PAKKATOBBA 12 - KITTA KAREBA MADECENG

¹ Engngerangngi Pappancajimmu ri wettu malolomu mupa, ri wettu dé'napa nalettu taut-taung pennoé anrasa-rasang. Ri wettuéro makkedako matu, “Dé' namasennang atuwokku.”

² Rékko lettu'ni iyaro wettué dé'na namacakka matammu, angkanna massalawuni tappa mata essoé, kétengngé sibawa wéttowingngé. Ellung maliling pattiwi bosié, tette'i sibawakko selaku pangancang.

³ Ténré taiyyamu sibawa dé'na namabbéré pallinrung. Ajému iya masse'é goyangngi temmappunnai awatangeng. Isimmu dé'na nasukku untu' gareppu'i inanré. Massalawu matammu angkanna pettangiwi pakkitaé.

⁴ Arowasengngé ri lalengngé lettu'i ri daucculimmu sibawa dé' namanessa. Oni musi'é sibawa allélurengngé céddé'i dé' nariyéngkalinga. Dé' muwulléi memme matinro. Muwi oni manu'-manu'é mébbu tokko pésedding.

⁵ Métauko tuppuiwi onrong iya matanré sibawa harusu joppa sibawa matutu. Maubenni gemme'mu sibawa muwassarénréngeng ajému wettummu joppa. Nateddénna sininna pangéloremmu sibawa cinnamu. Mattujuki ri onrotta iya paccappurengngé, mabbaratai sining tauwé sibawa mpating puppu laleng.

⁶ Pettui matu ranté péra'é sibawa massara-sarang; sempé'i lampu ulawengngé sibawa mareppa; pettui tulu séro'é sibawa masolang; ancuru'i kendié sibawa tassiya-siya.

⁷ Lisui matu paimeng tubutta, mancaji awu ri linoé. Nappase atuwotta lisui matu ri Allataala. Aléna ritu mabbéréyangngi selaku pammasé.

⁸ Adakku, mémeng iya manennaro siya-siya, iya manenna paracuma, dé'gaga bettuwanna.

Rippe'na

⁹ Iyaro Pappikkiri'é naisseng sibawa mapanréi. Rimakkuwannanaro napagguruwangngi umma'é sininna pangissengengngé. Maéga pakkalarapang naggurui nainappa naoji atongengenna.

¹⁰ Makkuragai runtu'i ada-ada passaléwoé, na ada-ada iya naokié iyanaritu malempui.

¹¹ Ada-adanna iyaro tau maccaé pada-padai tekkeng macéru'na séddié pakkampi, tekkeng iya napaké untu' linrungiwi bimbala'na. Addeppungeng pakkalarapang sibawa pangaja, pada-pada paku iya masse'é maddince. Iya manennaro pabbérénato Allataala, pakkampita iya séddi-séddié.

¹² Ana'ku, harusu'ko matike lao riséddié passaleng. Arokireng kitta'é dé'gaga paccappurenna, sibawa maéga senna magguru natekkoriwi nyawaé sibawa tubué.

¹³ Pura manenna utimbang, iyanaé rippe'na iya ulolongengngé. Etauno ri Allataala sibawa turusiwi parénta-Na, saba' banna untu' iyaro Naripancaji tolinoé.

¹⁴ Naadélékiwi matu Allataala sininna pangkauketta; iya makessingngé sibawa majaé, mala iya tassubbuétto.