YOHANES 1 - KITTA KAREBA MADECENG

Sadda iya mabbéré atuwong

¹ Ri pammulanna, dé'napa naripancaji linoé, engka mémenni Saddaé. Engkai Saddaé silaong Allataala sibawa Saddaé pada-padai Allataala.

² Pammulanna mupa nasibawa Allataala.

³ Iya manenna ripancajiwi naolai Aléna, sibawa polé ri sininna iya engkaé, dé'gaga séddi dé' naripancaji polé ri Aléna.

⁴ Iyaro Saddaé assalennai atuwongngé, na iyaro atuwongngé mabbéréi tajang lao ri rupa tauwé.

⁵ Iyaro tajangngé mattappai ri laleng pettangngé, na iyaro pettangngé dé' naulléi peddéiwi.

⁶ Poléni tau iya nasuroé Allataala, asenna Yohanés.

⁷ Poléi mabbirittangngi passalenna iyaro tajangngé, kuwammengngi nasininna tauwé mateppe'i.

⁸ Aléna paimeng tenniya iyaro tajangngé, nabbirittangngi bawang.

⁹ Tajang tonget-tongengngé iya tappaéngngi sininna rupa tauwé, poléi ri linoé.

¹⁰ Saddaé engkai ri linoé, ripancajiwi linoé polé ri Aléna, iyakiya dé' naissengngi linoé.

¹¹ Laowi ri wanuwan-Na muto iyakiya dé' naritarima ri bangsa-Na.

¹² Namuni engkato tau tarimai sibawa mateppe' ri Aléna, nawéréngngi ha' mancaji ana' Allataala,

¹³ iya riyajjanciyangngé tenniya polé ri rupa tauwé, saba' iyaro atuwong mabarué poléi ri Allataala assalenna.

¹⁴ Mancaji rupa tauni Saddaé, monroi ri yelle'ta, napurani riita arajan-Na. Iyaro arajangngé natarimai selaku Ana' Tungke'na Ambo'é. Naolai Aléna nariita Allataala sibawa pammasé-Na lao ri idi.

¹⁵ Poléi Yohanés selaku sabbin-Na mabbirittangngi: “Iyanaé Aléna iya upowadaé: Poléi matu lebbi ri monri naiya iyya, saba' dé'napa uwengka, engka mémenni.”

¹⁶ Pennoi pammasé; dé' appésaunna, barakkakiki.

¹⁷ Hukkunna Puwangngé ritarimai naolai Musa. Iyakiya pammasé sibawa atinulurenna Allataala ripannessai naolai Yésus Kristus.

¹⁸ Dé' gaga pura mitai Allataala, ri lainnaé Ana' Tungke'na Ambo'é, iya padaé sibawa Ambo'é, sibawa mareppé senna'ki ri Aléna, Aléna ritu pannessai Ambo'é lao ri idi.

Asabbingenna Yohanés

¹⁹ Sining panguwasa Yahudié ri Yérusalém nasuroi imang-ngimangngé sibawa sining tau Léwié lao ri Yohanés sibawa makkutanangngi ri aléna, “Niga ikoé?”

²⁰ Namangakuna Yohanés terus terang, “Tenniyaka Arung Pappassalama'é.”

²¹ Nakkutana mennang, “Rékko makkuwaitu, niga iko? Ikoga Elia?” Nappébali Yohanés, “Tenniya.” Nakkutanasi mennang, “Ikoga Nabié?” Nappébali, “Tenniya.”

²² Nakkeda mennang, “Rékko makkuwaitu, powadanni niga iko, kuwammengngi weddikki mpéréngngi pappébali lao risining tau iya suroékki. Aga adammu passalenna alému?”

²³ Nappébali Yohanés, “Iyya'naé iya napowadaé Nabi Yésaya: ‘Tau iya goraé ri padang kessi'é: Paratai lalengngé untu' Puwangngé.’ ”

²⁴ Sining tau iya risuroé ri tau Farisiéro

²⁵ makkutanasi, “Rékko tenniyako Arung Pappassalama'é, tenniya Elia, tenniya Nabié, magi palé mumaccemmé?”

²⁶ Nappébali Yohanés, “Iyya maccemméka sibawa uwai. Iyakiya ri tengnga-tengngamu engka tau iya dé'é muwissengngi.

²⁷ Poléi lebbi ri monri naiya iyya, iyakiya muwi untu' lukkai tulu sapatun-Na dé'to usitinaja.”

²⁸ Iya manennaro kajajiyangngi ri Bétania, seddé alauna Salo Yordan onronna Yohanés maccemmé.

Ana' Bimbala'na Allataala

²⁹ Pappa bajanana, naitani Yohanés, Yésus lao ri aléna. Nakkeda Yohanés, “Itai, iyanaro Ana' Bimbala'na Allataala iya leddaéngngi dosana linoé.

