MAZMUR 99 - KITTA KAREBA MADECENG

Allataala, Arung Maraja

¹ Puwangnge iyanaritu Arung; ténréi bangsa-bangsaé. Makkarungngi ri yasé'na kérub-é, taggottang linoé.

² Makuwasa senna'i Puwangnge ri Sion; marajai ri yasé'na sininna bangsaé.

³ Leppessanni mennang pojiwi asen-Na iya malempué namalebbi. Mapaccingngi Aléna!

⁴ Untu' alé-Mu akuwasangngé, Arung iya pojiyéngngi hukkungngé; purani Mupatettong atongengengngé; Mupajoppai hukkungngé sibawa adélékengngé ri Israél.

⁵ Pakalebbii Puwang Allataalata, suju'no ri yolona kadéra arajan-Na, Mapaccingngi Aléna!

⁶ Musa sibawa Harun muttama'ni imang-ngiman-Na, Samuél sala séddinna iya massempajangngé ri Aléna. Mangobbii mennang lao ri Puwangnge, sibawa mabbéréi pappébali.

⁷ Polé ri alliri ellungngé mabbicarai lao ri mennang, mapatoi mennang lao ri sininna hukkun-Na sibawa parénta-Na.

⁸ Oh Puwang Allataalata, Mubaliwi umma'-Mu; untu' mennang Iko Allataala iya pojiyéngngi maddampeng, namuni Muhukkungngi mennang nasaba asalanna.

⁹ Pakalebbii Puwang Allataalata, sibawa sompai Aléna ri Bulu-buluna iya mapaccingngé, saba' mapaccingngi Puwang Allataalata.