WAHYU 2 - KITTA KAREBA MADECENG

Paseng untu' Efésus

¹ “Lao ri malaéka'na jema'é ri Efésus, okii makkuwaéwé: Iyanaé paseng polé ri Aléna makkatenningngé pitu wéttowing ri lima ataun-Na, enrengngé joppa ri yelle'na iya pitu ajé lampu ulawengngéro.

² Uwisseng aga iya muwébbué: majjama laddé'ko enrengngé sabbara senna'. Uwisseng makkedaé dé' muwéréngngi ati tau majaé. Sibawa sining tau iya mangakuiyéngngi aléna rasul, padahal tenniya, purani muwoji, namulolongengngi makkedaé pabbelléngngi mennang.

³ Sabbara'ko enrengngé manrasa-rasako nasaba Iyya, nadé' mupettu paddennuwang.

⁴ Iyakiya iyanaé pappotane'-Ku lao ri iko: Dé'tona muwamaséi-Ka pada-pada bunge'na.

⁵ Rimakkuwannanaro, éngngerangngi pékkugi bélanako sempé'na! Toba'no polé ri dosa-dosamu, enrengngé pogau'ni aga iya mupogau'é pammulanna. Rékko dé', maélo-Ka lao ri iko sibawa bébbui ajé lampummuro polé ri onronna.

⁶ Iyakiya engka séuwa iya makessingngé ri iko, iyanaritu: Mubenciwi pangkaukenna sining tau maccowériyéngngi Nikolaus, iya Ubenciyétto.

⁷ Nigi-nigi mulléi maréngkalinga, sitinajai pénessaiwi aga iya napowadaé Rohna Allataala lao ri jema'é! Mennang iya pakalaé, Upalaloi matu manréi buwa polé ri pong atuwongngé iya tuwoé ri laleng Tammenna Allataala.”

Paseng untu' Smirna

⁸ “Lao ri malaéka'na jema'é ri Smirna, okii makkuwaéwé: Iyanaé paseng polé ri Aléna iya mammulangngé sibawa paccappurengngé – iya matéénna natuwo paimeng.

⁹ Uwisseng sining asussammu; Uwisseng kasiyasiko iyakiya sitongenna sugiko! Uwisseng sining pappétenna iya ripakennaiyékko polé risining tau iya mangakuiyéngngi aléna Yahudi, padahal tenniya; mennang iyanaritu umma'na Ibillisi'!

¹⁰ Aja' mumétau ri anrasa-rasang iya dé'énna namaitta naharusu' mupéneddingi. Engngerangngi, naputtama'i matu Ibillisi' sibagiyang polé ri iko ri laleng tarungkué untu' cobaiko. Manrasa-rasako matu seppulo esso ittana. Sitinajako matinulu lao ri Iyya gangka maté, na-Uwérékko matu atuwong tongengngé sibawa mannennungengngé selaku hadiya apakalang.

¹¹ Nigi-nigi mulléi maréngkalinga, sitinajai napénessai aga iya napowadaé Rohna Allataala lao ri jema'-jema'é! Mennang iya pakalaé, dé' sises-siseng matu nanrasa-rasa agi-agi ri amaténg iya maduwaé.”

Paseng untu' Pérgamus

¹² “Lao ri malaéka'na jema'é ri Pérgamus, okii makkuwaé: Iyanaé paseng polé ri Aléna iya makkatenningngé peddang iya matareng walié.

¹³ Uwisseng kégako monro, iyanaritu ri onronna Ibillisi' makkarung. Iko matinuluko ri Iyya. Mala wettunna Antipas, sabbik-Ku iya matinulué riyuno ri yolomu, ri markasna Ibillisi', dé' muwassakka makkedaé mateppe'ko ri Iyya.

¹⁴ Namuni makkuwaro engka siyagangngaré passaleng iya dé'é Umasennangiwi polé ri iko: Engka sibagiyang tau ri yelle'mu iya maccowériyéngngi aga iya nappagguruwangngé Biléam. Biléam paggurui Balak pékkugiwi pasempé'i umma' Israélié ri laleng dosaé; ri laleng napalécéna mennang manré nanré iya puraé riyakkasuwiyangeng lao ri barahalaé enrengngé pogau'i gau'-gau' mappangaddié.

