PAKKATOBBA 4 - KITTA KAREBA MADECENG

¹ Nainappa upénessaisi sininna dé'é naadélé iya kajajiyangngé ri linoéwé. Sining tau iya ritenre'é teriwi sibawa dé'gaga iya maéloé tulungngi mennang. Dé' muwi séddi tau maélo mabbantu, nasaba sining pattenre'éro mappunnaiwi akuwasang iya battowaé.

² Mangémpuruka méngngerangngi sining tau iya maittaénna maté nasaba lebbi masennangngi mennang naiya sining tau iya tuwoé mupa.

³ Iyakiya iya lebbi masennangngéppa iyanaritu sining tau iya dé'éppa najaji, saba' dé'pa mennang naitai ja iya ripogau'é ri linoéwé.

⁴ Uwisseng towi makkedaé mappallaung ladde'i tolinoé, banna nasaba mangémpurui mitai wassélé usahana balibolana. Iya manennaro siya-siyai simata pada-pada usaha lellungngé anging.

⁵ Karébanna, banna tau madonggoé bawang iya tudangngé malleppe lima sibawa leppessangngi aléna maté alupureng.

⁶ Naullé iyaro tongeng, iyakiya lebbi kessing muwi céddé waramparang nasibawangngi atennangeng naiya majjama ladde'é makkégunangngi iya duwa limaé sibawa lellung anging.

⁷ Engka mupa iya siya-siyaé ri laleng atuwongngéwé.

⁸ Engka tau tuwo alé-aléna temmappunnai ana', iyaré'ga silessureng. Namuni makkuwaro, majjama ladde'i matteru-teru sibawa atinna dé' naengka nacau sibawa waramparanna. Untu' niga napara'i puse'na sibawa sampéyangngi sininna asennangengngé? Iyaro siya-siyato, sibawa séuwa cara atuwong iya manrasa-rasaé.

⁹ Sipadduwa lebbi makessing naiya alé-alé. Rékko mappallaungngi mennang, lebbi makessingngi wassélé'na.

¹⁰ Rékko sempé'i iya séddié iya laingngé weddingngi tulungngi. Iyakiya rékko séddié tau sempé, padahal alé-alénami, macilakani aléna, nasaba dé'gaga iya mullééngngi tulungngi.

¹¹ Ri wenni iya macekké'é, duwa tau iya matinroé makkadambang weddingngi sisullé sipellai, iyakiya pékkugi tauwé wedding mancaji mapella rékko alé-alénami?

¹² Duwa tau iya silaongngé lao naulléi pasalai paggasaé, iyakiya tau iya alé-alé magampang ricau. Tellu tulu iya ripasiyempe'é mancaji séddi, mawatang ripettui.

^13-14 Tau kasiyasié wedding mancaji arung, sibawa séddié tahanang weddingngi létté ri yasé'na kadéra arajangngé. Iyakiya rékko ri umuru'na iya macowaé iyaro arungngé madonggo senna'i untu' tarima pangaja, totona lebbi majai naiya kallolo iya kasiyasié iyakiya maccai.

¹⁵ Upikkiri'i sininna tolinoé ri linoéwé, naumaingekiwi makkedaé ri yelle'na mennang pasti engka séddi kallolo iya sullééngngi matu arungngé.

¹⁶ Ra'ya' iya napimpingngé weddissa jaji tenribilang jumellana, iyakiya laonana, dé'gaga iya mattarima kasi'é méngngerangngi jasa-jasana. Mémeng, iya manenna siya-siya pada-pada usahaé lellung anging.

Aja' mumasitta senna majjanci

¹⁷ Matutuko rékko maéloko lao ri Bolana Puwangnge. Lebbi kessing muwi lao kuwaro untu' magguru naiya untu' makkasuwiyangeng akkarobangeng, pada-pada iya napogau'é sining tau madonggoé. Dé' naulléi mennang pasilaingengngi kéga tongeng sibawa sala.