MAZMUR 94 - KITTA KAREBA MADECENG

Allataala madélékiwi sininna tauwé

¹ Oh Allataala, Iko ritu Allataala iya makkabale'é, ajjellokenni pakkabale'-Mu, oh Puwang.

² Tokkonni, oh Hakinna sininna linoé, hukkungngi tau matempoé situru pangkaukenna mennang.

³ Oh Puwang, gangka kégi tau majaé marennu? Gangka kégi, oh Puwang?

⁴ Passui mennang ada-ada iya makassara'é, sibawa mattempowangngi jana mennang.

⁵ Natenre'i mennang umma'-Mu, oh Puwang, sibawa reppo'i sining tau Mupilé.

⁶ Naunoi mennang jandaé sibawa ana' béué enrengngé tau laing iya monroé ri wanuwaéwé.

⁷ Adanna mennang, “Dé' narita ri Puwangnge, dé' narijampangi ri Allataalana Yakub.”

⁸ Eh bangsa, aja' mumadonggo makkuwaro, agguruno pakéi akkalemmu!

⁹ Allataala mébbui daucculingngé, dé'ga Namaréngkalinga? Aléna mébbu mata, dé'ga Namakkita?

¹⁰ Aléna paggurui bangsa-bangsaé, dé'ga Napahukkung? Aléna mancaji gurunna sininna tauwé, dé'ga Nappunnai pangissengeng?

¹¹ Nawellungi Puwangnge pikkiranna tolinoé, naisseng manengngi siya-siyai simata.

¹² Masennangngi tau iya Mupaggurué, oh Puwang, tau iya Mupaggurué hukkung-hukkum-Mu.

¹³ Mupattennangngi ri esso-esso abalaé, angkanna rikali kalebbongngé untu' tikkengngi tau majaé.

¹⁴ Saba' dé' nasalaiwi Puwangnge umma'-Na; dé' najampaléllériwi matu appunnangeng mana-Na.

¹⁵ Naripatettong matu paimeng hukkungngé ri pengadilangngé, sininna tau malempué nasokongngi matu.

¹⁶ Niga méwaika lao ri tau madorakaé? Niga maccowérika méwai tau iya pogau'éngngi majaé?

¹⁷ Ebara'na Puwangnge dé' natulukka, céddé'ka lélé ri linona tau maté.

¹⁸ Wettukku mappikkiri makkedaé sempé'ka matu, pammasé-Mu, Puwang, mébbuka tettong masse.

¹⁹ Rékko manennengngi atikku sibawa mausé, massaléwoko sibawa pasennangika.

²⁰ Dé' musiyempe sibawa haking-haking majaé, iya rancangngéngngi jaé situru hukkungngé.

²¹ Sikongkolo'i mennang méwai tau malempué, sibawa hukkung matéi tau iya dé'é napasala.

²² Iyakiya Puwangnge iyanaritu pangéwaingekku, Allataalaku mancaji pallinrukku.

²³ Nahukkungngi tau majaé situru jana, sibawa mammekkoi mennang nasaba dosana. Puwang Allataalata pammekkoi matu mennang.