³⁰ Aléna ritu iya uwasengngé poléi matu lebbi ri monri naiya iyya, iyakiya lebbi battowai naiya iyya, saba' ri wettu dé'napa ujaji, engka mémenni.

³¹ Ri yolonaro dé' uwissengngi niga Alénaro. Padahal poléka maccemmé sibawa uwai kuwammengngi naissengngi bangsa Israélié.”

³² Nappésabbing towi Yohanés iyaé, “Uwitai Rohna Allataala nonno pada-pada jangang-jangangngé polé ri langié naonro ri yasé'-Na.

³³ Iyaro wettué dé'pa uwissengngi niga Aléna? Iyakiya Allataala iya suroékka maccemmé sibawa uwai pura makkeda ri iyya ‘Rékko muwitai Rohna Allataala nonno, naonro ri yasé'na séddié tau, iyanaritu maccemmé matu sibawa Rohna Allataala.’

³⁴ Alékuna pura mitai,” adanna Yohanés, “nausabbingngi makkedaé Aléna ritu Ana' Allataala.”

Ana'-ana' gurunna Yésus bunge'-bunge'é

³⁵ Pappa bajanana, engkasi Yohanés ri onrongngéro sibawa duwa ana' gurunna.

³⁶ Wettunna naita Yésus lalo, makkedani, “Itai! Iyanaro Ana' Bimbala'na Allataala.”

³⁷ Iyaro duwaé ana' gurunna Yohanés naéngkalingani ada-adaéro, nanalao maccowériwi Yésus.

³⁸ Nagilinna Yésus limonri, nanaitai mennang maccowériwi. Nakkutana-Na, “Aga musappa?” Nappébali mennang, “Rabi, kégai Rabi monro?” – (‘Rabi’ bettuwanna guru.)

³⁹ Nakkeda Yésus, “Laono mai, na alému mitai.” Laoni mennang sibawa Aléna nenniya mitai kégai monro. Iyaro wettué tetté eppani arawéngngé. Iyaro essoé monroni mennang silaong Aléna.

⁴⁰ Sala séddinna polé ri Iya duwa tau iya puraé méngkalingai aga napowada Yohanés nainappa lao maccowériwi Yésus, iyanaritu Andréas, silessurenna Simon Pétrus.

⁴¹ Mapperi-perini Andréas sappai Simon, silessurenna, nakkeda ri aléna, “Purani siruntu Mesias!” (Mesias padai Kristus, iyanaritu: Arung Pappassalama'é.)

⁴² Risilaongenni Simon ri Andréas lao ri Yésus. Ritangngani Simon ri Yésus, nainappa makkeda, “Iko Simon, ana' Yona. Riyasekko matu Kéfas.” (Kéfas pada-padai Pétrus, bettuwanna: bulu batu.)

Yésus mobbii Filipus sibawa Natanaél

⁴³ Pappa bajanana, napettuini Yésus untu' lao ri Galiléa. Siruntu'ni Filipus, nakkeda ri aléna, “Laono mai muwaccowéri-Ka!”

⁴⁴ Assalenna Filipus iyanaritu Bétsaida, iyanaritu onrong naonroiyé Andréas sibawa Pétrus.

⁴⁵ Siruntu'ni Filipus sibawa Natanaél nakkeda ri aléna, “Siruntu'ni tau iya nasengngé Musa ri laleng Kitta Hukkunna Allataala, sibawa iya nabbirittangngé nabi-nabié. Iyanaritu Yésus polé ri Nazarét, ana'na Yusuf.”

⁴⁶ Iyakiya mappébaliwi Natanaél, “Weddigga séuwa iya makessingngé polé ri Nazarét?” Nappébali Filipus, “Laono mai na alému mitai.”

⁴⁷ Naitani Yésus Natanaél polé, nakkeda passalenna aléna, “Itai, iyanaro tau Israél tonget-tongeng. Dé'gaga apalessuwang ri aléna.”

⁴⁸ Nakkutana Natanaél ri Yésus, “Pékkugi taissekka Pa'?” Nappébali Yésus, “Riwettu dé'napa naobbiko Filipus, Uwita mémenno ri yawana pong araé.”

⁴⁹ Nakkeda Natanaél, “Pa' Guru, Bapa' iyanaritu Ana' Allataala! Bapa' ritu Arunna bangsa Israélié!”

⁵⁰ Nakkeda Yésus, “Mateppe'ko nasaba Upowadai makkedaé Uwitako ri yawana pong araé? Gau'-gau' iya lebbi battowaé na iyaro muwita matu!”

⁵¹ Nakkedapa Yésus, “Tongeng, ateppe'no, muwitai matu langié tattimpa', na malaéka'-malaéka'na Allataala noté ri Ana'na Tolinoé.”