MAZMUR 92 - KITTA KAREBA MADECENG

Elong pappojiyang

¹ Elong untu' esso Saba'é.

² Makessing tongeng sukkuru lao ri alé-Mu, oh Puwang, sibawa poji-Ko, Allataala Iya Pommatanré;

³ mabbirittangngi pammasé-Mu ri éléé, sibawa atinulure-Mu ri wennié,

⁴ nanagetti towi gitar seppuloé tuluna, naccowéri gambusu sibawa kacapi.

⁵ Saba' pangkaukem-Mu pésennangiwi atikku, makkélokka marennu nasaba winru-Mu.

⁶ Temmaka loppona sining pangkaukem-Mu, oh Puwang, temmaka lamunna nawa-nawam-Mu!

⁷ Dé' naulléi majeppuiwi tau madonggoé, dé' nawedding napahang tau madongo'é.

⁸ Weddissa jaji tau madorakaé tuwo macommo pada wellaé, sibawa tau majaé tattamba sugi sibawa madécéng; iyakiya ripaccappu sisengngi matu mennang,

⁹ saba' Iko, Puwang, makuwasa mannennungeng.

¹⁰ Taissengngi ripaccappui matu balim-Mu, oh Puwang, sininna tau majaé ripassara-sarangngi matu.

¹¹ Muwébbuka pada watanna banténg liyaé, nenniya barakkakika sibawa asennangeng.

¹² Uwitai akalanna sining balikku, sining tau iya tokkongngénna méwaka, uwéngkalingani rancana-rancana majana mennang.

¹³ Tau malempué cura'i pada-pada pong karomaé, sibawa tuwo macommo pada-pada pong camaraé ri Libanon.

¹⁴ Padai mennang aju iya ritanengngé ri Bolana Puwangnge, sibawa mabbija ri Bolana Allataalata,

¹⁵ aju iya mabbuwaé mupa ri wettu macowana, tette'i manyila matakka.

¹⁶ Iyanaro buttinna makkedaé adélé'i Puwangnge; aléna pangéwaingek-Ku, dé'gaga acéko-cékong ri Aléna.