkuwairo untu' mappaitangngi pékkugi carana matu maté.

³⁴ Nakkeda tau maégaéro lao ri Aléna, “Manuru' Kitta Hukkutta, Arung Pappassalama'é tuwoi matu mannennungeng. Pékkugi-Ko wedding makkeda makkedaé Ana'na Tolinoé harusu'i ripakatanré ri yasé'na linoé? Niga iyaro Ana'na Tolinoé?”

³⁵ Nappébali Yésus, “Cinampe' bawang iyaro tajangngé engka ri yelle'mu. Jaji joppako ri wettu engkana mupa iyaro tajangngé, kuwammengngi aja' nakennako pettang. Tau iya joppaé ri laleng pettangngé dé' naissengngi kégai lao.

³⁶ Ateppe'no lao ri tajangngéro, ri wettu engkana mupa iyaro tajangngé ri iko, kuwammengngi namumancaji ana'-ana'na tajangngé.” Puranana Yésus makkeda makkuwaro, nasalaini onrongngéro sibawa dé' namaélo mappaitangngi aléna lao ri mennang.

Dé' namateppe' sining tau Yahudié

³⁷ Namuni maégani anu makalallaing napogau' Yésus ri yolona mennang, dé'to namateppe' ri Aléna.

³⁸ Nakajajiyanna aga napowadaé Nabi Yésaya, “Puwang, nigana mateppe' ri karébatta? Lao ri niga riyappaitang akuwasanna Puwangngé?”

³⁹ Iyanaro saba'na dé' naulléi mennang mateppe', saba' pura towi makkeda Yésaya, “Makkedai Allataala,

⁴⁰ ‘Upabutai matanna mennang, mébbui mennang matedde ati; kuwammengngi dé' nakkita matanna mennang, aja' nappéjeppu pikkiranna mennang. Kuwammengngi aja' mennang nalisu ri Iyya, na-Upajjappai mennang.’ ”

⁴¹ Makkeda makkuwaro Yésaya saba' purai naita arajanna Yésus, sibawa mabbicara passalen-Na.

⁴² Namuni makkuwaro, maéga tau, mala ri yelle'na panguwasa Yahudié mateppe' lao ri Yésus. Iyakiya dé' nabarani mangakuiwi terus terang, saba' métaui ajakké dé' nariyelloreng mennang ri tau Farisié muttama' ri bola assompangngé.

⁴³ Lebbi napojiwi mennang lolongeng pappoji tolino naiya pappakalebbi polé ri Allataala.

Ada-adanna Yésus maélo paadéléki

⁴⁴ Nanagora Yésus, “Tau iya mateppe'é ri Iyya, dé' na ri Iyya mateppe', iyakiya lao ri iya suroék-Ka.

⁴⁵ Na tau iya mitaék-Ka, naitai iya suroék-Ka.

⁴⁶ Engkaka ri linoéwé selaku tajang, kuwammengngi sininna tau iya mateppe'é ri Iyya dé' naonro ri laleng pettangngé.

⁴⁷ Tau iya méngkalingaéngngi pappagguruwak-Ku, iyakiya dé' naturusiwi – tenniya Iyya hukkungngi. Saba' polé-Ka tenniya untu' madélékiwi linoéwé, iyakiya untu' passalama'i.

⁴⁸ Tau iya sampéyangngék-Ka sibawa dé' naéngkalingai ada-adak-Ku, engkana madélékiwi. Ada-ada iya Upalettu'é, iyanaro matu madélékiwi ri Esso Kiyame'.

⁴⁹ Saba' dé' Uwabbicara polé ri élo alé-Ku; Ambo'é suro-Ka, Aléna ritu parénta-Ka aga harusu' Upowada sibawa Upalettu'.

⁵⁰ Na-Uwisseng makkedaé iyaro parénta-Na mabbéréi atuwong mannennungeng. Na-Upalettu'i pada-pada iya nappagguruwangngé Ambo'é lao ri Iyya.”