NAHUM 3 - KITTA KAREBA MADECENG

¹ Macilakani kotaéwé iya pennoé bellé sibawa abbunowang; penno barang rampasang iyaré'ga rirappaé.

² Engkalingai petti babbaé sibawa addukéku'na padatié, oni ajé anyarang larié sibawa addukéku'na karétaé.

³ Maggasai pasukang makkinnyarangngé penno sumange, mattappa peddangngé sibawa maccillang bessié. Tenribilang tau maté, silappo-lappo ujuna mennang, mébbui sining tauwé tabbuttu.

⁴ Niniwé cakkuribangngéro mattengngang rihukkung. Mappamennye-mennye agellorenna. Maéga bangsa pura napakennai paddisseng, nenniya napalécé sibawa pappalécéna.

⁵ Makkedai Puwang Iya Pommakuwasaé, “Eh Niniwé, Usissako matu! Uludungngi kaimmu ri yolona bangsa-bangsaé, angkanna naitai mennang jamu.

⁶ Ugaukekko selaku barang mappakaciddi-ciddi'é, Ugenrukko sibawa tai, Upancajiko akkita-itang.

⁷ Iya mitaékko napabélaiwi matu aléna sibawa makkeda, ‘Ruttungennna mani Niniwé monro! Niga maccowé masara sibawa aléna? Dé'gaga iya maéloé saléworiwi.’ ”

⁸ Eh Niniwé, masa lebbi kessikko naiya Tébe, ibukotana Maséré? Onronna Tébe ri wiring saloétto iya linrungiyéngngi selaku témbo'. Salo Nil ritu bénténg attahangenna.

⁹ Naparéntai Tébe Sudan sibawa Maséré, na akuwasanna dé'gaga paggangkanna; Libia sibawa Put iyanaritu siyempe'na.

¹⁰ Namuni makkuwaro, pabbanuwana Tébe ritawangngi sibawa ritiwi ri appalirengngé. Ri sininna pékka lalengngé, ribarasakiwi ana'-ana'na gangka maté. Sining tomarajana ribalenggui sibawa ranté naritawa-tawa ri yelle'na sining tawangngéngngi.

¹¹ Eh Niniwé, muwi iko marenne tokko matu nasaba mabo'ko. Makkuraga tokko matu kuwammengngi naleppe polé risining balimmu.

¹² Sininna béntémmu pada-padai matu pong ara iya pennoé buwa-buwa iya matasa'é. Rékko rigottangngi iyaro ajué, sempé'i matu buwa-buwana ri laleng bawana tau iya macinnaé manréi.

¹³ Malemmai prajuri'-prajuri'mu pada-pada makkunraié na wanuwammu dé' sises-siseng matu pakkullénna moloiwi balié. Nangurengngi matu api sining paccala'na pintu gerbammu.

¹⁴ Séro' bawanni uwai untu' pappassadiyang ri wettu rikkeppummu, sibawa pakkasse'i sining béntémmu! Pucca'-pucca'ni bungkaé untu' mébbu bata, sibawa passadiyani cétakanna!

¹⁵ Muwi aga upogau', siya-siyato bawang, saba' pasti cappuko matu ritunu iyaré'ga maté ri laleng ammusurengngé. Lennye'ko matu pada-pada wassélé dare'é nanré incalé. Purano mabbija-bija pada-pada incalé!

¹⁶ Sining paddare'mu nacau égai jumellana wéttowingngé ri langié! Iyakiya makkekkuwangngé lennye'ni, pada-pada incalé iya pallebba'éngngi pannina nainappa luttu massuwajang.

¹⁷ Sining tomarajamu sibawa pajaba'mu pada-padai incalé makkonrong iya mallinrungngé risining témbo'é ri wettu keccé'é. Iyakiya momponana matanna essoé, masitta'i mennang luttu massuwajang; dé' muwi séddi tau missengngi kégai mennang lao.

¹⁸ Eh arunna wanuwa Asyur! Maténi sining gubernurmu, sibawa sining bupatimmu matinroni untu' mannennungeng. Tassiya-siyani ra'ya'mu ri bulué, na dé'gaga muwi séddi tau mulléi tiwii mennang lisu paimeng.

¹⁹ Dé' nariyullé mpurai lomu sibawa dé' nariyullé pajjappa. Sininna tau iya méngkalingaéngngi karéba ancurukemmu mappaleppa'i marennu. Saba' manrasa-rasa manenni tauwé nasaba jamu iya dé'é nacappuro.