MAZMUR 89 - KITTA KAREBA MADECENG

Elong ri wettu nakennana abala

¹ Elong pappagguruwanna Etan, tau Ezrahié.

Atinulurenna Puwang Iya Posséuwaé

² Paressé babuwa-Mu, Puwang, maélo upuwélong mannennungeng, atinulurem-Mu uwabbirittang matu massossoreng.

³ Saba' uwisseng pammasé-Mu mannennungengngi, atinulurem-Mu mattinettoi pada-pada langié.

⁴ Makkedako, “Purana mébbu assijancing sibawa tau ripilé-Ku; pura-Ka mattanro lao ri Daud, atak-Ku:

⁵ ‘Uwattahangengngi kadéra arajam-Mu untu' mannennungeng, massossorengngi natudangi matu ana' eppomu.’ ”

⁶ Addeppungeng surugaé pojiwi sining pangkaukem-Mu iya makalallaingngé, sibawa makkélongengngi atinulurem-Mu, Puwang.

⁷ Ri langié dé' gaga pappadai-Ko, oh Puwang, dé' gaga mahlu' suruga iya pappadaiyék-Ko.

⁸ Ripakalebbi-Ko ri yelle'na sining mapaccingngé, riyétauri lebbi naiya sininna ri mattulilim-Mu.

⁹ Puwang, Allataala Iya Pommakuwasaé, nigana pada-pada watam-Mu? Matinuluko ri laleng sini-sininnaé oh Puwang.

¹⁰ Mukuwasaiwi tasi iya mabbombangngé, sibawa pasoroi bombanna iya maseroé.

¹¹ Rahab, naga tasi'é, Mureppo'i sibawa Muwunoi, nasibawang lima mawatangngé Mucaui sining balim-Mu.

¹² Langi sibawa linoé iyanaritu appunnangem-Mu, linoé sibawa sininna lise'na winru-Mu.

¹³ Iko ritu pancajiwi manorang sibawa yattang, Bulu Tabor sibawa Bulu Hérmon gora-gorai untu' alé-Mu.

¹⁴ Temmaka battowana akuwasam-Mu, sibawa pékkugi serona awatangem-Mu!

¹⁵ Adélékengngé sibawa hukkungngé iyanaritu tettongenna akkarungem-Mu, pammasé sibawa atinuluremmu manessai ri laleng sininna tindakam-Mu.

¹⁶ Masennangngi bangsa iya massompaé sibawa marennu, iya tuwoé ri laleng cahaya ahadérékem-Mu, Puwang.

¹⁷ Puppu esso mariyo-riyo mennang sibawa tette masse, nasaba akessingemmu.

¹⁸ Muwérékki apakalang iya makessing senna'é, nasaba akessingem-Mu ritu natapakala.

¹⁹ Saba' pallinrutta iyanaritu tau Mupilé, oh Puwang; arutta iyanaritu appunnangenna Allataalana Israél Iya Mapaccingngé.

Jancinna Allataala lao ri Daud

²⁰ Riyolo ri laleng séuwa pakkitang, makkeda-Ko lao ri atam-Mu iya matinulué, “Purani utulung séddié pabbarani, séddi tau iya Upilé polé ri ra'ya'é purani Upakatanré.

²¹ Purani Ulolongeng Daud, atak-Ku, sibawa Ulanti sibawa minnya upacara.

²² Awatangek-Ku tuli linrungiwi matu, akuwasak-Ku péwatangiwi matu.

²³ Dé' naricau matu ri balié, sibawa dé' naritenre ri tau majaé.

²⁴ Sininna balinna Upaccappui matu, Uwunoi niga-niga céccééngngi.

²⁵ Tette'ka matu mamaséiwi sibawa matinulu lao ri aléna, sibawa mébbui pédé makuwasa.

²⁶ Ulowangiwi matu akkarungenna, polé ri Tasi Tengngaé lettu ri Salo Efrat.

