YOHANES 10 - KITTA KAREBA MADECENG

Pakkalarapangeng bimbala'é sibawa pakkampina

¹ “Tongeng senna' adak-Kué: Tau iya muttama'é ri laleng wakké bimbala'é lalo ri sappoé, dé' nalalo ri sumpangngé, iyakiya makkémpéi lalo ri laleng laingngé, iyaro tauwé panga sibawa parampo.

² Iyakiya tau iya muttama'é lalo ri sumpangngé, iyanaritu pakkampi bimbala'.

³ Panganrowang wakké'é timpakengngi tange', na bimbala'-bimbala'é maccowériwi saddanna ri wettu mangobbina mennang sibawa asenna tungke'-tungke' enrengngé natinrosinna massu.

⁴ Natiwinana massu iyaro sining bimbala'é, iyaro pakkampié joppani monriyolo, nasining bimbala'é maccowériwi saba' naissengngi mennang saddan-Na.

⁵ Dé' namaélo mennang maccowériwi tau laingngé, mala lariwi polé ri tauwéro, saba' dé' naissengngi saddanna.”

⁶ Nacuritai Yésus iyaro pakkalarapangngé, iyakiya dé' naissengngi mennang aga akkatta-Na.

Yésus, pakkampi makessingngé

⁷ Nainappa makkeda Yésus siseppa, “Tongeng senna' adak-Kué: Iyya'na tange' untu' bimbala'é.

⁸ Sininna iya polé ri yolo-Ku, iyanaritu panga sibawa parampo', iyakiya sining bimbala'é dé' naéngkalingai saddanna mennang.

⁹ Iyya'na tange'. Niga muttama' lalo ri Iyya salama'i matu; massu muttama'i sibawa lolongeng anré.

¹⁰ Poléi pangaé banna untu' ménnau, untu' mabbuno, sibawa untu' makkasolang. Iyakiya Iyya polé kuwammengngi nalolongeng tolinoé atuwong – atuwong maonaé.

¹¹ Iyya'na pakkampi makessingngé. Pakkampi iya makessingngé nabbéréyangngi nyawana untu' sining bimbala'na.

¹² Tau ripéssaroiyé iya tenniyaé pakkampi sibawa tenniyaétto punna iyaro sining bimbala'é lariwi salaiwi sining bimbala'éro rékko naitai polé asu ale'é. Na iyaro sining bimbala'é natikkenni matu sibawa ripassara-saranna ri asu ale'é.

¹³ Iyaro tau ripéssaroiyé lariwi, saba' majjamai untu' saro. Dé' napaduliwi sining bimbala'éro.

^14-15 Iyya'na pakkampi iya makessingngé. Pada-pada Ambo'é missek-Ka sibawa Iyya missengngi Ambo'é, makkuwatoro Uwissengngi sining bimbala'-Ku, sibawa naissek-Ku mennang. Uwabbéréyangngi nyawa-Ku untu' mennang.

¹⁶ Engka mupa bimbala'-bimbala' laing iya Uwappunnangiyétto, iya dé'é nauttama ri laleng konrong bimbala'éwé. Harusu' towi Uputtama mennang sibawa naéngkalingana matu saddak-Ku. Nancaji manengngi matu mennang sikonrong sibawa séddi pakkampi.

¹⁷ Namaséi-Ka Ambo'é saba' Uwabbéréyangngi nyawa-Ku, untu' tarimai paimeng.

¹⁸ Dé' séddi tau mulléi malai polé ri Iyya. Uwabbéréyangngi saba' élo-Ku muto. Makuwasa-Ka untu' mabbéréyangngi, sibawa makuwasa untu' malai paimeng. Iyanaro jamang iya Utarimaé polé ri Ambo'-Ku.”

¹⁹ Nasaba makkeda makkuwairo Yésus, mappammulani mappangéwang sining tau Yahudié.

²⁰ Maéga makkeda, “Nauttamakiwi sétang! Jangengngi! Untu' aga muwéngkalingai?”

²¹ Iyakiya engkato makkeda, “Tau nauttamakiyé sétang dé' nabbicara makkuwatu! Naulléga sétangngé mébbui tau butaé makkita?”

