PAKKATOBBA 10 - KITTA KAREBA MADECENG

¹ Lale' maté nakebbongiwi sibotolo minnya wangi, céddé adonggong napatteddéngngi amaccang iya matanré.

² Sitinajai rékko tau maccaé pogau'i akessingeng, sibawa tau madonggoé pogau'i ja.

³ Paitai adonggonna risininna kédo-kédona. Sibawa lao ri sininna tauwé nappaitangngi adongokenna.

⁴ Rékko riyacairiko ri panguwasaé, aja' muwéllauwi mappésau majjama. Namuni battowai asalammu, riyaddampengekko rékko tennakko sibawa sabbara.

⁵ Engka ja laing uwita ri linoé, iyanaritu acéko-cékonna sining panguwasaé.

⁶ Tau madonggoé riwéréngngi tudangeng iya matanré, na tau mariyoloé dé' aga-aga nalolongeng.

⁷ Engka naengka uwitai ata-ataé makkinnyarang na arungngé mallalengngi pada-pada ataé.

⁸ Niga kali kalebbong, sempé'i matu ri lalenna; niga leppoi témbo'é naokkoi matu ula mamoso.

⁹ Niga majjama ri akkaling batué, tattetté'i matu sibawa malo. Niga mappuwé aju, wedding senna'sa lolongeng lo.

¹⁰ Rékko makunrui bangkummu nadé' muwasai, harusu'ko majjama lebbi massussa-sussa. Pakéi akkaleng makessimmu, sibawa ébbuno rancana lebbi riyolo.

¹¹ Rékko makkokkoi ulaé ri wettu dé'napa naripakacuwai sibawa pajjappi, sanro ulaé dé' gagana akkégunana.

¹² Ada-adanna tau maccaé mébbui ripakalebbi, iyakiya tau madonggoé binasai nasaba ada-adanna muto.

¹³ Napammulaiwi sibawa bellé biyasaé, iyakiya paccappurenna bicaranna pada-padai tau jangengngé.

¹⁴ Mémeng, tau madonggoé maéga bicaranna. Esso mangoloé tassubbui untu' idi maneng. Dé'gaga mulléi botoi kajajiyangngé rékko dé'ni gaga.

¹⁵ Banna tau madonggoé dé' naissengngi lalengngé lao ri bolana, majjama ladde'i sibawa dé' appésaunna.

¹⁶ Cilakani wanuwa iya arunnaé malolo mupa, sibawa sining tomarajana puppu benni mappésta marowa.

¹⁷ Maupe'i wanuwa iya arunnaé riyakkitangi, iya manré tomarajana ri wettunna, dé' napojiwi mabo' sibawa macca tahangngi aléna.

¹⁸ Sebbo'i matu pabbingeng bolaé rékko dé' naripédécéngi, na angkanna matabu'i matu iyaro bolaé nasaba akuttung.

¹⁹ Péstaé mébbui macawa, sibawa anggoro'é mébbui marennu. Iyakiya parellu engka dowi untu' mpajai.

²⁰ Aja' mucellai arungngé, muwi ri laleng ati. Aja mupau-pau majai tau sugié, muwi ri bili atinrong paribadié. Naullé sikaju manu'-manu' méngkalingai aga iya mupauwéro, nanapalettu'i lao ri iya nakennaé.