YEHEZKIEL 1 - KITTA KAREBA MADECENG

LOLONGENNA YEHEZKIEL PAKKITANG MAMMULANGNGE PASSALENNA ALLATAALA 1:1–7:27 Kadéra arajanna Allataala

^1-3 Ri tanggala limana uleng eppa ri taung matelluppuloé, ri laleng taung malimaé sipongenna Arung Yoyakhin ritiwi ri appalirengngé, iyya, Imang Yéhézkiél ana' Busi, engkaka ri wirinna Salo Kébar ri Babél silaong sining tau Yahudi ripali laingngé. Natappa tattimpa langié naulolongeng pakkitang passalenna Allataala. Uwéngkalingai Puwangnge mabbicara lao ri iyya sibawa upéneddinginna awatangeng akuwasan-Na.

⁴ Congana nauwitai anginrajaé mangiri polé ri manorang. Siyanré-anré letté polé ri sitékké ellung iya battowa senna'é, sibawa langié ri seddéna macakka. Ri laleng billa iya mattappa-tappaéro paitani séuwa iya lala'-lala'é pada-pada gessaé.

⁵ Ri tengnga-tengngana ellungngéro, uwitai eppa kérub iyanaritu anu tuwo iya sinrupaé tolino,

⁶ iyakiya tungke-tungke mappunnaiwi eppa tappa sibawa duwappasang panni.

⁷ Ajéna malempu sibawa lala' pada-pada gessa iya rigoso'é. Jari ajéna makkanukui pada-pada kanuku banténgngé.

⁸ Ri lainnaé eppa tappana sibawa duwappasang panniro, mappunnai mennang lima tolino ri yawana tungke panni.

⁹ Sipasang panni polé ri tungke mahlu'éro mallebba'i sibawa sigéssa cappa-cappa'na sibawa pannina mahlu iya laingngé, angkanna iya eppa mahlu'éro mébbu sulapa eppa. Rékko kédoi, tungke-tungke kédo mallempui liyolo tennabalé' tubunna.

¹⁰ Tungke mahlu'éro mappunnai tappa iya mallail-laingengngé; tappa tolino ri yolo, tappa singa ri seddé atau, tappa banténg ri seddé abéyo, sibawa tappa kuwajang ri monri.

¹¹ Sipasang panni polé ri tungke mahlu'éro napallebba'i liyasé angkanna nagéssai cappa panni-pannina mahlu'é ri seddéna, na sipasang pannisi naleppe'i tongkoi tubunna.

¹² Tungke-tungke mahlu'éro mangoloi ri eppa tibang massamang, angkanna weddingngi mennang lao kégi-kégi napoji tennapaccenné tubunna.

¹³ Ri tengnga sining mahlu'éro engka séuwa iya paitaé pada-pada bara api iyaré'ga sulo malluwa iya kédo-kédoé dé' naengka nappésau. Iyaro apié reppe-reppe sibawa patassiya billa-billa letté.

¹⁴ Aléna iyaro mahlu'-mahlu'é kédoi lolésu siggatti billa'é.

¹⁵ Wettunna upénessai iya manennaro, uwitani eppa padati ri tompo'na tanaé, séddi padati ri seddéna tungke mahlu'éro.

¹⁶ Iya eppa padatiéro sirupai nenniya lala'-lala' pada-pada batu paramataé, sibawa tungke-tungke mappunnai séddi padati laingngé iya mappoloé ri tengnga-tengngana.

¹⁷ Nanallalengiwi iyaro padati-padatié weddingngi mattuju ri eppa sulapa.

¹⁸ Iyaro lébuna padatié pennoi sibawa mata.

^19-21 Iyaro mahlu'-mahlu'é laowi kégi-kégi napoji mennang, na iyaro padati-padatié tuli maccowéi, nasaba rikuwasaiwi ri mahlu'-mahlu'éro. Sises-siseng iyaro mahlu'-mahlu'éro kédo ménre ri yelle'é iyaré'ga mappésau, iyaro padati-padatié tuli maccowéi silaong mennang.

²² Ri tompo ulunna mahlu'-mahlu'éro mallebba'i séuwaé iya pada-padaé kubba polé ri kaca iya pawilo-wiloé.

²³ Ri yawana iyaro kubbaé tungke mahlu'éro pallebba'i sipasang pannina mattuju ri mahlu' ri seddéna, na pannina iya sipasangngéssi natongkoi tubunna.

²⁴ Rékko luttui mennang, uwéngkalinga sadda kampa pannina; oninna pada-pada uwai jompié, pada-pada akka ajéna pasukang tentara iya battowaé, pada-pada saddanna Allataala Iya Pommakuwasaé. Rékko mappésauwi luttu, naleppe'i sining pannina,

²⁵ iyakiya polé ri tompo'na kubbaé ri yasé'na ulunna mennang, paéngkalinga mupi oni sadda.

²⁶ Ri tompo'na kubbaéro engka séuwa iya sinrupaé kadéra arajang polé ri batu nilangngé, na ri yasé'na tudangngi séuwa iya paitaé pada-pada tolino.

²⁷ Bagiyang ri yasé'na maccahayai pada-pada gessaé ri tengngana luwa apié. Bagiyang ri yawana mattappai macakka,

²⁸ sibawa madduparupang balona pada-pada tarawué. Iyanaro tajang pawilo-wiloé iya mappaitangngéngngi ahadérékenna Puwangnge.