MAZMUR 81 - KITTA KAREBA MADECENG

Elong ri wettu ramé-ramé

¹ Untu' pamimping kor. Situru lagunna: Gitit. Polé ri Asaf.

² Puwélonni pappoji-pojiyangngé untu' Allataala, awatangetta, gorano sibawa marennu untu' Allataalana Yakub.

³ Paonini rabanaé, akkani élongngé, getti'i gambusu'é nenniya kacapié sibawa macenno.

⁴ Seppungngi tarompé'é ri esso marajata, ri pésta uleng barué sibawa uleng léburengngé.

⁵ Saba' iyaro gau'é séuwai peraturang ri Israélié, séuwai parénta polé ri Allataalana Yakub.

⁶ Napancajiwi séuwa attettekeng untu' bangsa Israélié, wettunna malluru méwai Maséré. Uwéngkalingai basa iya dé'é uwissengngi,

⁷ “Purani uwakka tiwi polé ri salangkammu, sibawa leppessangngi baka lémparengngé polé ri limammu.

⁸ Ri laleng asussammu mangobbiko, Naupassalama'ko. Ubaliko polé ri guttu onrok-Ku massubbu, Upojiko ri mata uwai Mériba.

⁹ Engkalingai papparéngngerak-Ku, éh umma'-Ku, Israél, akkalarapanna maéloko méngkalinga-Ka!

¹⁰ Aja' naengka déwata laing ri yelle'mu, aja' musompa déwata laing.

¹¹ Iyya ritu Puwang Allataalamu, iya dulungngékko massu polé ri Maséré. Wettummu malupu riwérékko inanré.

¹² Iyakiya umma'-Ku dé' namaélo méngkalinga-Ka, dé' namaélo mapato Israélié lao ri Iyya.

¹³ Rimakkuwannanaro Uleppessangngi mennang matedde ati; leppessangngi mennang naccowéri élona muto.

¹⁴ Ah, akkalarapanna umma'-Ku maéloi méngkalinga-Ka, akkalarapanna maéloi mapato lao ri Iyya,

¹⁵ masitta'-Ka patunru'i balinna mennang, sibawa caui sininna balinna mennang.

¹⁶ Tau iya céccéék-Ka Upatunru'i matu, rihukkungngi matu mennang untu' mannennungeng.

¹⁷ Iyakiya umma'-Ku Upanréi matu gandong ripilé, sibawa Upamessori sibawa cani ale.”