MAZMUR 96 - KITTA KAREBA MADECENG

Allataala, Arung iya marajaé

¹ Puwélonno élong baru untu' Puwangnge! Akkélonno untu' Puwangnge, éh sininna linoé!

² Akkélonno untu' Puwangnge sibawa pojiwi Aléna; abbirittanni esso-esso karéba marennué makkedaé puraki napassalama.

³ Curitai arajan-Na lao ri bangsa-bangsaé, sibawa sining pangkauken-Na iya poré lao ri rupa tauwé.

⁴ Saba' battowai Puwangnge, sibawa ripoji senna, harusu'i riyétauri lebbi naiya seninna déwataé.

⁵ Déwata-déwatana bangsa laingngé banna dato'-dato' barahala, iyakiya Puwangnge iyanaritu pancajiwi bitara malowangngé.

⁶ Risalipuriwi ri arajan-Na sibawa alebbiren-Na, Bola-Na pennoi akuwasang sibawa agelloreng.

⁷ Pojiwi Puwangnge, éh rupa tauwé, pojiwi arajan-Na sibawa awatangen-Na!

⁸ Pojiwi asen-Na iya malebbié, sibawa tiwino akkarobangeng ri laleng Bola-Na.

⁹ Sompai Puwangnge sibawa mappaké pakéyang assompang! Ténréno ri yolo-Na, éh sininna linoé!

¹⁰ Abbirittangngi lao ri bangsa-bangsaé, “Puwangnge ritu Arung! Masse'i linoé tenrigoyang; Naadélékiwi matu bangsa-bangsaé sibawa adélé.”

¹¹ Akkérennuno, éh langi sibawa linoé! Memmu'no éh tasi sibawa sininna lise'na!

¹² Ariyo-riyono, éh dato'-dato' sibawa sininna tanet-tanenna! Ajukajung ri ale'é gora-gorai matu.

¹³ Saba' poléi Puwangnge mapparénta ri linoé, Naadélékiwi matu bangsa-bangsaé sibawa adélé nenniya malempu.