²⁷ Makkedai matu lao ri Iyya, ‘Iko ritu Ambo'ku, Allataalaku, pallinrukku sibawa pappassalama'ku.’

²⁸ Upancajiwi matu ana' worowané-Ku macowaé, iya kaminang marajaé riyelle'na sininna arungngé.

²⁹ Tette'i matu Uwamaséi lettu mannennungeng, assijancik-Ku sibawa aléna tette'i masse.

³⁰ Kadéra akkarungenna Uwattahangengngi ri wettu engkana mupa langié ri yasé'na linoé, massossorengngi natudangi matu ana' eppona.

³¹ Iyakiya rékko wija-wijanna najjalékkaiwi hukkuk-Ku, sibawa dé' natuwo situru parénta-Ku,

³² rékko mennang dé' nabati-batiwi Upattette'é sibawa dé' najampangiwi peraturak-Ku,

³³ Uhukkungngi mennang sibawa cambu nasaba pelanggaranna, sibawa Upateppai abalaé nasaba dosa-dosana.

³⁴ Iyakiya tette'-Ka matu mamaséiwi Daud, sibawa dé' matu Uwassakkarengngi atinulurek-Ku.

³⁵ Assijancik-Ku sibawa aléna dé' matu tek-Kupajajiwi, polé ri jancik-Ku dé' muwi séddi Ugetteng paimeng.

³⁶ Siseng untu' mannennungeng mattanro-Ka nasaba asek-Ku iya mapaccingngé; dé' matu Uwabbellé lao ri Daud.

³⁷ Mattahangngi matu kadéra akkarungenna ri wettu engkana mupa mata esso, massossorengngi ana' eppona tudangiwi matu.

³⁸ Akkarungenna tette'i engka pada-pada kétengngé, sabbi matinulué ri ellungngé.”

Awatingeng nasaba ricauna arungngé

³⁹ Iyakiya makkekkuwangngé macai-Ko lao ri arungngé, Muwabbéyangngi sibawa sampéyangngi tau Mupilé.

⁴⁰ Dé' Mupajajiwi assijancim-Mu sibawa atam-Mu, Muwaggenrungengngi passigera'na ri laleng bungkaé.

⁴¹ Muruttungngi témbo'-témbo' kotana, sining bénténna Mupancajiwi ruttungeng.

⁴² Sininna tau iya laloé narampasa'i appunnangenna, mancajiwi akkéllékéllékeng lao ri balibolana.

⁴³ Muwéréngngi apakalang risining balinna, sibawa mébbui sininna balinna marennu.

⁴⁴ Mala senjatana Mupancajiwi dé' nakkéguna, dé' Mutulungngi ri laleng musué.

⁴⁵ Mupaccappa'i akuwasanna iya malebbié, kadéra akkarungenna Muwaggeppuwangngi ri tanaé.

⁴⁶ Muponcokiwi wettu malolona, enrengngé tongkoi sibawa siri.

Sempajang méllau aleppekeng

⁴⁷ Gangka kégi-Ko massubbu, oh Puwang? Gangka kégi cai-Mu malluwa pada-pada apié?

⁴⁸ Engngerakka temmaka ponco'na atuwokkué, Mupancajiwi tolinoé selaku mahlu' dé'é namannennungeng.

⁴⁹ Nigana mulléi tuwo matteru sibawa dé' namaté? Nigana mulléi leppe polé ri kuburu'é?

⁵⁰ Oh Puwang, kégani tanrang pammasé-Mu iya mammulangngé, iya Muwajjanciyangngé lao ri Daud nasaba atinulurem-Mu?

⁵¹ Engngerangngi oh Puwang, pékkugi atam-Mué ricella, utanggungngi pappakatunana maéga bangsa.

⁵² Sining balim-Mu napakatunai arung Mupilé, oh Puwang, méllé-kéllé'i kégi-kégi lao.

⁵³ Pojiwi Puwangnge untu' mannennungeng. Jajini makkuwaro! Aming!