PAKKATOBBA 1 - KITTA KAREBA MADECENG

Sininna séuwa-séuwaé siya-siya

¹ Ada-adaé ri laleng kitta'éwé assalenna poléi ri Pappikkiri'é, ana' worowanéna Daud, iya sulléiyéngngi Daud mancaji arung ri Yérusalém.

² Makkedai Pappikkiri'é: Iya manenna siya-siyai sibawa dé' nakkéguna! Iyaro atuwongngé paracuma, iya manenna dé'gaga bettuwanna.

³ Majjamaki sillampé umuru'ta, maggangka ullé. Iyakiya, kégani wassélé'na iya weddingngé riyabbangkakeng?

⁴ Mompoi assossoreng iya séddié sibawa assossoreng iya laingngé lennye'i, iyakiya linoé tette muwi pada.

⁵ Mompo mupi mata essoé sibawa labu mutopi. Nasibawang atekkoreng lisui ri onronna mammulangngé, nainappa mompo paimeng.

⁶ Mirii angingngé liyattang, nainappa mangiri limanorang; maccenné-cennéi, nainappa lisu paimeng.

⁷ Sininna saloé massolo'i lao ri tasi'é, iyakiya dé' naengka napenno tasi'é. Lisui uwaina ri ulunna saloé, nainappa mappammula massolo paimeng.

⁸ Iya manenna pajinna na iyaro apajinnangngé tenripowada. Dé' naengka namesso mataé makkita; daucculingngé dé' naengka nacau maréngkalinga.

⁹ Aga pura kajajiyang, kajajiyangngi matu paimeng. Aga pura ripogau', ripogau'i matu paimeng. Dé'gaga séuwa iya barué ri linoéwé.

¹⁰ Engka tau makkeda, “Itani, baru iyaé!” Iyakiya, iyaro engkani ri wettu dé'napa tajaji.

¹¹ Dé' naéngngerangngi tauwé kajajiyang ri wettu labe'é. Makkuwatoro kajajiyang makkekkuwangngé sibawa matti, dé' nasénge'i matu tauwé ri wettu mangoloé.

Pangalamanna Pappikkiri'é

¹² Iyya, Pappikkiri'é, mapparénta ri Yérusalém selaku arunna Israélié.

¹³ Makkattaka untu' salidikiwi sibawa magguruiwi sibawa mapanré sininna iya kajajiyangngé ri linoéwé. Toto iya napassadiyangengngékki Allataalata mappamessé tongeng.

¹⁴ Purani uwita sininna pangkaukenna tauwé ri linoéwé. Ateppe'no, iya manennaro siya-siyai, pada-padai usaha lellungngéngngi angingngé.

¹⁵ Iya majjékkoé dé' nariyullé pallempu, sibawa iya dé'é gaga dé' nariyullé bilang.

¹⁶ Pikkiri'ku, “Iyya'é mancajina tau penting sibawa mapanré, mabéla lebbi mapanréna naiya sininna tauwé iya mapparéntaé ri Yérusalém ri yoloku. Paddeppungekka maéga pangisseng.”

¹⁷ Namakkattaka untu' missengngi assilaingenna pangissengengngé sibawa adonggongngé, apanréngngé sibawa adongokengngé. Iyakiya annessana pada-padaka lellungngé anging bawang.

¹⁸ Saba' pédé maégai pangissengetta, pédé maéga towi amaccatta. Pédé maégai pangissengetta, pédé maéga towi asussatta.