YAKOBUS 3 - KITTA KAREBA MADECENG

Lilana rupa tauwé

¹ Saudara-saudara! Aja' namaéga polé ri yelle'mu iya maéloé mancaji guru. Muwisseng makkedaé idi iya mancaji gurué riadélékiwi matu lebbi matedde' naiya tau laingngé.

² Idi manengngé biyasaki pogau' asalang. Iyakiya tau iya dé'é naengka napogau' asalang sibawa ada-adanna, iyanaritu tau iya sukkué, iya mullé kuwasai manengngi aléna.

³ Rigalangngi anyarangngé kuwammengngi naturusiwi élota, nataulléi patunru'i sininna watakkaléna iyaro anyarangngé.

⁴ Ala towi kappala'é selaku ébara'. Namuni kappala'é iyanaritu séuwai iya makkuwaémmani loppona sibawa ritiwi ri anging iya marajaé, iyakiya ripatunru'i ri golinna iya baiccu senna'é, situru élona jurumudié.

⁵ Makkuwatoniro sibawa lilata; namuni iyaro lilata baiccu'i, iyakiya naulléi mattempowangngi aléna ri laleng gau'-gau' iya battowaé. Pikkiri'ni pékkugi loppona ale'é weddingngi ritunu ri api iya baiccu senna'é!

⁶ Lilaé pada-padai apié. Ri watakkaléta, sinrupai assalenna majaé iya patassiyaéngngi jaé lao ri sininna aléta. Nasibawang api iya assalennaé polé ri ranakaé, nangureng manengngi sininna atuwotta.

⁷ Sininna rupanna olokolo' masekkangngé, manu'-manu'é, olokolo' makkalolo'é sibawa balé weddingngi ripakacuwai, sibawa pura toni ripakacuwai ri rupa tauwé.

⁸ Iyakiya lilana rupa tauwé muwi séddi tau dé'to naulléi pakacuwaiwi. Iyaro lilaé majai sibawa dé' nariyullé makuwasaiwi; pennoi sibawa racung iya paunoé.

⁹ Takkégunangngi untu' mattarima kasi lao ri Puwangngé sibawa Ambo'ta, iyakiya untu' tanroi towi pada-padatta rupa tau, iya puraé ripancaji manuru' rupanna Allataala.

¹⁰ Polé ri tému iya padaé massui ada-ada tarima kasi'é sibawato ada-ada tanro. Sitongenna dé' nakkuwaro!

¹¹ Engkaga mata uwai iya passué uwai kawa sibawa uwai mapai polé ri assaleng iya padaé?

¹² Saudara-saudaraku, pong araé, dé' nawedding powassélé' buwa zaitun, sibawa anggoro'é dé' nawedding powassélé' buwa ara. Mata uwai iya mapejjé dé'to nawedding passu uwai kawa.

Apanréng iya polé ri yasé'é

¹³ Rékko ri yelle'mu engka tau mapanré sibawa makkéakkaleng, sitinajai mappaitangngi sibawa tuwo makessing enrengngé pogau'i gau'-gau' iya makessingngé, iya nasibawangngé ariyawang ati nenniya apanréng.

¹⁴ Iyakiya rékko mangémpuruko, mapeddi ati sibawa pentingkangngi aléna, aja' muwammingkikengngi iyaro apanréngngé, saba' nallalengiro muputara' balé'i biritta iya tongengngé iya polé ri Allataala.

¹⁵ Apanréng makkuwaéro dé' napolé ri surugaé assalenna. Assalenna poléi ri linoé, polé ri napessunna tolinoé, sibawa polé ri sétangngé!

¹⁶ Kégi engka angémpurung sibawa sipa' pentingkangngi alé bawang, kuwa towitu engka akacaungeng sibawa sininna rupanna pangkaukeng iya majaé.

¹⁷ Iyakiya tau iya mappunnaiyé apanréng iya assalenna polé ri yasé', bunge'-bunge'na mapaccingngi, nainappa napoji sidamé, mabessa, sibawa mapato. Pennoi sibawa paressé babuwa powassélé' pangkaukeng-pangkaukeng iya makessingngé. Dé' nakacowé-cowé sibawa dé' nabbonga-bonga.

¹⁸ Mémeng akessingengngé iyanaritu wassélé' polé ri biné adaméngengngé iya riyampoé ri tau iya pojiyéngngi damé!