Tau Yahudié dé' namaélo tarimai Yésus

²² Ri Yérusalém sining tauwé mattengngang ramé-raméiwi Esso Maraja Rirésmikanna Bolana Puwangngé. Iyaro wettué wettu keccé.

²³ Joppai Yésus ri Légo-légona Salomo ri lalenna Bolana Puwangngé,

²⁴ wettunna sining tau Yahudié polé maddeppungeng mattulilingiwi Yésus. Makkedani mennang, “Gangka kégi-Ko maélo leppessakki bata-bata? Powadanni terus terang, rékko tonget-tongek-Ko Arung Pappassalama'é.”

²⁵ Nappébali Yésus, “Purano Upowadang, iyakiya dé' mumateppe. Jama-jamang iya Upogau'é ri laleng asenna Ambo'-Ku, mabbéré butti passalek-Ku.

²⁶ Dé' mumateppe saba' dé' mumattama bimbala'-bimbala'-Ku.

²⁷ Sining bimbala'-Ku naéngkalingai saddak-Ku. Uwisseng mennang, nanaccowéri-Ka mennang.

²⁸ Uwéréngngi mennang atuwong mannennungeng, na untu' mannennungeng dé' nabinasa matu mennang. Dé' séddi tau mulléi rampasa'i mennang polé ri limak-Ku.

²⁹ Ambo'-Ku, iya puraé mabbéréyangngi mennang lao ri Iyya, napakacauri sini-sininnaé. Nadé' séddi tau mulléi rampasa'i mennang polé ri limanna Ambo'é.

³⁰ Iyya sibawa Ambo'é iyanaritu séddimi.”

³¹ Nanalasi batu sining tau Yahudié untu' genrungngi Yésus.

³² Iyakiya makkedai Yésus lao ri mennang, “Purana muwita pogau' maéga jama-jamang makessingngé, iya nawéréngngék-Ka Ambo'é. Polé ri iya manenna jama-jamangngéro, kégana nassabari mumaélo genruk-Ka?”

³³ Nappébali sining tau Yahudié, “Tenniya nasaba jama-jamammu iya makessingngéro namaéloki genruk-Ko batu, iyakiya nasaba Mupakatunai Allataala. Iko séddiko tolino, namumaélo pancajiwi alé-Mu Allataala.”

³⁴ Nappébali Yésus, “Dé'ga nataroki ri laleng Kitta Hukkummu: Makkedai Allataala, ‘Ikona iyanaritu allataala’?

³⁵ Riissenni makkedaé aga taroki ri laleng Kitta'é kajajiyangngi lettu mannennungeng. Jaji, rékko Allataala nateppui ‘allataala’ lao risining tau iya tarimaéngngi ada-adan-Na,

³⁶ magi muwakkeda Ucella-cellai Allataala nasaba makkedak-Ku Ana'naka Allataala? Padahal napilé-Ka Ambo'é sibawa nasuro lao ri linoé.

³⁷ Rékko dé' Upogau'i jama-jamang iya nasuroéngngékka Ambo'é, aja' mumateppe lao ri Iyya.

³⁸ Iyakiya nasaba Upogau'i, ateppe'no aga iya Upogau'éro, namuni dé' mumaélo mateppe' ri Iyya. Narimakkuwannanaro muwissengngi sibawa mupahangngi makkedaé Ambo'é tette'i masséddi sibawa Iyya, sibawa Iyya tette masséddi sibawa Ambo'é.”

³⁹ Makkuragasi mennang maélo tikkengngi Yésus, iyakiya leppe'i polé ri mennang.

⁴⁰ Lisuni Yésus ri liwenna Salo Yordan, ri onronna Yohanés riyolo maccemmé, naonrona kuwaro.

⁴¹ Maéga tau lao ri Aléna. Makkedani mennang, “Yohanés dé' napogau'i sining anu makalallaingngé, iyakiya iya manenna iya napowadaé passalenna iyaé tauwé tongengngi.”

⁴² Namaégana tau kuwaro mateppe' lao ri Yésus.