YOEL 1 - KITTA KAREBA MADECENG

¹ Iyanaé pasenna Puwangnge lao ri Yoél, ana' Pétuél.

Messéna umma Israélié nasaba cappui wassélé dare'é nanré incalé

² Engkalingai, éh sining tau macowa-cowaé; pénessaiwi, sininna tauwé ri Yéhuda. Engkaga naengka nakajajiyang gau' makkuwaéwé ri wettummu, iyaré'ga ri wettunna sining néné-nénému?

³ Curitai iyaro kajajiyangngé lao ri ana'-ana'mu; kuwammengngi napalettu'i mennang lao ri ana'-ana'na curitaéro. Harusu towi naéngkalinga wija-wija rappina, sibawa patterui lao ri wija-wija rappina.

⁴ Incalé makkonrong iya dé'é naribilang jumellana, teppai risining dare'é sibawa manréi wassélé'na. Aga nasésa iyaé sikonrongngé, napaccappui konrong laingngé.

⁵ Eh sining pammabo'é, oto'no! Eh sining pamménungngé, terino! Saba' anggoro iya barué purani rirampasa polé ri témummu.

⁶ Nagasai pasukang incalé wanuwatta; mawatangngi mennang sibawa tenribilang égana, isinna sittareng suwana singa komba'é.

⁷ Napaccappui mennang pong anggoro'ta, sibawa pong arata, banna monroi tona. Nalopéi mennang sining batanna, angkanna maputé carangé-carangéna.

⁸ Terino, éh umma, pada-pada ana'dara iya masaraé iya teringiyéngngi amaténna tunanganna iya napojiyé.

⁹ Gandong sibawa anggoro'é teddénni polé ri Bolana Puwangnge. Namabbaratana sining imangngé, iya matinulué tumaningiwi Puwangnge.

¹⁰ Ancuru'ni sining dare'é makkekkuwangngé. Mabbaratai tanaé; saba' cappuni sininna gandongngé, marakkoni buwa anggoro'é, sibawa cappuni minnya zaitungngé.

¹¹ Eh pallaonruma, mpatinno! Eh pappalla anggoro, terino! Saba' gandongngé, caddukué sibawa sininna éngngalangngé cappuni.

¹² Pong buwa-buwaé ri padangngé mancaji marakko manenni: pong anggoro'é, apél-é, araé, karomaé sibawa dalimaé. Na muwi ra'ya'é dé' tona namarennu.

¹³ Eh sining imang iya mattumaniyé ri mézbaé, pakéi kaing karungngé, sibawa terino. Uttama'no ri Bolana Puwangnge untu' mpating puppu benni, saba' dé'gaga akkarobangeng anggoro sibawa gandong untu' Allataalamu.

¹⁴ Paréntangngi umma'mu untu' mappuwasa, appallebbangengngi addeppungeng marowaé! Undangngi sining pamimpingngé sibawa tomacowa-cowaé enrengngé sininna pabbanuwana Yéhuda, kuwammengngi nalao ri Bolana Allataala, untu' mangobbi méllau tulung ri Aléna.

¹⁵ Macawé'ni Essona Puwangnge, esso iya mappakatau-taué; wettunna Iya Pommakuwasaé mappapolé ancurukeng.

¹⁶ Cappuni inanré ri yolona matatta ri Bolana Allataalata dé'na gaga gora-gora marennu.

¹⁷ Matéi biné ri tana iya makarossaé. Dé'gaga gandong untu' ritaro, nalobbanna sining lappoé sibawa mancaji ruttungeng.

¹⁸ Mangnguwa' olokolo'é sibawa mausé; dé'na gaga padang wella untu' aléna. Maddoko-roko toni bimbala makkonrongngé.

¹⁹ Méllau tulukka ri Iko, oh Puwang saba' manguni sining padang wellaé marakko toni sibawa maté ajukajungngé samanna nanré api.

²⁰ Mala olokolo liyaé ri ale'é mangobbii lao ri Iko méllau bantuwang. Dé' naulléi mennang passauwi dekkana, saba' marakko maneng sining saloé.