NAHUM 1 - KITTA KAREBA MADECENG

¹ Iyanaé pasenna Allataala passalenna Niniwé. Iyaro pasengngé napannessai sibawa pakkitang iya nabbéréyangngé lao ri Nahum, séddiwi nabi iya assalennaé polé ri Elkos.

Caina Puwangnge lao ri Niniwé

² Dé' namaélo Allataala mappunnai saingang, tau iya méwaéngngi Aléna, pasti lolongengngi pahukkungeng. Nasibawang cai maseroé, makkabale'i lao ri mennang.

³ Mémeng Puwangnge, dé' namasitta macai; iyakiya makuwasa senna towi angkanna nigi-nigi pogau' asalang dé' Napaleppe'i matu polé ri pahukkungengngé. Kégi Puwangnge joppa, kuwaro mompo anginraja; ri onrong ajé-Na makkella, kuwaro awué mancaji ellung.

⁴ Naancangngi tasi'é sibawa rakkoiwi, sininna saloé napaccappui uwaina. Bulu Karmél sibawa sining padangngé ri Basyan mancaji makabuttui sibawa ri Libanon makelle'i sininna bunga-bungaé.

⁵ Ténréi sining bulué ri yolo-Na; sibawa bulu-bulué mancaji maccolo manengngi. Rékko mallurui Puwangnge, tatténréng linoé, ténré linoé sibawa sininna pabbanuwana.

⁶ Niga mulléi tahang narékko macayii Puwangnge? Dé'gaga mulléi leppe polé ri cai-Na? Napallessui cai-Na iya malluwa'é ancuru'i batué sibawa mancaji awu ri yolo-Na.

⁷ Makessing iyaro Puwangnge, Nalinrungiwi umma'-Na wettunna mennang masussa, Najagaiwi tau iya mallinrungngé ri Aléna.

⁸ Pada-padai lémpe raja iya paappo'é, Naancuru'i sining balin-Na. Mennang iya baranié méwai Naunrui sibawa amaténg angkanna binasa.

⁹ Muwi rancana aga iya mupogau'é naéwai Puwangnge, pasti dé' nallolongeng matu. Dé' Nakkabale matu narapi wékkaduwa lao ri sining balin-Na.

¹⁰ Ritunuko matu pada-pada daramé iya marakkoé pada-pada alekale maddori iya sialu-alué.

¹¹ Polé ri iko, éh Niniwé, momponi séddi tau iya pennoé sibawa rancangang majaé. Mébbui rancana untu' méwai Puwangnge.

¹² Nakkeda Puwangnge lao ri Israélié, umma'-Na, “Namuni iyaro sining tau Asyur-é mawatangngi erengngé maéga jumellana, iyakiya riyancuru'i matu nanalennye. Eh bangsa-Ku, Iyya pura mébbuko manrasa-rasa, iyakiya dé' Upogau'ni matu.

¹³ Makkekkuwangngé maélo-Ka paccappa'ni akuwasanna Asyur lao ri iko, sibawa upettuiwi ranté iya siyoékko.”

¹⁴ Iyanaé apettunna Puwangnge passalenna bangsa Asyur-é, “Dé' nappunnai matu wija untu' patterui bangsana. Dato'-dato' barahala iya engkaé ri laleng bola-bola déwatana, Uwancuru'i matu. Kuburu untu' bangsa Asyur-é mattengnganni Upassadiya, saba' dé' nasipato mennang tuwo!”

¹⁵ Itani, engka séddi suro polé lalo risining bulué, tiwi karéba madécéng, karéba apakalang. Eh bangsa Yéhuda, ramé-raméini esso marajamu sibawa wajani tinja'mu lao ri Allataala. Dé'na narijajana matu wanuwammu ri tomajaé. Purani mennang riyancuru siseng.