YEHEZKIEL 8 - KITTA KAREBA MADECENG

LOLONGENNA YEHEZKIEL PAKKITANG MADUWAE PASSALENNA ALLATAALA 8:1–10:22 Assompang barahalaé ri Yérusalém

¹ Ri tanggala limana uleng enneng ri laleng taung maennengngé ri wettu appaliretta, sining pamimpinna sining tau Yéhuda ripalié laoni ri bolaku sibawa tudat-tudang sibawakka. Tennasenna-senna akuwasanna Puwang Iya Pommatanré makuwasaika.

² Congana nauwitai séuwa iya sinrupaé tolino. Polé ri benrénna liyawa paitai pada-pada apié, sibawa polé ri benrénna liyasé lala'-lala'i pada-pada gessa iya rigoso'é.

³ Najjulluwanni séuwa iya sinrupaé lima, nainappa nakarappo gemme'ku. Nainappa ri laleng pakkitangngéro, riyakkaka matanré ri yelle'é ri Rohna Allataala naritiwi ri Bolana Puwangnge ri Yérusalém, ri sumpang muttama'é ri seddé ri lalenna ri tibang manorang. Kuwaro engka dato-dato barahala iya puraé paénré'i caina Allataala.

⁴ Nainappa usabbing tajang pawiloé iya tanrangiyéngngi ahadérékenna Allataalana Israélié, pada-pada iya uwitaé wettukku engka ri wirinna Salo Kébar.

⁵ Makkedai Allataala lao ri iyya, “Eh tolino dé'é namannennungeng, akkitano lao ri manorang.” Turuna, na ri seddéna mézba ri laleng muttama'é, uwitai barahala iya puraé paénré'i caina Allataalaro.

⁶ Makkedai Allataala lao ri iyya, “Eh tolino dé'é namannennungeng, aga muwita mattengngang kajajiyang? Pénessaiwi sining pangkaukeng mappakaciddi-ciddi'é iya napogau'é tau Israélié, iya pabélaiyék-Ka polé ri Bola-Ku! Laono mai, Uwappaitangngi matu lao ri iko gau'-gau' iya lebbi matunaéppasi.”

⁷ Nainappa Natiwika ri sumpang muttama'é ri seddé saliwenna Nanappaitangngi séddi sebbo ri témbo'é.

⁸ Adan-Na, “Eh tolino dé'é namannennungeng, paloppoiwi sebbo'éwé.” Purana upogau', uwitani séddi sumpang.

⁹ Adan-Na lao ri iyya, “Uttama'no sibawa itai sining pangkaukeng matunaé sibawa mappakaciddi-ciddi'é iya napogau'é mennang kuwaro.”

¹⁰ Muttama'na nauwitai. Sining renrinna iyaro bili'é risobbi'i sibawa sininna rupanna ulaé sibawa olokolo harang laingngé, makkuwatoro madduparupang gambara barahala iya nasompaé sining tau Israélié.

¹¹ Pituppulo tau pamimping bangsa Israélié engka kuwaro, muttama'ni Yaazanya ana' Safan. Tungke-tungke makkatenning séddi addupa-dupang iya maddumpué.

¹² Makkedai Allataala lao ri iyya, “Eh tolino dé'é namannennungeng, muwitaga iya napogau'é sining pamimpinna Israélié sibawa mammekko-mekko? Massompai mennang ri laleng bili' iya pennoé barahala sibawa alasang makkedaé purani Usalai wanuwaéwé sibawa dé' uwitai pangkaukenna mennang.”

¹³ Nainappa makkeda Puwangnge lao ri iyya, “Muwitai matu mennang pogau'i gau' iya lebbi mappakaciddi-ciddi'é.”

¹⁴ Nanatiwika lao ri gerbang manoranna Bolana Puwangnge sibawa Nappaitangngi lao ri iyya sining makkunrai iya mpatingiyéngngi amaténna Déwa Tamus.

¹⁵ Makkutanani Puwangnge ri iyya, “Eh tolino dé'é namannennungeng, muwitaga gau'éro? Maéga mupa iya lebbi mappakaciddi-ciddi'é.”

¹⁶ Natiwika ri seddé ri lalenna Bolana Puwangnge. Ri seddéna sumpang muttama'é ri bili' mapaccingngé, ri pallawangenna mézbaé sibawa loronna, engka duwappulo lima tau. Nabbokoriwi mennang bili' mapaccingngé, nanasuju' mattuju ri alau sompai mata esso mompoé.

¹⁷ Makkedai Puwangnge lao ri iyya, “Eh tolino dé'é namannennungeng, muwitaga iyaro? Iyaé sining tau Yéhudaé dé' najinnai rékko banna napogau'i gau'-gau' iya mappakaciddi-ciddi'éro sibawa pogau' tindakang-tindakang iya dé'é namaséiwi padanna rupa tau ri sininna wanuwaé. Mala napogau'i mennang sininnaro kuwaé, ri laleng Bola-Ku sibawa mébbu-Ka lebbi macaipasi. Itai pékkugi mennang pakatuna-Ka sibawa cara iya kaminang matunaéwé!

¹⁸ Napéneddingiwi matu mennang cai-Ku iya maseroé! Dé' Uwaddampengengngi matu sibawa Uwampungiwi mennang. Namuni nagorangngi mennang sempajangngé maladde senna, dé' umaélo méngkalingai!”