YAKOBUS 4 - KITTA KAREBA MADECENG

Massellao sibawa linoé

¹ Polé kégi assalenna sininna allagangngé sibawa assasangngé ri yelle'mu? Tenniyaga iyaro assalenna poléi risining cinnamu iya matterué mammusu ri laleng alému untu' lolongengngi asennangeng linoé?

² Macinnako, iyakiya dé' Mulolongengngi, namaéloko pauno! Masumange'ko, iyakiya dé' naruntu'i aga iya musappaé, massasa sibawa mallaga. Dé' agaga nalolongeng, saba' dé' muwéllauwi ri Allataala.

³ Namuni purani muwéllau, dé'to mulolongengngi, saba' akkattana paréllaummu salai; aga iya muwéllauwé iyanaritu untu' asennangeng aléna bawang.

⁴ Iko iyanaritu tau iya dé'é namatinulu! Muwissegga makkedaé rékko massellaoko sibawa linoé, mancaji baliko ri Allataala?

⁵ Aja' muwasengngi makkedaé Kitta'é temmakkéalasangngi nakkeda, “Ri laleng aléta Allataala taroi Roh iya matedde'é cinnana.”

⁶ Namuni makkuwaro, pammaséna Allataala iya nawéréngngékki lebbi mawatangngi naiya cinnana iyaro rohta. Iyanaro saba'na ri laleng Kitta'é taroki towi, “Allataala méwai tau iya matempoé, iyakiya sibalé'na namaséiwi tau iya mariyawa atié.”

⁷ Rimakkuwannanaro, tunru'no lao ri Allataala sibawa éwai Ibillisi', nalari matu Ibillisi' polé ri iko.

⁸ Addeppériwi Allataala, nanaddeppéri tokko matu Allataala. Paccingiwi limammu, iko iya madosaé! Sibawa cinnongiwi atimmu, iko iya mappakka atié!

⁹ Sitinajako tonget-tongeng massesse kalé sibawa teri enrengngé mpating; sitinajai cawamu mancaji teri sibawa arennummu mancaji atassinnaureng!

¹⁰ Sitinajako pakariyawai alému ri yolona Puwangngé, naripakatanréko matu ri Puwangngé.

Papparéngngerang kuwammengngi aja' mucellai tauwé

¹¹ Saudara-saudara, aja' musisullé sicella iyaré'ga sisullé sipassala. Tau iya maccellaé iyaré'ga passalaéngngi saudarana iya pada-padannaé Kristéng, nacellai sibawa napassalai hukkunna Allataala. Narékko mupassalai hukkunna Allataala, bettuwanna iyaro dé' muturusiwi iyaro hukkung-hukkungngé, sangadinna mancajiwi hakinna.

¹² Padahal banna séddi iya mappunnaiyé ha' mabbéré hukkung lao ri tolinoé sibawa madélékiwi tolinoé. Aléna ritu Allataala iya makuwasaé mappassalama' sibawa mappabbinasa. Jaji, niga iko, angkammu maélo passalai pada-padatta rupa tau?

Papparéngngerang kuwammengngi aja' muwabboro

¹³ Saudara-saudara iya makkedaé, “Iyaé essoé iyaré'ga baja maéloki joppa lao ri kota anu sibawa monro kuwaro sitaung ittana untu' dangkang sibawa sappa dowi,” – éngkalingai pangajakué.

¹⁴ Aga iya maéloé kajajiyang sibawa atuwommu baja, alému paimeng dé' naissengngi! Bannako pada-pada rumpué iya cinampe'é bawang paita, nainappa lennye.

¹⁵ Sitongenna harusu'ko makkeda makkuwaé, “Rékko napuwéloi Puwangngé, maéloki tuwo sibawa pogau'i iyaé iyaré'ga iyaro.”

¹⁶ Iyakiya makkekkuwangngé matempoko sibawa mabboro. Sininna abborowang pada-padaéro salai ritu.

¹⁷ Rimakkuwannanaro, tau iya missengngéngngi aga iya makessingngé iya harusu'é napogau' iyakiya dé' napogau'i, madosai iyaro tauwé.