MAZMUR 90 - KITTA KAREBA MADECENG

KITTA MAEPPAE: MAZMUR 90–106 Allataala, onrong allinrungenna tolinoé

¹ Sempajanna Musa, atanna Allataala. Oh Puwang, Iko ritu onrotta mallinrung massossoreng.

² Ri wettu dé'napa naripancaji sining bulué, ri wettu dé'napa Mutappai linoé, Iko ritu Allataala iya mannennungengngé, dé' pammulanna sibawa dé' paccappurenna.

³ Musuroi tolinoé lisu ri assalenna, mancaji awu pada-pada pammulanna.

⁴ Untu' alému sisebbu taung padai siessoé, esso iwenni iya labe'énna; pada-pada léléng jagangngé ri wennié.

⁵ Muwalirekki; pada-padaki nippié, pada-pada wella iya cura'é;

⁶ ri éléé tuwoi sibawa mabbunga, iyakiya makelle'i ri arawéngngé.

⁷ Tassélekki nasaba cai-Mu, sibawa cappu binasa nasaba cai-Mu.

⁸ Mutaroi asalatta ri yolo-Mu, dosata iya tassubbué Muwitai.

⁹ Maponco'i atuwotta nasaba cai-Mu, cappui taut-tautta pada-pada seppung nappase'é.

¹⁰ Wettu atuwotta banna pituppulo taung, rékko mawatakki, aruwa pulona taung. Iyakiya banna asukkarakeng sibawa anrasa-rasang iya talolongengngé; purana atuwong iya maponco'é, lennye'ni.

¹¹ Nigana missengngi aseronna cai-Mu, iyaré'ga maingekiwi matu addimonrinna cai-Mu?

¹² Pamaingekiki matu ponco'na atuwottaé kuwammengngi tamancaji tau iya engkaé akkalenna.

¹³ Oh Puwang, gangka kégi-Ko macai? Lisuno sibawa amaséiwi ata-atam-Mu.

¹⁴ Patabbolloi pammasé-Mu lao ri idi tungke élé, kuwammengngi tamarennu sibawa makkélong gangka tuwota.

¹⁵ Wérékki asennangeng sittimbang sibawa anrasa-rasangngé iya ritanggungngé ri laleng taut-taung anrasa-rasangngé.

¹⁶ Ajjellokengngi winru-Mu lao ri ata-atam-Mu, sibawa akuwasam-Mu iya battowaé lao ri wijatta.

¹⁷ Oh Puwang Allataalata, barakkakiki, kuwammengngi nasininna jama-jamatta mawwassélé'i.