MAZMUR 85 - KITTA KAREBA MADECENG

Sempajang untu' asaléwangenna bangsaé

¹ Untu' pamimping kor. Mazmurna appang Korah.

² Muwéloriwi tana-Mu, oh Puwang, keadaanna Israélié purani Mupalisu.

³ Purani Muwaddampengeng dosa-dosana umma'-Mu; Muwaddampengenni sininna asalanna.

⁴ Dé'na Muwacairi mennang; cai-Mu iya maseroé Mugettengngi lisu.

⁵ Pajjappaki, oh Allataala pappassalama'ta, aja' Mumacai paimeng lao ri idi.

⁶ Untu' mannennungegga Muwacairiki, sibawa tette macai massossoreng?

⁷ Péwatangiki paimeng kuwammengngi tamarennu idi umma'-Mu nasaba pattulum-Mu.

⁸ Ajjellokenni makkedaé tette'-Ko mamasé, oh Puwang, wérékki asalamakeng polé ri alé-Mu.

⁹ Maéloka méngkalingai ada-adanna Puwang Allataala; Najjanciyangngi asaléwangengngé lao ri idi, umma'-Na, assaleng dé' talisu pogau' dosa.

¹⁰ Tongeng, sadiyai passalama'i tau iya mateppe'é, Allataala iya marajaé monroi matu ri wanuwatta.

¹¹ Pammasé sibawa atinulureng siruntu'i matu, adélékeng sibawa adaméngengngé sikaddao-kaddaowi matu.

¹² Atinulurenna tolinoé tuwoi matu polé ri linoé, sibawa adélékenna Allataala célléngngi polé ri langié.

¹³ Puwangnge mabbéréyangngi iya makessingngé, na tanata mabbéréi matu wassélé.

¹⁴ Adélékengngé poddiyoloiwi matu Puwangnge, sibawa passadiyai lalengngé untu' Aléna.