¹⁵ Makkuwatoro engka ri yelle'mu sining tau iya makkatenningngé ri pappagguruwanna sining maccowéé ri Nikolaus.

¹⁶ Rimakkuwannanaro, toba'no polé ri dosa-dosamu! Rékko dé', dé'na namaitta Umaélo polé ri iko enrengngé musui sining tauwéro sibawa peddang iya engkaé ri bawa-Ku.

¹⁷ Nigi-nigi mulléi maréngkalinga, sitinajai napénessai aga iya napowadaé Rohna Allataala lao ri jema'-jema'é! Mennang iya pakalaé, Upalaloi matu manréi manna iya tassubbué, sibawa tungke'-tungke' tarimai matu polé ri Iyya séddi batu puté. Ri batuéro tarokii séddi aseng iya barué, iya dé'é naissengngi muwi niga, ri lainnaé tau iya tarimaéngngi.”

Paseng untu' Tiatira

¹⁸ “Lao ri malaéka'na jema'é ri Tiatira, okii makkuwaéwé: Iyanaé paseng polé ri Ana'na Allataala, iya malluwa'-luwa'é matan-Na pada-pada apié, enrengngé ajé-Na mabbara pada-pada tembaga ritunué.

¹⁹ Uwisseng sininna mupogau'é – Uwisseng muwamaséi pada-padammu, matinuluko, majjamako, sibawa tahakko manrasa-rasa. Uwissekko makkekkuwangngé majjama lebbi maéga naiya riyolo.

²⁰ Iyakiya iyaé pappotane'-Ku lao ri iko: Muwéréngngi ati Izebél, makkunrai iya mangakuiyéngngi aléna surona Allataalaro. Maégani ata-atak-Ku iya nabengnguwangngé enrengngé napaggurui untu' mappangaddi enrengngé untu' manréi nanré iya puraé riyakkasuwiyangeng lao ri barahalaé.

²¹ Purani Uwéréng kasempatang untu' toba' polé ri dosa-dosana, iyakiya dé' namacinna mappésau pogau'i gau'-gau' iya mappangaddiéro.

²² Engngerangngi! Maéloka mabbantingengngi angkanna mapeddi ri onrong atinrongngé. Kuwaniro aléna sibawa sining tau iya malawengngé silaong matu manrasa-rasa senna'. Iya manennaro maélo-Ka pogau'i makkekkuwangngé – sangadinna rékko mappésauwi mennang pogau'i gau'-gau' iya majaé silaong aléna.

²³ Sining iya maccowériyéngngi maélo tok-Ka mpunoi kuwammengngi sininna jema'é namaingekiwi makkedaé Iyya'naé iya mpellungiyéngngi pikkiranna sibawa atinna tolinoé. Iko maneng maélo-Ka mpale'i situru pangkaukemmu tungke'-tungke'.

²⁴ Iyakiya iko iya lail-laingngé ri Tiatira dé' naccowériwi pappagguruwang iya majaéro, enrengngé dé' nagguruiwi pangissengeng-pangissengeng Ibillisi'é. Upowadai makkedaé dé' Umaélo tambaingekko tiwi iya patanekiyé.

²⁵ Iyakiya narapi wettu polé-Ku matti, sitinajako tette' maccowériwi aga iya puraé muwappunnai.

^26-27 Mennang iya pacaué sibawa iya lettu'é paccappurengngé matterui pogau'i aga iya Uwacinnaiyé, maélo-Ka mpéréngngi akuwasang iya pada-padaé iya Utarimaé polé ri Ambo'-Ku. Tarimai matu mennang akuwasang polé ri Iyya untu' paréntai bangsa-bangsaé sibawa tekkeng bessi, sibawa untu' mancuru'i bangsa-bangsaéro pada-pada oring tanaé.

²⁸ Tarimai matu mennang wéttowing alau polé ri Iyya.

²⁹ Nigi-nigi mulléi maréngkalinga, sitinajai napénessai aga iya napowadaé Rohna Allataala lao ri jema'é!”