YAKOBUS 5 - KITTA KAREBA MADECENG

Papparéngngerang lao risining tau sugié

¹ Saudara-saudara, sining tau sugié! Engkalingai pangajaku. Sitinajako teri sibawa mpating, nasaba péneddingiko matu anrasa-rasang!

² Makebbonni asugiremmu. Nanréni ané pakéyammu.

³ Ulaweng sibawa péra'mu natongkoni taiseng; mancaji sabbiwi matu taisenna méwako sibawa manréi matu gangka cappu tubummu pada-pada apié. Mupaggoppoi waramparangngé ri esso-esso wettu paccappurengngé.

⁴ Dé' muwajai sarona sining tau iya majjamaé ri dare'mu. Engkalingani makkekkuwangngé addarékénna mennang! Sining tau iya paddeppungengngéngngi wassélé dare'na, gora méllau tulung nagorana mennang lettu'ni ri daucculinna Allataala, Puwang Iya Pommakuwasaé.

⁵ Tuwoko sibawa massennas-sennang sibawa péneddingiwi iyaro asennangengngé ri linoéwé. Samammu mattengngang pacommokiwi alému untu' esso aggérékengngé.

⁶ Muhukkungngi sibawa muunoi sining tauwé iya dé'é napasala, na dé' mennang naéwako.

Asabbarakengngé sibawa sempajangngé

⁷ Rimakkuwannanaro, sabbara'ki Saudara-saudaraku, narapi polé Puwangngé. Itai pékkugi sabbara'na séddié patani tajengngi narapi tanana mabbéré wassélé' iya engkaé angke'na ri aléna. Nasibawang asabbarakeng natajengngi bosié wettu maddununa daud-daungngé sibawa bosi wettu mpungana aju-kajungngé.

⁸ Sitinaja tokko sabbara sibawa pakaloppoiwi atimmu, saba' Esso apolénna Puwangngé macawé'ni.

⁹ Aja' muwannoko'-noko' sibawa sisullé sipassala, kuwammengngi nadé' narihukkukko ri Allataala. Engngerangngi! Macawé'ni Hakingngé, sadiyani untu' polé.

¹⁰ Saudara-saudara, éngngerangngi sininna nabié, iya mabbicaraé ri laleng asenna Puwangngé. Sabbara'i sibawa tahangngi manrasa-rasa. Jaji, alai mennang selaku conto.

¹¹ Riteppui mennang masennang nasaba tahangngi mennang. Purani muwéngkalinga asabbarakenna Ayub, sibawa muwisseng pékkugi Puwangngé ri paccappurenna barakkakiwi. Saba' maseroi paressé babuwana Puwangngé sibawa akessingeng atinna.

¹² Iya penting senna'é, iyanaritu: Aja' muwattanro, muwi nasabbing langié, iyaré'ga nasabbing tanaé, iyaré'ga muwi nasabbing agi-agi. Powadai bawang “Iyyé” rékko akkattamu iyyé, sibawa “Dé'” rékko akkattamu dé'; kuwammengngi na aja' naripakennaiko pahukkungeng ri Allataala.

¹³ Rékko ri yelle'mu engka iya mattengngangngé masussa, sitinajai massempajang. Rékko engka marennu, sitinajai makkélong pojiwi Allataala.

¹⁴ Rékko engka malasa, sitinajai naobbi sining pamimpinna jema'é. Nasitinajai iyaro sining pamimpingngé massempajangengngi iyaro tau malasaé enrengngé sapuiwi sibawa minnya ri laleng asenna Puwangngé.

¹⁵ Rékko sining sempajanna mennang ripalettu'i ri Puwangngé sibawa mateppe', napajjappai matu Puwangngé iyaro tau malasaé, jaji Puwangngé mappajjappa, sibawa maddampengengngi dosa-dosaé iya puraé napogau'.

¹⁶ Rimakkuwannanaro, sitinajako sisullé siyangakui asalang sibawa sisullé siyassempajangeng, kuwammengngi napajjappako. Sempajanna tau iya turusiyéngngi élona Allataala, mappunnaiwi akuwasang iya battowaé.

¹⁷ Elia pada-padaki tolino iya pada-padaé idi'é. Massempajangngi sibawa tonget-tongeng kuwammengngi nadé' nateppa bosié, nadé'na nateppa bosié tellu sitengnga taung ittana.

¹⁸ Nainappa massempajassi, nanapaturunni langié bosié angkanna tanaé mabbéréyangngi wassélé'na paimeng.

¹⁹ Saudara-saudaraku! Rékko ri yelle'mu engka séddi tau iya dé'énna naccowériwi pappagguruwanna Allataala, nainappa séddié tau laing mébbui iyaro tauwé lisu ri Allataala,

²⁰ éngngerangngi iyaé aya'éwé: Tau iya mébbuéngngi tau madosaé balé' polé ri lalenna iya salaé, iyaro tauwé napassalama'i nyawana tau madosaéro polé ri amaténgngé sibawa nassabariwi maéga dosa riyaddampengeng. Salama, Yakobus