YEHEZKIEL 4 - KITTA KAREBA MADECENG

Nappaitanna Yéhézkiél akkeppungenna Yérusalém

¹ Makkedai Allataala, “Eh tolino dé'é namannennungeng, alano séddi bata, palénne'i ri yolomu sibawa jorii ri tompo'na gambara'na kota Yérusalém.

² Nainappa mugambara séuwa akkeppungeng lao ri kotaéro, sibawa sining sépe'na, goppo-goppo tana, akkémang-akkémang sibawa pakkakkasa-pakkakkasa pattunrung ri mattulilinna témbo'na.

³ Alano panci bessi sibawa angga'ni iyaro séuwa renring bessi; palénne'i iyaro pancié ri pallawangemmu sibawa kota Yérusalém. Nainappa angolono ri kotaéro samanna iko ritu keppungngi. Mancaji lambangngi matu iyaro untu' bangsa Israélié.

^4-5 Nainappa léwu titti liyabéyo, naupatakkennai matu asalanna bangsa Israélié ri iko. Léwu makkuwakoro matu 390 esso ittana sibawa manrasa-rasa nasaba asalanna mennang. Siesso léwu makkuwaro napulambangngi sitaung pahukkungenna bangsa Israélié.

⁶ Purairo, léwu titti liyatauno sibawa péneddingini pahukkungenna Yéhuda patappulo esso ittana, siesso napulambangngi sitaung pahukkungenna mennang.

⁷ Itani akkeppungenna Yérusalém. Tanréyanni pajjagguru'mu lao ri kotaéro namupalettu'i pasek-Ku passalenna pahukkungenna mennang.

⁸ Usiyoko matu angkammu dé' muwulléi pagilingngi tubummu polé ri yabéo lao ri atau iyaré'ga sibalé'na narapi maccappa iyaro akkeppungengngé.

⁹ Makkekkuwangngé, alano gandong, cadduku, buwé cella, bénggali, wetteng sibawa gandong nenné. Pasicampuru manengngi iyaro namuwébbui roti. Iyanaro inanrému 390 esso ittana léwu titti liyabéyoro.

¹⁰ Iyaro rotié harusu'i mubagé makkuwaro rupanna angkanna tungke esso banna muwanréi 230 geram. Dé' nawedding lebbi na iyaro.

¹¹ Uwai rénummu engkato atte'na, iyanaritu duwa cangkiri siesso.

¹² Ebbuno api sibawa tai tauwé selaku aju tununna. Pangganni rotimmu ri yasé'na apiéro sibawa anréi iyaro rotié ri yolona sininna tauwé.”

¹³ Makkedai Puwangnge, “Makkuwaniro carana tau Israélié matti manréi inanré iya nattéyangngé hukkunna Musa, wettunna mennang Upali lao ri wanuwa-wanuwa laingngé.”

¹⁴ Iyakiya mappébalika, “Aduh Puwang Iya Pommatanré! Mappammulai baiccu'ku lettu makkekkuwangngé, dé'pa naengka upanajisi'i aléku sibawa manré bakké olokolo iyaré'ga sésa inanréna olokolo masekkangngé. Dé' naengka uwanré inanré iya riyangga harangngé.”

¹⁵ Namakkeda Allataala, “Makessinni, selaku passulléna tai tauwé, weddikko pakéi tai sapingngé untu' tunui rotimmu.”

¹⁶ Nainappa makkeda paimeng, “Eh tolino dé'é namannennungeng, maélo-Ka paccappui pappassadiyang inanré ri Yérusalém. Nasibawang anennengeng sibawa abata-batang naatte'i matu sining tauwé inanré iya nanré mennang sibawa uwai iya naénungngé mennang.

¹⁷ Pettu paddennuwangngi matu mennang nasaba acappurenni roti sibawa uwai, na angkanna matéi nasaba dosa-dosana mennang.”