PAKKATOBBA 3 - KITTA KAREBA MADECENG

Sininna séuwa-séuwaé engka wettunna

¹ Sininna séuwa-séuwaé ri linoéwé kajajiyangngi ri wettu iya napattentué Allataala

² Allataala pattentui untu' mémmana sibawa wettu untu' maté, wetu untu' mattaneng sibawa wettu untu' mabbébbu,

³ wettu untu' mabbuno sibawa wettu untu' pajjappai, wettu untu' solangiwi sibawa wettu mappatettong.

⁴ Allataala pattentui wettu untu' teri sibawa wettu untu' macawa, wettu untu' mpating sibawa wettu untu' séré-séré,

⁵ wettu untu' siluséreng sibawa wettu untu' pémmali siluséreng, wettu untu' kaddaowi sibawa wettu untu' tahangngi alé.

⁶ Allataala pattentui wettu untu' runtu'i sibawa wettu untu' ateddéngeng, wettu untu' tabungngi sibawa wettu untu' mallabowangngi,

⁷ wettu untu' sapé'i sibawa wettu untu' jayii, wettu untu' mammekko sibawa wettu untu' mabbicara.

⁸ Allataala pattentui wettu untu' mamaséiwi sibawa wettu untu' céccéi, wettu untu' mammusu sibawa wettu untu' damé.

⁹ Agana wassélé'na sininna turuppuse'ta?

¹⁰ Uwisseng makkedaé mabbéréi Allataala tiwi iya matane'é lao ri idi.

¹¹ Napattentui wettu iya teppa'é untu' sininna séuwa-séuwaé. Nawérékki cinna untu' missengngi esso mangoloé, iyakiya dé' taulléi majeppuiwi pangkaukenna Allataala polé ri pammulanna lettu ri paccappurenna.

¹² Uwisseng makkedaé untu' idi dé'gaga iya lebbi makessingngé naiya marennué sibawa péneddingiwi atuwongngé gangka tuwota.

¹³ Makessingeng manekki manré sibawa ménung enrengngé péneddingiwi wassélé jama-jamatta. Iyaro iyanaritu pabbéréna Allataala.

¹⁴ Uwisseng makkedaé sininna ébbuna Allataala tette'i matu engka mannennungeng. Dé' naulléi tolinoé tambaiwi iyaré'ga kurangiwi. Na tinda'i Allataala makkuwaro kuwammengngi natamétau ri Aléna.

¹⁵ Iya kajajiyangngé makkekkuwangngé, purani kajajiyang ri yolona. Iya maélo engka, maittana naengka. Napattentui Allataala kuwammengngi iya puraé kajajiyang, kajajiyangngi paimeng.

Atengngadélékengngé ri linoé

¹⁶ Engka topa iya uwitaé ri linoéwé: kégi harusu engka adélékeng sibawa akessingeng, kuwaro engka ja.

¹⁷ Pikkiri'ku, naadélékiwi matu Allataala tau iya makessingngé iyaré'ga tau iya majaé, saba' tungke' passaleng sibawa tungke' tindakang kajajiyangngi matu ri wettu iya napattentué Allataala.

¹⁸ Pallolongekku iyanaritu: Naojiki Allataala untu' mappaitangngi makkedaé totota dé' nasilaingeng totona olokolo'é.

¹⁹ Muwi maga, totona tolinoé sibawa olokolo'é iyanaritu padai. Iya séddié matéi matu, makkuwatoro iya laingngé. Iya duwanna pada-padai mahlu'. Jaji, tolinoé dé' nalebbi maupe naiya olokolo'é, saba' untu' iya duwanna iyaro atuwongngé siya-siyai.

²⁰ Mattujui mennang ri onrong iya padaé. Assalenna mennang poléi ri awué sibawa lisui matu ri awué.

²¹ Dé' taissengngi, aga rohna tolinoé ménré'i ri yasé sibawa rohna olokolo'é nonnoi ri laleng tanaé.

²² Rimakkuwannanaro umaingekiwi makkedaé dé'gaga iya lebbi makessingngé naiya péneddingiwi wassélé jama-jamanna. Ri lainnaéro dé'gaga naullé pogau'. Dé' namakkullé naisseng aga kajajiyang matu rékko maténi.