ULANGENG 33 - KITTA KAREBA MADECENG

Musa barakkakiwi suku-suku Israélié

¹ Ri wettu dé'napa namaté, Musa, surona Allataala, barakkakiwi bangsa Israélié sibawa ada-adaéwé:

² “Polé ri Bulu Sinaiwi Puwangnge; mompoi ri yasé'na Edom pada-pada mata essoé sibawa polé ri Bulu Paran tappai umma'-Na. Risibawangngi ri seppulo sebbu malaéka'; malluwa apié ri seddé ataunna.

³ Tongeng, namaséiwi Puwangnge bangsa-Na nalinrungiwi sininna tau iya mancajiyé appunnangen-Na. Laono mai tasuju' ri yolona ajé-Na sibawa turusiwi parénta-parénta-Na.

⁴ Hukkung iya nabbéréyangngé Musa taturusiwi, appunnangenna bangsaéwé kaminang mangke'é.

⁵ Wettunna Israélié maddeppungeng sibawa sining pamimpinna, Puwangnge mancaji Arung ri yasé'na umma'-Na.”

⁶ Passalenna suku Rubén, makkedai Musa, “Tennapodo suku Rubén dé' naengka nabinasa, namuni taunna céddé bawang.”

⁷ Passalenna suku Yéhuda makkedai: “Puwang éngkalingai pangobbina Yéhuda; passéddiwi mennang paimeng sibawa bangsana. Ammusurengngi mennang, oh Puwang, tulungngi mennang lao ri balinna.”

⁸ Passalenna suku Léwi makkedai: “Nasibawang Urim sibawa Tumim Mupannessai élomu, naolai tau Léwié, atam-Mu iya matinulué. Purai mucobai mennang ri Masa, sibawa sibbanta mennang ri mata uwai Mériba.

⁹ Matinului mennang lao ri Iko pakacauriwi sini-sininnaé, napakacauri tomatowaé sibawa sumpuloloé. Parénta-parénta-Mu naturusiwi mennang, assijancim-Mu narupaiwi mennang.

¹⁰ Napaggurui mennang umma'-Mu turusiwi sininna parénta-Mu sibawa makkasuwiyangengngi akkarobangengngé ri yasé'na mézba-Mu.

¹¹ Puwang, tulungngi iyaé sukué kuwammengngi namawatang, tennapodo Muwéloriwi jama-jamanna mennang. Paccappui sininna balinna mennang angkanna dé'na naulléi tokkonna.”

¹² Passalenna suku Bényamin makkedai: “Iyanaé suku iya namaséiyé Puwangnge. Nalinrungiwi mennang esso wenni sibawa monro ri yelle'na mennang.”

¹³ Passalenna wija-wijanna Yusuf makkedai: “Tennapodo tanana mennang ribarakkakiwi ri Puwangnge sibawa bosi, sibawa uwai polé ri yawana tanaé.

¹⁴ Tennapodo tungke' wettu maonai sibawa buwa-buwa buwa-buwa kaminang makessingngé iya matasa'é ri ponna.

¹⁵ Tennapodo sining bulu-buluna polé ri wettu riyolo pennoi sibawa wassélé tana iya dé'é padanna.

¹⁶ Tennapodo tanana ripennoiwi sibawa sininna iya kaminang makessingngé, sibawa ribarakkaki ri akessingenna Puwangnge iya mabbicaraé polé ri alekale malluwa'é. Tennapodo iyaro barakka'é nonnoi ri yasé'na wija-wijanna Yusuf, saba' aléna ritu pamimping ri yelle'na silessu-silessurenna.

¹⁷ Mappunnaiwi Yusuf awatangeng sikaju banténg, sibawa tanru saping lai ale iyanaro massebbu Manasyé sibawa mappulo sebbu Efraim. Natanru'i bangsa-bangsaé sibawa nadessa'i lettu ri cappa-cappa linoé.”

¹⁸ Passalenna suku-suku Zébulon sibawa Isakhar makkedai: “Tennapodo Zébulon madécéng nasaba allalengeng-allalengenna, sibawa Isakhar saléwangeng ri kéma-kémana.

¹⁹ Naundangngi mennang bangsa-bangsaé lao ri buluna mennang sibawa makkasuwiyang akkarobangeng iya tongengngé kuwaro. Lolongengngi mennang asugireng polé ri tasi'é, sibawa polé ri tasi'é sillampé wirinna.”

²⁰ Passalenna suku Gad makkedai: “Ripojiwi Allataala iya lowangiyéngngi daérana Gad. Mattajengngi Gad pada-pada sikajué singa maélo sapé'i taiyyaé iyaré'ga oli ulué.

²¹ Tana iya kaminang makessingngé nalai untu' aléna bagiyang appimpingengngé riwéréngngi mennang. Napogau'i mennang sininna parénta-Na sibawa hukkunna Puwangnge wettunna maddeppungeng massibawa sining pamimpinna Israélié.”

²² Passalenna suku Dan makkedai: “Sibawa pada-pada sikaju singa lolo iya luppe'é massu polé ri Basan.”

²³ Passalenna suku Naftali makkedai: “Ripateppaiwi Naftali barakka sibawa pammaséna Puwangnge; daérana poléi ri Tappareng Galiléa lettu ri yattang,”

²⁴ Passalenna suku Asyer makkedai: “Ribarakkakiwi Asyer napakacauri suku-suku laingngé; tennapodo mancajiwi risayang ri silessu-silessurenna, sibawa pong zaitungngé tuwoi macommo ri tanana.

²⁵ Tennapodo rilinrungiwi kota-kotana sibawa pintu-pintu gerbang tembaga sibawa bessi kuwammengngi natuli amang sibawa masennang atuwonna.”

²⁶ “Eh Israél! Dé' gaga déwata pada-pada Allataalamu; nalléttoiwi langié sibawa maraja sibawa bettui ellungngé untu' tulukko.

²⁷ Allataala tuli mancaji pallinrummu, taiyya-Na iya mannennungengngé tumpe'ko. Napaddésu'i balié polé ri yolomu, sibawa suroko paccappui mennang.

²⁸ Natuwo matu wija-wijanna Yakub sibawa masennang ri wanuwa iya maonaé gandong sibawa uwai anggorona, sibawa ripalleri cinoddo polé ri langié.

²⁹ Masennakko, éh Israélié! Dé' gaga bangsa iya pada-padaé iko ripassalama ri Puwangnge. Puwangnge pada-padai peddangngé sibawa kaliyawoé lao ri iko; untu' méwaiko sibawa mpérékko apakalang. Sining balimmu poléi matu méllau paressé babuwa, namuléjja-léjja'i matu mennang.”