PAKKATOBBA 5 - KITTA KAREBA MADECENG

¹ Pikkiri'i ri wettu dé'napa mumabbicara, sibawa aja' mumasitta senna majjanci lao ri Allataala. Engkai ri surugaé na iko engkako ri linoé jaji addiki-dikino sibawa ada-adammu.

² Pédé manenneng, pédé battowa akkulléna lolongeng nippi maja. Pédé maéga bicara pédé battowa akkulléna passu ada-ada madonggo.

³ Jaji, rékko majjanciko lao ri Allataala, rupaiwi masitta. Dé' napojiwi tau iya kédo madonggoé. Rimakkuwannaro, rupaiwi jancimmu.

⁴ Lebbi kessing muwi temmajjanciyé naiya majjanciyé iyakiya dé' narirupai.

⁵ Aja' naébbuko ada-adammu madosa, angkanna tarapassako powadai lao ri imang iya tumaniyéngngi Puwangnge, makkedaé tappasalako powada janci. Untu' aga mébbui Allataala macai lao ri iko angkanna Naancuru wassélé jama-jamammu?

⁶ Pada-pada maéga nippi dé'gaga bettuwanna, makkuwatoro maéga bicara dé'gaga akkégunana. Iyakiya étauno lao ri Puwangnge.

Iyaro atuwongngé siya-siya

⁷ Aja' muhérang rékko iyaro panguwasaé natenre'i tau kasiyasié, narampasa'i ha'na mennang sibawa dé' nawéréngngi mennang adélékeng. Tungke' pegawé rilinrungiwi ri tomariyasé'na sibawa iya duwanna rilinrungiwi ri pajaba iya lebbi matanré pangka'na.

⁸ Mala muwi atuwonna arungngé taggattungngi ri wassélé éngngalangngé.

⁹ Tau mammata dowié, dé' naengka nagenne dowina; tau iya jangeng waramparangngé, dé' naengka nacau sibawa asarongngé. Iya manenna siya-siya.

¹⁰ Pédé maéga asugirenna séddié tau pédé maéga tau laing iya harusu'é nawéréng inanré. Dé'gaga asarong untu' punnana, banna naissengngi makkedaé sugii.

¹¹ Séddié pappallaung weddissa jaji dé' nappunnai genne inanré, iyakiya weddingngi memme matinro. Sibalé'na, séddié tau sugi makkuwamani égana waramparanna, angkanna dé' nawedding matinro nasaba manennengngi.

¹² Uwitai ri linoéwé séuwa iya mappamessé: Séddié tau goppo waramparang untu' wettu akurangengngé.

¹³ Iyakiya iyaro waramparangngé teddéngngi nasaba séuwa abala, angkanna dé'gaga wedding nappammanareng lao ri ana'-ana'na.

¹⁴ Jajiki sibawa mallusu-lusu; makkuwatokki'ro salaiwi linoéwé, tettiwi aga-aga polé risininna turuppuse'ta.

¹⁵ Mappamessé tongeng iyaro! Laoki pada-pada wettutta makkekkuwangngé polé. Sipposo-posoki untu' lellung anging, naagana wassélé'na?

¹⁶ Gangka tuwo, maggarambakki ri laleng pettangngé, massussa-sussaki, manenneng, kérék-kéréng sibawa mapeddi ati.

¹⁷ Nauwajeppuini makkedaé iya kaminang makessingngé untu' idi iyanaritu manré, ménung sibawa péneddingiwi wassélé jama-jamatta ri wettu atuwong maponco iya nabbéréyangngé Allataala lao ri idi; iyanaro totota.

¹⁸ Rékko séddié tau tarima asugireng sibawa waramparang polé ri Allataala, naripalalo péneddingiwi asugirengngéro, harusu'i marasa sukkuru sibawa péneddingiwi sininna wassélé jama-jamanna. Iyaro pabbérénato Allataala.

¹⁹ Allataala pennoiwi atinna iyaro tauwé sibawa arennung, na dé'na namanenneng pikkiri'i passalenna ponco'na iyaé atuwongngé.